“Moenie bang wees nie. Kyk ek bring vir julle ‘n goeie boodskap wat vir die hele volk ‘n bron van groot vreugde sal wees: Vandag is daar vir julle in die stad van Dawid as Verlosser gebore, Christus die Here”
Luk. 2: 10-11
Reeds in Jesaja belowe God aan ons dat ‘n seun aan ons gegee gaan word, vir die uitbreiding van Sy heerskappy (“Want ‘n kind is vir ons gebore, ‘n seun is aan ons gegee. Die heerskappy is op sy skouer. Hy word genoem: Wonderbare Raadgewer, Magtige God, Ewige Vader, Vredevors. Vir die uitbreiding van heerskappy en vir vrede sonder einde,…” (Jes. 9: 5-6)). Hierdie belofte word waar in die geboorte van Jesus Christus, soos deur die engel aan Josef verskyn het en hom weereens aan hierdie belofte herinner het. (“Sy sal geboorte gee aan ‘n seun, en jy moet Hom Jesus noem, want Hy sal sy volk van hulle sonde verlos” (Matt. 1: 21)). Johannes verseker ons dat God vlees geword het en onder ons kom woon het (“En die Woord het vlees geword en onder ons kom woon, en ons het sy heerlikheid aanskou, ‘n heerlikheid soos die unieke Seun van die Vader – vol genade en waarheid.” (Joh. 1: 14))
Johannes die Doper wat gestuur is om Jesus met water te doop, het die doop van Jesus met die Heilige Gees beleef, soos deur God belowe. (“ Ook ek het Hom nie geken nie, maar Hy wat my gestuur het om met water te doop, Hy het vir my gesê, ‘Hy op wie jy die Gees sien neerdaal en bly, dit is Hy wat met die Heilige Gees doop.” En ek het gesien en getuig, “Hy is die Seun van God.” (Joh. 1: 33)). Johannes verseker ons ook dat as ons Jesus Christus aanvaar het, kan ons kinders van God word omdat ons in Sy Naam glo. (“Maar aan almal wat Hom aanvaar het, het Hy die reg gegee om kinders van God te word – hulle wat in sy Naam glo.” (Joh. 1: 12)). Ook in 1 Joh. 3: 1 vind ons die liefde van God vir ons (“Kyk watter groot liefde die Vader aan ons bewys het, dat ons kinders van God genoem kan word!”) indien ons sy woorde gehoorsaam. (“ …maar wie sy woorde gehoorsaam – in hom het die liefde van God waarlik volmaak geword,…”(1 Joh. 2: 5)). Wanneeer oons Gos se genade gawe aanvaar is dit oorvloedig ook in geloof en liefde wat ons deur Jesus Christus beleef (“Ons Here se genade oor my was oorvloedig, en daarmee saam ook nog die geloof en liefde wat daar in Christus Jesus is.”(1 Tim. 1: 14))
In Christus se eie woorde: “Net soos die Vader My liefhet, het Ek julle ook lief. Bly dan in my liefde…” (Joh. 15: 9). In Paulus se woorde vind ons die belofte dat niks ons sal kan skei van die liefde van God in sy grootste geskenk deur Christus Jesus nie (“Maar in dit alles is ons selfs meer as oorwinnaars deur Hom wat sy liefde aan ons bewys het. Ek is immers daarvan oortuig dat nóg dood, nóg lewe, nóg engele, nóg magte, nóg teenswoordige, nóg toekomstige gebeure, nóg kragte, nóg hoogte, nóg diepte, nóg enigiets anders in die skepping, ons sal kan skei van die liefde van God in Christus Jesus ons Here. ” (Rom. 8: 37-39)). Ook beskaam die hoop in die groot liefdesgeskenk wat ons herdenk in hierdie Christus-feestyd nie. (“En die hoop beskaam nie, want God se liefde is in ons harte uitgestort deur die Heilige Gees wat aan ons gegee is. ” (Rom. 5: 5)). In hierdie klein kindjie wie se geboorte ons tans herdenk is die liefde en genade van God volledig, vir die mense in wie Hy ‘n welbehae het, vasgevat (“Want so lief het God die wêreld gehad dat Hy sy unieke Seun gegee het, sodat elkeen wat in Hom glo, nie verlore sal gaan nie, maar die ewige lewe sal hê. ”(Joh. 3: 16-17)). Numeri verseker ons ook van Die Here se troue liefde (“Die Here is geduldig, en oorvloedig in troue liefde…” (Num. 14: 18)). Ons kan dus met oordadige vreugde ook soos die Psalmdigter die Here prys vir Sy troue liefde (“Prys die Here, want Hy is goed; ja ewig duur sy troue liefde” (Ps. 106: 1)). Mag God die Vader, Jesus Christus die Seun, en die gemeenskap van die Heilige Gees by julle almal wees in hierdie feestelike herdenkings-tyd (“Die genade van die Here Jesus Christus en die liefde van God en die gemeenskap van die Heilige Gees bly met julle almal”(2 Kor. 13: 13)) omdat God Hom oor ons ontferm het (“Maar God, ryk in barmhartigheid, het ons, alhoewel ons dood was as gevolg van die oortredings, op grond van sy groot liefde waarmee Hy ons liefgehad het, saam met Christus lewend gemaak – uit genade is julle verlos. (Eff. 2: 4-5)).