GEBEDSGIDS – AUGUSTUS 2026

1 Augustus – Saterdag – Winter

Here, gee my hierdie winter die begeerte om tyd vir U te maak en om rustig te word in u teenwoordigheid. Mag die koue my elke dag herinner aan U helpende hand en omgee.

2 Augustus – Sondag – Nagmaal

Here, seën ons waar ons aansit by U liefdesmaal om U Dood te herdenk deur brood en wyn aan U tafel te geniet.

3 Augustus – Maandag – Die belangrikste

In Lukas staan daar ; “die belangrikste onder julle moet soos die geringste wees en die een wat leier is, soos die een wat dien”. Help ons asseblief Heilige Gees dat ons dit sal onthou en uitoefen.

4 Augustus – Dinsdag – Ongevoelig

Here bewaar ons daarvan om ongevoelig te staan teenoor bejaardes, armes, werkloses, hongeres en dakloses.

5 Augustus – Woensdag – Helpende hand

Waar die winterkoue sy tol eis bid ek dat U my sal help om in liefde te gee en ’n helpende hand uit te steek.

6 Augustus – Donderdag – Ouderdom

Here, U is met ons op die laaste skof van ons pelgrimsreis en ons dank U vir rustigheid, vrede, wysheid en die ervaring van baie jare.

7 Augustus – Vrydag – Jeug

Ons bid dat ons jeug toegerus sal word met die wapenrusting van God en dat U ewige Woord steeds ’n lig op hulle pad en ’n lamp vir hulle voet sal wees.

8 Augustus – Saterdag – Magdalenahuis

Môre is daar ‘n spesiale offer vir die Magdalenatehuis. Kom ons gee ook mildelik, en veral waar ons môre Vrouedag vier, dink ons ook aan ongehude moeders wat deur moeilike besluite gaan.

9 Augustus – Sondag – Vrouedag

Dankie Here vir vroue en moeders wat U getrou dien op al die terreine waartoe U hulle bestem het.

10 Augustus – Maandag – Nuwe week

Here, aan die begin van die week bid ons dat Matt. 5:16 ook vir ons waar sal word, dat ons lig so voor mense sal skyn dat hulle ons goeie werke kan sien en ons Vader wat in die hemel is, sal verheerlik.

11 Augustus – Dinsdag – Die Woord van God

Here, maak ons getrou in die lees van die Bybel, getrou om daarna te luister, ywerig om dit te bestudeer en doelgerig om dit te gehoorsaam.

12 Augustus – Woensdag – Vergifnis

Here, verander my deur U Heilige Gees en gee my die seën van U vergifnis sodat ek nie môre weer met skaamte dieselfde dinge moet kom bely nie.

13 Augustus – Donderdag – Geestelike groei

Here, ek wil graag die pad van geloof en heiligmaking bewandel sodat ek meer en meer aan U, my Hemelse Vader, gelykvormig sal word.

14 Augustus – Vrydag – Die natuur

Ons wil vandag dankie kom sê dat ons woon in ’n deel van die land met ’n pragtige natuurskoon en ek bid dat elkeen sal bydra tot die bewaring daarvan.

15 Augustus – Saterdag – Die dag van die Here

Dankie Here dat U ’n dag van rus geskep het sodat ons na ’n werksweek vir ’n oomblik tot stilstand kan kom en saam met mede Jesus- volgelinge kan vergader. Laat ons dus môre U Woord noukeurig bestudeer.

16 Augustus – Sondag – Omgeebediening

Ons bydrae vandag word aangewend vir ons omgeebediening wat soveel mense bedien met bydraes van kos en bediening van die Woord van die Here.

17 Augustus – Maandag – Lig vir die wêreld

Here vul ons harte en gemoed met U vreugde en vrede, sodat ons dit elke dag kan uitstraal en vir die wêreld ’n lig kan wees.

18 Augustus – Dinsdag – Kerkraads Vergadering

Hemelse Vader, seën die bestuurskerkraad vergadering vanaand met wysheid, eenheid en onderskeidingsvermoë, sodat elke besluit tot eer van U naam en tot opbou van U Kerk sal wees.

19 Augustus – Woensdag – Kalmte en gemoedsrus

Vader, in hierdie tye van spanning en gejaagdheid is dit ons gebed dat die groen weivelde en rustige waters van Ps. 23 nie ‘n ydele droom sal wees nie maar ‘n werklikheid wat bereikbaar is.

20 Augustus – Radio Feba

FEBA-spanne werk hard om luisteraars deur persoonlike interaksie, dissipelskapprogramme en kontak met plaaslike kerke te begelei. Dit het duidelik geword dat baie gelowiges nie weet hoe om nuwe bekeerlinge te help nie. Bid dat God aan FEBA die wysheid en geleentheid sal gee om programme te ontwikkel wat hierdie behoefte aanspreek.

21 Augustus – Donderdag – Verlange na kinders

Liefdevolle Vader, baie van ons verlang na ons kinders/familie wat ver van ons woon. Beskerm hulle, hou ons harte naby mekaar en seën ons met vreugdevolle hereniging op U tyd. Help hulle ook daar waar hulle woon en werk om ‘n getuie vir U Naam te wees.

22 Augustus – Saterdag – Die Erediens

Joh. 12:35: As iemand my sien dan sien hy ook vir God wat My na die wêreld gestuur het. Here, seën die erediens môre met U teenwoordigheid, lei die leraar met elke woord en lied. Raak elke hart aan tot eer van U Naam.

23 Augustus – Sondag – Bybelverspreiding

Bid vandag vir oop harte en hande vir die mense en instansies wat Bybels vertaal en versprei. Ons bid dat die mense wat Bybels versprei veilig sal wees en dat die vertalers die regte insig in die Woord sal kry.

24 Augustus – Maandag – Geduld

Vader, gee ons die geduld om U tyd te vertrou, kalm te bly in uitdagings en met liefde en wysheid op te tree.

25 Augustus – Dinsdag – Siekes

Vandag dink ons aan almal wat siek is, dalk terminaal, en ons vra dat U liefde en omgee raakgesien sal word in die vriende wat omgee en bid vir ons siekes in ons gemeente en in ons onderskeie vriendekringe. Mag ons U Wonderdade raaksien en dankbaar U bedank.

26 Augustus – Woensdag – Jesus-gebed

“Maar Ek het vir jou gebid dat jou geloof jou nie sal begewe nie”. Gees van Genade, asseblief help my geloof, tree vir my in, bevry my sodat ek gelowig sal glo en dankbaar sal wees.

27 Augustus – Donderdag – Reën en koue

Dankie Here vir reën en koue en tyd om te lees sodat ons kan energie opgaar vir ‘n nuwe tyd van groei.

28 Augustus – Vrydag – Polisiemag

Naweke veral word daar swaar op ons polisiemag geleun om orde te handhaaf. Ons bid vandag dat U hulle sal veilig hou en sal help dat ons dorp rustig sal wees.

29 Augustus – Saterdag – Luister

Here, wanneer U praat, maak my gevoelig vir U woord en opdragte. Leer my om my volle aandag te gee en gewillig te wees om met volle vertroue U woord en rigting te volg soos U dit aandui.

30 Augustus – Sondag – Bediening aan Dowes

Dowes het ‘n unieke aanslag nodig om die Woord te verstaan en sal die bediening aan dowes ook heeltemal verskil van die normale, horende se getuienis.

31 Augustus – Maandag – Getuienisbediening

Here, daar wag ’n wêreld op my getuienis en as U vra, “Wie sal ek stuur? Wie sal ons Boodskapper wees?”, laat ons antwoord tog wees soos dié van Jesaja, “Hier is ek! Stuur my!”

Gebedsgids Augustus 2026 Laai af

26 Junie 20261 Augustus 2026

GEBEDSGIDS – JULIE 2026

Psalm 94:19
“Toe ek met baie onrus in my binneste sit, het u vertroosting my tot rus gebring.”

1 Julie – Woensdag – Volkome gehoorsaamheid

Here, ons wil U gesag en heerlikheid herken en U met blydskap dien. Lei ons in gehoorsaamheid sodat die Heilige Gees ‘n sigbare vrug in ons lewens kweek.

2 Julie – Donderdag – Ons grootste Leermeester

Dankie Vader dat U woord vir ons toeganklik is en dat ons aan U voete kan sit om U wil te soek, wysheid vir my besluite te vind en op U te vertrou op daaglikse voorsiening.

3 Julie – Vrydag – Sy lewensasem hou jou staande

Maak jou hart vandag vir Hom oop sodat Hy jou kan vul met Sy vrede en liefde. Hy wil jou omring waar jy ookal gaan. God is met jou – elke asemteug wat jy gee.

4 Julie – Saterdag – My gebed vir jou vir elke dag

Wees waaksaam en bid gedurig met volharding. Doen dit alles biddend en smeek God by elke geleentheid deur die Gees – ook wanneer dit goed gaan.

5 Julie – Sondag – Jesus is die bron van alle lewe

Ons Vader is vir ons ‘n vloeiende rivier met genade. Sy liefde vir ons is so groot soos die oseaan. Aan die Here kom al die lof toe want Hy het jou gebed gehoor.

6 Julie – Maandag – Ons ewige Rots

Vader, vul my asseblief vandag met die wysheid van U Gees. U is my rots en die vaste fondament wat nie deur vloedwaters of winde verskuif nie. U bied my ‘n onwrikbare anker in onsekere tye.

7 Julie – Dinsdag – Vrug op hulle arbeid

Here ons bid vir elkeen wat in die voorste linies van U koninkryk werk. Wees ‘n skild rondom hulle en gee hulle die wysheid om elke uitdaging die hoof te bied. Laat U Koninkryk deur hulle werke uitbrei en laat harte aangeraak word.

8 Julie – Woensdag – Ons snoer ons kragte saam vir Sy koninkryk

Vader, ons bid dat U ons gemeente en gelowiges sal saamsnoer in ‘n band van volmaakte liefde. Mag die wêreld U liefde in ons sien wanneer ons hande neem en uitreik na gemeenskappe in nood.

9 Julie – Donderdag – God los jou nooit alleen

Hemelse Vader, dankie dat U my nooit alleen los nie. Wanneer ek bang is of deur die lewe oorweldig voel, hou ek vandag aan U belofte vas.

10 Julie – Vrydag – U hulp staan vas

Here, ek ruil my swakheid vir U krag. Vul my met U Heilige Gees sodat ek nie op my eie insig hoef staat te maak nie. Gee my bomenslike krag om ‘n lig te wees vir die mense rondom my wat in die donker sit.

11 Julie – Saterdag – Ek vertrou op U onfeilbare liefde

U grenslose genade en U onvoorwaardelike liefde is die hoeksteen van my lewe, ‘n stewige fondament te midde van die skuiwende sand van hierdie wêreld. Ek juig omdat U my gered het (Psalm 13:6).

12 Julie – Sondag – Net U kan die storm stilmaak

Here, U ken die storms wat binne ons woed. Ons bid vandag vir elkeen wie se eie gedagtes teen hulle gedraai het. Vir diegene wat vasgevang is in die donkerte van angs of verwarring. Wees U die anker en bring stilte in hul gees.

13 Julie – Maandag – Vrede bo omstandighede

Here, ons bid vir die mense wat elke dag moet oorlof in die oorlog geteisterde lande. Hulle beleef uitmergelende konflik en is voltyds afhanklik van humanitêre hulp. Laat U lig skyn in die skaduwee van die dood.

14 Julie – Dinsdag – Verbly jou in God

Hemelse Vader, dankie dat U ons Koning is en dat U Heerskappy naby ons is. Help ons om U wil bo ons eie te soek en ‘n instrument van U liefde en vrede te wees.

15 Julie – Woensdag – Radikale liefde vir elkeen

Here, U opdrag aan ons was liefde vir God en liefde vir ons naaste. U het ook die grense verskuif om almal in te sluit – selfs diegene wat anders is as ons – selfs ook die vyande.

16 Julie – Donderdag – Swaard van die Gees

Jesus, maak my vandag arm van gees sodat ek net van U afhanklik sal wees. Die Gees wat U ons gegee het, vul ons met krag en liefde en selfbeheersing. Vul my hart met sagmoedigheid en ‘n honger na dit wat reg is.

17 Julie – Vrydag – Hoop en Ewige Lewe

Jesus se boodskap is dat die dood en die donkerte nie die laaste sê het nie. Deur Sy opstanding het Hy die lewe oorwin. Dit gee ons die hoop dat ons ‘n ewige toekoms saam met Hom het.

18 Julie – Saterdag – Sy Koninkryk vir almal

Ons vra vir U vertroosting, nie net vir onsself nie, maar ook vir diegene wat verlore en belas voel deur die gewig van bekommernisse. U is altyd naby om oor ons te waak met liefde en deernis.

19 Julie – Sondag – Sout en Lig

Here, U sê ek is die sout en die lig vir die wêreld. Help my om só te leef dat ander dit kan sien. Laat my woorde smaak gee en my dade U lig versprei sodat mense U sal aanbid.

20 Julie – Maandag – Ons kinders is uniek

Vader, seën ons kinders en gee hulle wysheid om hulle beste te doen. Beskerm hulle harte teen bekommernis en help hulle om soos U lig tussen hulle maats te wees.

21 Julie – Dinsdag – My Stuurman

Vader, ek kies om my in U te verbly. My situasie is dalk nie perfek nie, maar U liefde en getrouheid sal nooit faal nie. Ek kies om dankbaar te wees omdat U my weg bepaal.

22 Julie – Woensdag – Sy aanraking is oorvloedig

Hemelse Vader, U is die Groot Geneesheer. Ons bid vir verligting vir pyn en herstel vir die liggaam. U genees die gebrokenes van hart en verbind hulle wonde. Seën ook diegene wat hulle versorg en rus hulle toe met wysheid en geduld.

23 Julie – Donderdag – Hy is ons metgesel in pyn

Jesus, U ken die hart van die gebrokenes – U het self swaarkry en verwerping ervaar. Help ons om nooit moed te verloor nie, want U gee nie moed op met ons nie.

24 Julie – Vrydag – Die waarborg van ‘n ewige lewe

Jesus, ons jubel omdat die graf U nie kon vashou nie! U het die dood oorwin en opgestaan as die Ewige Oorwinnaar. Alle mag in die hemel en op die aarde behoort aan U.

25 Julie – Saterdag – Christus het die grondslag gelê

Ons kyk op na U, ons Koning wat regeer. Dankie dat U vir ons intree en dat u teenwoordigheid ons die krag gee om elke dag in volheid en oorwinning te leef. Onderrig ons om soos U te wees – ‘n hart wat sag en gewillig is.

26 Julie – Sondag – My doelwit is die Koninkryk

Vader, ons wedloop gaan nie oor wêreldse rykdom of status nie, maar oor u Koninkryk. Rig my voete op die smal pad en vul my hart met die ewige skatte wat saak maak vir U.

27 Julie – Maandag – Wees ‘n vredemaker in konflik

Heilige Gees, maak my ‘n instrument van U vrede. Waar daar konflik of verdeeldheid in my familie, werkplek of gemeenskap is, help my om versoening te bring. Seën my met die wysheid en geduld wat nodig is om mense bymekaar te bring.

28 Julie – Dinsdag – U lig vervaag nooit

Hemelse Vader, wanneer my lamp vervaag, bid ek vir krag om te doen wat reg is, sodat my dade U lig weerkaats en ander lei om U te prys. Mag my daaglikse lewe ‘n getuienis wees van U genade en waarheid.

29 Julie – Woensdag – Hoop en Ewige Lewe

Jesus se boodskap is dat die dood en die donkerte nie die laaste sê het nie. Deur Sy opstanding het Hy bewys dat lewe oorwin. Dit gee ons hoop dat geen situasie op aarde ooit heeltemal verlore is nie, en dat ons ‘n ewige toekoms saam met Hom het.

30 Julie – Donderdag – Laat U lig skyn in die skaduwee van die dood

Here, ons bid vir die mense in oorlog geteisterde lande. Hulle is moontlik sonder skuiling, sonder kos en bo alles, sonder hoop wanneer alles rondom hulle in puin lê. Ons bid onoophoudelik vir ‘n einde aan die geweld.

31 Julie – Toevlugsoord vir elkeen

Ons dank U vir ons gemeenskap hier in Groot-Brakrivier Here. Ons wil ‘n veilige hawe wees vir die vreemdeling en ‘n genesende toevlugsoord vir die gebrokenes. Mag ons kerk ‘n baken van U onvoorwaardelike liefde wees.

Gebedsgids Julie 2026 Laai af

28 Mei 202622 Julie 2026

GEBEDSGIDS – JUNIE 2026

Verbly julle in die hoop; wees geduldig in die verdrukking; volhard in die gebed.
Rom. 12:12

1 Junie – Maandag – Polisiemag

Ons dra vandag elke polisielid aan U op en vra U hand van bewaring oor hul lewe en hul gees. Gee dat hul familie sal weet dat U ook daar by hulle sal wees en bedank ons U dat U na hulle omsien, soos hulle na ons welsyn omsien.

2 Junie – Dinsdag – Leraars

Ons vra vandag dat U ons leraars bystaan en vir hulle die Woord oopbreek sodat hulle insig sal hê rondom U boodskap en U wil en dat hulle dit met die regte insig sal oordra.

3 Junie – Woensdag – Siekes

Ons bid vandag vir alle siek mense en allerhande soorte siektes van ons tyd en bid dat hulle die nodige geduld sal hê om dit te hanteer en ook bid ons vir U genesende hand oor elkeen.

4 Junie – Donderdag – Sosiale media

Ons bid vandag dat mense sosiale media nie sal misbruik nie of dalk heeldag dit doen en heeltemal vergeet om tyd saam met Jesus deur te bring nie.

5 Junie – Vrydag – Gaan uit en vertel!

Jesus self gee vir ons instruksies. Hy belowe dat Hy die Heilige Gees opdrag sal gee om woorde in ons mond te lê as ons getuig. Luk. 21:12-15.

6 Junie – Saterdag – Innovation for the Blind

Ons dank u, Vader, dat ons kan sien. Môre is daar ‘n spesiale offer en vra ons U dat U die bydraes van die gemeente sal seën vir hierdie verdienstelike beweging.

7 Junie – Sondag – Biddag vir die blindes

“Vader, ons kom dank U dat ons geseënd is om te kan sien. Ons bid vir mense wat nie kan sien nie of moeilik kan sien en ons kom dra hulle nood aan U op en vra dat U hulp sal stuur.”

8 Junie – Maandag – Sendingwerk

Ons bid vir ons sendingwerkers wêreldwyd wat onverpoos die Here se woord en liefde verkondig. Ons bid dat hulle die nodige geldelike ondersteuning sal kry, maar ook geestelik nie afgemat sal word nie.

9 Junie – Dinsdag – Finansies

“Here, Ons bring ons finansies na U. Help ons om dit aan te wend met die nodige sorg en ons vra U seën op ons handewerk, sodat ons ons families kan versorg, maar gee ons ook die moed om U werk met ons tiende te seën.”

10 Junie – Woensdag – God se liefde

Wie kan ons van die liefde van Christus skei? “Vader, U is daar vir ons en het vir die Israeliete in die woestyn versorg en U beloof dat U ook nou na ons sal omsien. Vader, ons dank U daarvoor.” (Rom. 8:35).

11 Junie – Donderdag – Ongelowige vriende

Nie almal is ‘n gelowige nie en vra ons dat ons gebed sal wees vir vriende wat nie glo nie en dat Jesus en die Gees ons sal lei om met ons optrede en woorde hulle na Jesus sal lei. Ons vra ook dat ons Jesus se skild teen die aanslae van die vyand sal gebruik.

12 Junie – Vrydag – Offer vir Jeugwerk Sondag

Ons vra vandag dat U die gemeente se harte en hande sal oopmaak vir die bydrae vir die jeug op Sondag en dat die fondse op die regte plekke aangewend sal word.

13 Junie – Saterdag – Biddag vir Jeug en Kategese

Môre is dit biddag vir die jeug en vir kategese en vra ons, Here, dat u met ons jeug sal wees en vra ons ook dat hulle getrou die kategese sal bywoon en so meer van u kan leer en dat hulle getroue apostels van U sal raak.

14 Junie – Sondag – Vadersdag

Ons kom sê vandag dankie vir pappas en instaan pappas en vir die leiding wat hulle in hulle gesinne bied. Praat met hulle harte Here, en lei hulle om ‘n voorbeeld en steunpilaar vir hulle families te kan wees.

15 Junie – Maandag – Kinders

Vader, ons bid vir ons kinders in Suid-Afrika en ons vra dat waar hulle vandag n ekstra afdag het, dat U die rus vir hulle sal seën en dat hulle uitgerus weer met nuwe krag hul skooltake sal aanpak op Woensdag.

16 Junie – Dinsdag – Jeugdag

Here, ons bid vandag vir ons Jeug en dat hulle by die regte mense sal uitkom wat in ‘n leiersposisie vir hulle die regte leiding sal gee om respekvolle grootmense te wees.

17 Junie – Woensdag – VADER

Dankie Vader vir U groot genade dat ons U ons Vader mag noem. Ons wil u Naam verheerlik oor die hele aarde en vertel van U groot mag en krag en U wonderlike Liefde vir die mens.

18 Junie – Donderdag – My vrese en drome

“Here, U ken my vrese en drome. Ek kom lê nou my vrese voor U voete neer en vra ek dat U dit sal wegneem en my drome in lyn met U wil bring sodat ander daardeur bemoedig sal word en nader aan U sal kom.”

19 Junie – Vrydag – Is jy reg?

Is daar genoeg olie in jou lampie vir die Bruidegom se koms? Ons bid Heer dat U ons sondes sal vergewe en dat ons reg sal wees vir U koms.

20 Junie – Saterdag – Leiers

“Vader, daar is baie leiers om ons. Leiers in die skool, kerk, dorp, land en in die wêreld. Hulle besluite raak ‘n klomp mense om hulle en Vader ons bid dat hulle genoeg goeie oordeel aan die dag sal lê en dat hulle met insig en kennis hul besluite sal neem en uitvoer.”

21 Junie – Sondag – Jan Kriel-Instituut

Ons bid vir ons mense in die Jan Kriel-instituut wat baie afhanklik is van donasies om die nodige sorg aan die inwoners te verleen. Ons bid dat U die bydraes sal seën en dat dit tot groot seën vir die Instituut sal wees.

22 Junie – Maandag – Afhanklikheid van middels

“Here, die lewe is deurmekaar en is baie mense soekend en kom by verkeerde plekke en dinge uit. Ons bid, Vader, verlos die kettings van middel-afhanklikheid van dié wat daaronder gebuk gaan en bevry hulle sodat hulle in U sorg en Lig sal lewe.”

23 Junie – Dinsdag – Mense wat vervolg word

“Jesus, Ons vra dat U met ons mede-broers en -susters in die geloof in vervolgde lande sal wees, waar hulle nie openlik kan bid of oor U kan gesels en getuig van U hulp en liefde nie.”

24 Junie – Woensdag – Mediese personeel

Baie dankie, Heer, vir dokters en ander mediese personeel wat na die siekes omsien. Hulle moet heeldag op en wakker wees en wil ons vra dat U hulle werk sal seën, maar dat hulle ook met die nodige empatie hul werk sal verrig en dat die mens belangriker as geld sal wees.

25 Junie – Donderdag – Familiebande

Kom ons bid vandag vir ons families en familiebande wat maklik kan versuur. Bid dat daar eenheid in die families en huise sal heers en dat families ’n voorbeeld van U liefde sal najaag en uitleef.

26 Junie – Vrydag – Skoolvakansie

“Vader, ons bid dat U die leerkragte sal seën met rus of ook hul sal seën waar hulle op die paaie gaan om sport by te woon of te bestuur. Ons bid ook, Vader, dat U ons kinders sal vashou in U Hand en hulle sal bystaan en rus sal verleen.

27 Junie – Saterdag – Gemeentebediening

Ons gemeente het baie nood en vra dat die getuienisbediening moet uitreik en help met die nodige asook die Boodskap van hoop. Ons bid dat daar altyd genoeg voorraad in die “kaste” van die kerk sal wees om die hoop te versprei.

28 Junie – Sondag – Ondersteuningsbediening

“Here, soos hierbo ook genoem, help ons gemeente om die nood raak te sien en mildelik te gee waar hulle sien nood bestaan. Laat hulle bydraes ook by die regte persone uitkom om so ook tot opbou van die gemeente te wees.

29 Junie – Maandag – Radio Feba

Die Radio word gebruik om uitreike te doen. Ons bid ook dat die Goeie Nuus Boodskap by almal sal uitkom en in ‘n goeie gees ontvang sal word en dat hulle so tot bekering sal kom.

30 Junie – Dinsdag – Besluite

Liewe Vader, ek wil nie net besluite neem en my kop stamp nie. Laat ek volgens U wil bid en in U spoor loop sodat ek die regte optrede aan die dag sal lê en so U Naam verheerlik.

Gebedsgids Junie 2026 Laai af

21 April 202630 Mei 2026

GEBEDSGIDS – MEI 2026

1 Mei – Vrydag – God is jou Werkgewer

Vader, dankie vir diegene wat nog werk en ons vra U vrede en wysheid in die werksplek om uitnemendheid en integriteit te handhaaf. Lei ons gedagtes sodat ons ‘n lig vir U kan wees.

2 Mei – Saterdag – Gemeentefees

Here, dankie vir hierdie spesiale dag van feesvieringe. Seën almal wat saamwerk en deelneem, en laat hierdie fees ‘n getuienis wees van U liefde en genade en ‘n tyd van vreugde, vernuwing en versterking vir ons geloofsgemeenskap.

3 Mei – Sondag – Arbeidsbediening

Vader, ons dank U vir die arbeiders in U wingerd. Ons bid vir krag, wysheid en vreugde vir elke vrywilliger. Mag hulle arbeid nie tevergeefs wees nie en lei hulle pogings om vrugte te dra vir u koninkryk.

4 Mei – Maandag – Op watter fondament is jou lewe gebou

Vader, ek vra dat U my lewe, my gedagtes en my hart stewig op U gevestig sal hou. Suiwer my, vul my met U Gees en gee my die krag om standvastig in geloof en geregtigheid te bly.

5 Mei – Dinsdag – Word ‘n medewerker van God

Hemelse Vader, maak my diensbaar as medewerker in U koninkryk. Vul my met U Heilige Gees sodat ek met wysheid en liefde kan optree. Laat my woorde en dade ‘n getuienis wees van die Evangelie van Jesus Christus.

6 Mei – Woensdag – Ligdraers by Blokbyeenkomste

Mag ons ligdraers wees, mekaar se laste dra en U liefde weerspieël in ons lewe. Ons bid vir veiligheid, genesing en dat U ons sal lei om ‘n bron van hoop vir mekaar te wees.

7 Mei – Donderdag – Hardloop die wedloop tot Sy eer

Hemelse Vader, dankie dat U my gekies het om hierdie wedren tot U eer te hardloop. Gee my die krag om te kan volhard, en help my om die oog gevestig te hou op Jesus. Ek sal hardloop sodat U daardeur verheerlik word.

8 Mei – Vrydag – Ek verkies om die Here te vertrou

Here, selfs wanneer ek nie my pad verstaan nie, kies ek om U te vertrou. Lei my voetspore en help my om getrou te bly waar U my vandag geplaas het.

9 Mei – Saterdag – Maak net staat op God se wonderbare krag

Vader, ons bid vir ons mediese- en ondersteuningspersoneel vir ekstra wysheid, insig en krag in hul uitdagende werk. Beskerm hulle fisies en geestelik, en mag hulle U liefdevolle hand in hul daaglikse sorg vir pasiënte ervaar.

10 Mei – Sondag – Moedersdag – Jy oortref hulle almal

Alles aan jou spreek van ‘n edel persoon en ken geen kommer oor die toekoms nie. As jy praat, is dit met wysheid; as jy leiding gee, is dit met liefde. Jou kinders prys jou, jou man bewonder jou. Daar is baie knap vrouens, maar jy, vriendin, oortref hulle almal!

11 Mei – Maandag – Ons getroue Herders

Vader, ons bid vir ons Predikante en Leraars en is dankbaar vir hulle toewyding om U Woord te verkondig. Here, vul hulle opnuut met U Heilige Gees. Gee hulle krag, wysheid en insig om die Skrif met gesag en waarheid te bring.

12 Mei – Dinsdag – Bedieningsraad Vergadering

Here, ons dank U vir hierdie gemeente se leiers wat U geroep het om te dien. Onderrig hulle met wysheid en insig om goeie besluite te neem. Bind hulle saam in liefde en eenheid sodat hulle saam kan werk tot die uitbreiding van U koninkryk.

13 Mei – Woensdag – Saam met God is jy nooit alleen

Hemelse Vader, ons bid vir diegene wat alleen en eensaam is. Troos hulle en herinner hulle aan U konstante teenwoordigheid en vul hul harte met U liefde. Mag hulle U nabyheid ervaar en rustigheid kry met hul emosies.

14 Mei – Donderdag – Verheerlikte Christus

Vader, dankie vir die Hemelvaart van u Seun, Jesus Christus. Ons vier sy oorwinning. Vul ons met die Heilige Gees en bemagtig ons om U liefde in die wêreld te versprei. Amen.

15 Mei – Vrydag – U is ons Anker wat ons nooit los nie

Vader, ek bely elke dag dat U my Here en my God is en ek weet dat niks my kan skei van U liefde nie. U neem seer weg, U vee trane af, U maak gebroke harte weer heel. U was ons weer skoon en U gee ons ‘n fontein van lewende waters.

16 Mei – Saterdag – God keur geweld ten sterkste af

Here, ons bid U om genade te betoon en lewens te spaar in elke oorlog geteisterde streek. Ons vra dat U die harte van leiers sal versag en hulle tot geregtigheid sal bring.

17 Mei – Sondag – Lei ons in die volle waarheid

O Heilige Gees, dankie dat U op Pinksterdag uitgestort is en vandag nog in ons harte woon. Kom vul ons opnuut met U krag en lei ons in die volle waarheid. Laat U lig in ons lewens skyn en maak van ons harte U woning.

18 Mei – Maandag – Vlekkeloos voor U

In hierdie Pinkstertyd bid ons dat U Gees opnuut deur ons sal waai. Kom reinig ons harte en vernuwe ons denke. Skenk aan ons die gawes wat nodig is om U koninkryk te bou en gee ons ‘n passie vir die evangelie, krag om te getuig, en liefde vir mekaar.

19 Mei – Dinsdag – As ons in eenheid saamwerk

Almagtige Vader, ons bid dat U Gees in ons sal werk sodat ons as gemeente nader aan U getrek sal word. Ons bid om met nuwe ywer en krag U getuies te wees.

20 Mei – Woensdag – Suiwer julle harte

Vader, mag U Heilige Gees wat met krag gekom het, vandag weer opnuut in ons harte werk en bid dat die saad van U Woord in goeie grond sal val en vrug dra.

21 Mei – Donderdag – Hou aan Sy vreugde vas

Vader, dankie dat U my voortdurende toegang tot U teenwoordigheid gee. Vul my met U vreugde en vrede sodat ek deur die krag van die Heilige Gees kan leef.

22 Mei – Vrydag – Leer my hoe om te dien

Here, ek wil nooit vergeet wat my doel op aarde is nie. Open my oë vir elke geleentheid om te dien, en verwyder uit my hart enige selfsugtige begeerte vir eie belang.

23 Mei – Saterdag – U is my weg

Vader, wanneer ek nie die pad vorentoe sien nie, weet ek dat U my gids is. Ek onderwerp my gedagtes, my planne en my vrese aan U. Voor U lig sal duisternis vlug.

24 Mei – Sondag – Pinksterfees – U goedheid het geen perke nie

Vader, U voed my met ewigheidskos, U bied my die lewende water en in tye van nood bring U redding. Dankie vir U hand wat reeds daar is wanneer ek val.

25 Mei – Maandag – U is ‘n God van beloftes

Laat my oë vandag U goedheid raaksien en my geloof sterker wees as my twyfel. Ek kies om nie in vrees te leef nie, maar om vas te hou aan U beloftes.

26 Mei – Dinsdag – Laat God toe om te snoei

Vader, ek wil U in die snoeitye van my lewe vertrou. Dit wat nie meer lewe gee nie moet ek laat gaan. Ek wil in U bly sodat U my kan vorm sodat ek beter vrug kan dra.

27 Mei – Woensdag – Ons wil net op U fokus

Ons dank U Vader dat ons as gemeentelede saam U Woord kan deel. Gee ons wysheid en insig sodat alles wat ons bespreek tot eer van U naam sal wees.

28 Mei – Donderdag – U genade is onfeilbaar

Hemelse Vader, kom seën elkeen wat ‘n behoefte het aan genesing en herstel. Vertroos die wat teleurstellings ervaar en diegene wat geliefdes aan die dood moes afstaan.

29 Mei – Vrydag – U is die lig van my lewe

Jesus, dankie dat ons U kan liefhê. Ek wil naby U leef en nooit vergeet wie ek in U is nie. Help my om deur my lewe U liefde uit te straal en ander die weg na U te wys.

30 Mei – Saterdag – Draers van ‘n Goddelike Skat

Die lig van die evangelie is God se skat wat in ons gedra word. Ewige waarde wat nie gekoop word nie, maar deur God self geskenk word. Dra jou Skat met dankbaarheid, koester dit en leef dit waardig.

31 Mei – Sondag – Dit het Hom diep gegrief

Vergewe ons Here dat ons as aardbewoners U skepping benadeel en verwoes. Dit is kommerwekkend om te sien hoeveel vlugtelinge angstig talle landsgrense oorsteek op soek na voedsel en water. Ons bid vir U genade.

Gebedsgids Mei 2026 Laai af

28 Maart 20262 Mei 2026

Gebedsgids vir April 2026

“Waar 2 of meer is, daar is Ek”

Woensdag, 1 April – Lydensweek

Die groot Lydensweek nader sy klimaks en ons is dankbaar dat U die pad van lyding, pyn en vernedering, ja, selfs Godverlatenheid en uiteindelik die dood vir die wêreld en ook vir my gestap het.

Donderdag, 2 April – Voete was

“Vader, op hierdie Donderdag het U die dissipels se voete gewas en my gebed is dat U my ook nederig sal hou in diens van my medemens.”

Vrydag, 3 April – Volmaakte Voorbeeld

Here, ek kyk na die kruis en sien die volmaakte voorbeeld van liefde en vergifnis en ek bid dat ek ook bereid sal wees om my lewe opnuut aan U diens te wy.

Saterdag, 4 April – Stil Saterdag

Op hierdie stil Saterdag wag ons met opgewondenheid ,want ons weet, U gaan die dood oorwin!

Sondag, 5 April – Opstandingsfeesdag

Here, Ons harte juig op hierdie opstandingsfeesdag . Dankie vir die dag waarop U die dood oorwin het en uit die graf opgestaan het sodat ons sonder vrees die toekoms tegemoet kan gaan.

Maandag, 6 April – Aardse Huisgesin

Dankie here dat ons vandag weer kan besef dat u ons deel gemaak het van ‘n aardse huisgesin en ons gebed is dat dit ‘n voorspel sal wees tot ons ewige verblyf.

Dinsdag, 7 April – Seëninge

Ek kyk rondom my Here en ek besef dat ek soveel het om voor dankbaar te wees, meer as baie ander. Dankie dat U my so seën.

Woensdag, 8 April – Jeug

Here, met die skole wat vandag open, bid ons vir ons jeug se verstandelike groei, hulle liggaamlike ontwikkeling, maar ook vir hulle geestelike ontluiking tot vrugbare volwassenheid.

Donderdag, 9 April – Sinvolle lewe

Dankie Here dat U tot in my ouderdom daar is vir my. Dankie dat u my steeds dra en my gebed is dat ek steeds sinvol en vreugdevol sal lewe in U teenwoordigheid.

Vrydag, 10 April – Nuwe moontlikhede

Dankie Here vir n nuwe dag met nuwe uitdagings, maar ook met nuwe geleenthede en moontlikhede. Dankie dat ons kan behoort aan ‘n huisgesin, ‘n gemeenskap, ‘n gemeente maar veral aan U, ons hemelse Vader.

Saterdag, 11 April – Gholfdag

Waar dit vandag ons gholfdag is, dank ons U vir gesondheid en liggaamskragte en bid ons dat ons in oorwinning en nederlaag ‘n sportmens vir Christus sal wees.

Sondag, 12 April – Verpleegkundiges

Vandag dra ons die hele spektrum van verpleegkundiges aan U op en bid dat hulle met sagte harte en deernisvolle oë na elke pasiënt sal omsien.

Maandag, 13 April – Besig

Aan die begin van ‘n nuwe week is ons gebed dat ons nie so besig sal raak met groot dinge dat ons mag vergeet van klein geleenthede en pligte nie : simpatie, liefde, belangstelling en hulp.

Dinsdag, 14 April – Eensames

Vader, ons aanbid U vandag as die Vriend van die eensames, die Trooster van die treurendes en die Hoop van die sterwendes. In U is alles wat ons nodig het vir vandag en vir altyd.

Woensdag, 15 April – Goeie daad

Here, mag ons aan die einde van hierdie dag terugkyk en dankie sê die elke vriendelike gebaar wat ons aan ander kon betoon, elke goeie daad wat ons kon doen en elke versoeking wat ons kon weerstaan.

Donderdag, 16 April – Heilige Gees versterk my

Ek skaam my, Here, vir die hoenderhaan wat so gereeld in my ore kraai. Heilige Gees, Versterk my om in alle omstandighede ‘n getuie vir U te wees.

Vrydag, 17 April – God-by-ons

U is God-by-ons. Dankie dat U aan ons U Gees gegee het om by ons te wees. Ek is nooit alleen nie.

Saterdag, 18 April – God se Wil

U is nie van ons instemming afhanklik nie. U doen wat U weet goed en reg is vir U kinders. Ons loof U daarvoor. Al verstaan ons U so dikwels verkeerd. U Wil is altyd tot ons beswil.

Sondag, 19 April – Radio FEBA

FEBA radio verkondig die goeie boodskap aan die uithoeke van die wêreld. Here, seën hulle werk in U Naam. Asseblief, behoed en bewaar almal wat betrokke is.

Maandag, 20 April – Skynheiligheid

Hoe maklik verval ons in skynheiligheid Here! Bekeer my elke dag tot U wil. Maak my getrou om ;n getuie vir Jesus by ander te wees.

Dinsdag, 21 April – My gedagtes

Here, my verhouding met U maak my skatryk. Rig my gedagtes voortdurend op U sodat my gedagtes vernuwe mag bly.

Woensdag, 22 April – Blokbyeenkoms

Op Woensdae is dit blokbyeenkomsdag in ons gemeente. O Here, hoe bevoorreg is ons om saam te mag kom tot U eer.

Donderdag, 23 April – Singende gemeente

Ons dank U vir die klenk van die orrel, vir die lofsingende gemeente en vir begaafde gelowiges. Dankie dat U die blêrstem van elke verlore skaap hoor bo al die lofliedere van verlostes.

Vrydag, 24 April – Here se Liefde

Ek wil die Here prys! Want aan Sy Liefde is daar geen einde nie!

Saterdag, 25 April – Ons Land

Here, ons bid vir die Land waarin ons woon. Dit is ‘n pragtige land wat ons ryklik voorsien. Ons kon egter nog nooit sonder U genade nie. Dankie Liewe Heer.

Sondag, 26 April – Sondag

Here God, Dit is vandag Sondag. Hierdie dag het U geskep sodat ons kan rus in U en ons kan weer ons kragte by U voete kom opbou. Ontvang ons Lof en Eer aan U, Heer.

Maandag, 27 April – Vryheidsdag

Genadiglike Heer, ons lewe deur U gees. Laat die Gees nou ook ons gedrag bepaal en help ons om alle kulture te verstaan en in vrede saam te leef.

Dinsdag, 28 April – Vriendskap

Vandag bring ons ‘n groot dankie vir familie, vriende en bure. Dankie vir hul vriendskap, omgee en aanvaarding. Seën hulle ook sodat hul nooit sal moeg word om uit te reik en om te gee nie.

Woensdag, 29 April – Ons gemeente

Ons bid vandag vir ons gemeente , ons dorp en ook ons land. Help ons, Here, as U koninkrykskinders, om diensbaar te wees en ons land en dorp op te pas.

Donderdag, 30 April – Wederkoms

Here Jesus, wat ‘n troos om te weet dat U weer sal kom om ons te kom haal, ons te kom heelmaak en ons aanvaar net soos ons is. Dit alles is net genade en Liefde. Ons prys U wonderlike Naam!!

Gebedsgids April 2026 Laai af…

8 Maart 20261 April 2026

Wêreldbiddag vir Vroue 2026

Wêreldbiddag vir Vroue Groot-Brakrivier 6 Maart 2026 – Nigerië: “Kom, Ek sal julle rus gee!”

Die Wêreldbidddag vir Vroue 2026, wat by St John’s Anglikaanse Kerk in Groot-Brakrivier aangebied is, op 6 Maart 2026, was ‘n goeie, en verreikende geleentheid.

Die Vroue van die gasheer kerk het alles in ‘n Gees van samehorigheid aangebied. Die boodskap is gebring deur Ds. Lilian Reynecke, predikant van Searle Memorial Kerk. Al die vroue van die verskillende denominasies het saam gedeel en gesing tot eer en verheerliking van dié God wat ons almal aanbid.

Ons kom almal van Afrika en daar is ‘n band met ander Afrikane, omdat die opstellers van hierdie jaar se WWBD program van Nigerië is het dit ook persoonlik met ons elkeen geresoneer. Dis ons mense en ons ken hulle uitdagings.

Lees meer

1 Maart 20264 April 2026

GEBEDSGIDS Maart 2026 NG Kerk Groot-Brakrivier

Gebed verander alles. Moenie angstig wees nie. Bid tot God.

As God vir ons is, wie kan teen ons wees.

1 Maart – Sondag – Teologiese Kweekskool

Ons bid vandag in die besonder vir die kweekskool wat opkomende dominees leer om die Woord te versprei en reg oor te dra. Ons offer by die deure is ook vandag spesifiek om hul bediening en opleiding te help.

Lees meer

10 Januarie 202621 Februarie 2026

Kom bid saam met die Ring van Mosselbaai vir die brande

Ring van Mosselbaai Bid saam vir die Brande NGK Groot-Brakrivier

Die Ring van Mosselbaai, waarvan ons gemeente deel is, het Sondag 11 Januarie 2026 om 18:00 saamgekom om te bid by die ATKV Amfiteater.

Die Ring het reeds ook n noodfonds. Indien enigeen n skenking ten behoewe van die brandslagoffers wil maak, is die bankbesonderhede op die foto beskikbaar.

Vir enige skenkings:
NGK Brandwag
(Ring Noodfonds)
ABSA Mosselbaai
Tjek:
207 058 0007
Verwysing: Noodfonds

Ons medelye aan die mense wie deur die brand geraak is, sowel as hul families en vriende.

1 Januarie 20261 April 2026

Wêreldbiddag vir Vroue 6 Maart 2026 – Nigerië: “Kom, Ek sal julle rus gee!”

artwork 2026 rest for the weary by gift amarachi ottah WDPIC 2026

“Kom, Ek sal julle rus gee”

Matteus 11:28-30
6 Maart 2026

Wêreldbiddag vir Vroue Groot-Brakrivier
Plek: St. Johns Kerk (Oorkant die kliniek)
Datum: 6 Maart 2025
Tyd: 16:00

Wêreld Biddag Groot-Brakrivier 6 Maart 2026 St. John Anglikaanse Kerk 16:00 — Wêreld Biddag Groot-Brakrivier 6 Maart 2026 16:00 St. John’s Anglikaanse kerk

Agtergrond Wêreldbiddag vir vroue 2026: Nigerië

Geïnspireer deur Matteus 11:28-30, rig die Nigeriese komitee vir die 2026 Wêreldbiddag ‘n wêreldwye uitnodiging om vertroosting in God te vind. Hulle verwoord ‘n diepgaande begrip van rus, geraam deur die lens van hedendaagse laste soos sistemiese onderdrukking, vervolging en wanhoop. Hierdie perspektief beweeg verder as fisiese verligting om ‘n rus te bevorder wat genees en transformeer deur genade en gemeenskaplike sorg.

Diep gewortel in die Nigeriese kultuur, gebruik die viering resonante simbole; die kalbasbak word byvoorbeeld ‘n metafoor vir hoe God voorsien in beide ons tasbare en geestelike honger. Die bydraes van hierdie vroue verweef plaaslike wysheid met ‘n universele oproep om ons swaarste laste neer te lê, daar waar God ons in ons moegheid ontmoet.

Lees meer

29 Desember 20251 Februarie 2026

Gebedsgids vir elke dag van Januarie 2026

1 Januarie – Donderdag – Ek sal julle nooit verlaat nie

Hemelse vader, sal U ‘n helder vlam voor my wees, sal U die sterrewyser bo my wees en sal U ‘n gelyke pad onder wees. My goeie Herder – vandag, vanaand en vir altyd.

Lees meer

29 November 20251 Januarie 2026

Gebedsgids Desember 2025

1 Desember – Maandag – Droogte

Jesus, U weet hoe droog dit in ons land is en hoe swaar die boere kry, maar ook die veld en vee. Gee U lewegewende water vir mens en dier en loof ons U vir U wonderlike gawe van Reën.

2 Desember – Dinsdag – Polisie

Die polisiemag is nou nog meer paraat tydens die feestyd en dra ons hulle en hul families aan die Here op vir leiding en gesondheid.

3 Desember- Woensdag – Eensaamheid

Mense kuier gedurende die feestyd by familie en vriende en dink ons vandag aan al die eensames wie nie meer familie het nie, of dalk nooit by hul familie besoek aflê nie en eensaam is tydens die kersseisoen.

4 Desember – Donderdag – Radio FEBA

Ons vra vandag Here dat U sal help met die uitreike en uitsaai boodskappe wat Radio FEBA se span behartig om U woord uit te dra en mag ons vra dat U boodskap by die onbereiktes sal uitkom.

5 Desember – Vrydag – Geestesgesondheid

Jesus, depressie en verwante siektes is iets wat al hoe meer voorkom. Gee asseblief dat die persoon wat hieraan lei hulp sal soek op die regte plek en by die regte persone.

6 Desember – Saterdag – Stranddiensspanne

Here, help die stranddiensspanne wat besig is om U Woord ook uit te dra tydens die feestyd en dan veral met pret en plesier op die strande. Mag U woord op vrugbare grond val.

7 Desember – Sondag – BADISA

Vandag is ons offer vir BADISA en vra ons dat die kerkgangers mildelik sal bydra ter ondersteuning van hierdie werk in die NG kerk.

8 Desember – Maandag – Verheerlik die Vader

Vader, ek wil U elke dag Verheerlik.

9 Desember – Dinsdag – Geloof

Wat help dit as iemand beweer dat hy glo, maar sy dade wys dit nie? Bid dat ons dade by ons woorde pas om ander na die Here te lei.

10 Desember – Woensdag – Skole sluit

Dankie Vader vir nog ‘n jaar. Gaan asseblief met die leerders en leerkragte gedurende die heerlike vakansie en gee dat hulle sal uitrus om weer met nuwe ywer die nuwe jaar aan te pak.

11 Desember – Donderdag – Middelafhanklikheid

Ons dink vandag aan persone wat verslaaf is aan een of ander middel en bid dat die Vader deur Sy troue liefde, die persone sal help om weg te beweeg en hulp te ontvang.

12 Desember – Vrydag – Liefde

Vader, baie dankie vir U troue liefde. Gee dat ons ook liefde aan onsself en medemens bewys.

13 Desember – Saterdag – Sport

Here, Baie dankie vir die wonderlike gawe wat u aan ons sportmanne en vroue gee. Gee dat hulle hul sport so speel tot eer en verheerliking van U.

14 Desember – Sondag – Gemeente-Instandhoudingsfonds

Ons gee vandag ’n bydrae vir ons kerk se instandhouding. Ons bid dat die persone in beheer die nood sal aanspreek en die geld reg sal aanwend.

15 Desember – Maandag – Sending

Kom ons reik uit en raak betrokke by die sendingaksies, geldelik, deur gebed en dalk hulp waar jul kan. Bid ook vir die sendelinge wat die Woord van die Here versprei.

16 Desember – Dinsdag – Versoeningsdag

Op 16 Desember het hulle ‘n gelofte voor God afgelê. Hulle het belowe om ‘n kerk te bou en dat hulle nageslagte hierdie dag as ‘n dankseggingsdag sal vier. In 1994 is Versoeningsdag ingestel en dink ons vandag aan altwee hierdie gebeurtenisse.

17 Desember – Woensdag – Vergifnis

Dankie Hemelse Vader dat U ons sondes vergewe en sê U ons moet ook die wat teen ons sondig, vergewe. Here, help my om dit te doen – 70 x 7.

18 Desember – Donderdag – Versoekings

Versoekings is elke dag op ons pad en vra ons, Vader, dat U vir ons die nodige insig en begrip sal gee en sal uitwys wanneer ons moet omdraai en wegstap.

19 Desember – Vrydag – Leiers

Leiers is mense wat die voortou moet neem en in die land se mense se belang moet optree. Gee vir hulle die nodige leiding Heer sodat ons kan opkyk na hulle.

20 Desember- Saterdag – Gawes

Dankie Heilige Gees dat U ons elkeen seën met unieke gawes. Ons vra dat U ons elke dag sal bemoedig en aanpor om ons gawes tot die welstand van ander aan te wend.

21 Desember – Sondag – Gee

Here, ons is dankbaar vir alles wat U ons gee en wil ons ook ons 10^de tot U eer gee en aanwend vir U kerk.

22 Desember – Maandag – Sendelinge

Elkeen van ons is ’n sendeling daar waar ons is. Vader, help ons om U woord uit te dra aan elkeen met wie ons in aanraking kom deur woord en daad.

23 Desember – Dinsdag – Verhoudings

God ken ons lewe. God ken ons verhoudings. Vra vandag vir God om jou te help om te sien waar jy optree met onvergewensgesindheid of liefdeloosheid en stel dit reg.

24 Desember – Woensdag – Oukersdag

Vanaand in die stilte van die nag dink ons aan daardie eerste nag met die Betlehem-ster wat vir die skaapwagters en wyse manne die pad aangedui het na die Baba in die krip.

25 Desember – Donderdag – Kersfees

Dankie Vader vir U Seun wat na die Werêld gekom het vir ons sondes. Ons dink vandag aan U Seun in die krip en wil U loof en prys vir U liefde vir ons.

26 Desember – Vrydag – Welwillendheidsdag

Hierdie dag was vroeër in Engels, Boxing Day, vanweë ’n ou Engelandse gebruik waarvolgens werknemers Christmas boxes of geskenke aan hul werkers gegee het. Onder sy nuwe naam beklemtoon dit vandag die toegeneentheid en liefde wat in die Kersboodskap vervat is. Reik uit na alle persone wie met jou in aanraking kom.

27 Desember – Saterdag – Kinders

God gee aan ons kinders om hulle in die Woord op te lei en nie te verwaarloos nie. Bid vandag vir alle ouers om hulle kinders in liefde te versorg.

28 Desember – Sondag – Vir God is alles moontlik

Wanneer jy nie meer weet nie, herinner die Here jou: “Ek wil, en ek kan”.

29 Desember – Maandag – God hou van jou

Jesus wil vandag vir jou kom sê dat Hy van jou hou en dat jy lieflik geskape is. Hy wil jou sien in jou volle potensiaal. Praat net met hom.

30 Desember – Dinsdag – Mediese personeel

Gedurende hierdie feestyd is die paaie baie besig en ongelukke meer. Bid vandag vir die mediese personeel wat oortyd werk en hul families alleen moet laat.

31 Desember – Woensdag – Oujaarsdag

Vader, ons dank U vir die jaar wat verby is en dat U ons gespaar het en ook met al U milde seëninge bederf het.

31 Oktober 20251 Desember 2025

Gebedsgids vir November 2025 NG Kerk Groot-Brakrivier

1 Joh 5:4 “Want alles wat uit God gebore is, oorwin die wêreld; en dit is die oorwinning wat die wêreld oorwin het, naamlik ons geloof”

1 November – Saterdag – God se genade is vir vandag

Here, help my om die mense wat my pad vandag verbykom nie mis te kyk nie, maar my oor hulle te ontferm. Hulle is dalk honger, koud, siek, eensaam of hartseer. God se genade is vir almal beskikbaar maar ek moet net die bereidwillige instrument wees.

2 November – Sondag – Ek is nie bang nie

Mag die liefde van God en Sy beloftes jou altyd verseker van Sy nabyheid en beskerming. Mag Sy vrede jou gemoedsrus gee en Sy blydskap jou beskerm. Al druis en skuim die waters van die see, weet ek U is vir my ‘n beskutting.

3 November – Maandag – Aanvaar net Sy plan

Het God vandag jou planne gekanselleer om gevaar te vermy? Hy het dalk jou ‘n ander pad laat ry om jou lewe te red. Jy moet dit net aanvaar, want Sy plan is beter as joune.

4 November – Dinsdag – Die veelkleurigheid van God

Jesus se paaie is hoër as myne, Sy gedagtes is by verre meer verrykend en kan nie met myne vergelyk word nie. Sonder Hom is ek totaal verlore. Jesus, neem my hand en lei my veilig na U Koninkryk.

5 November – Woensdag – Wandel deur geloof

God wil hê ons moet gister se laste agter laat, want Sy genade is elke oggend nuut. Hy wil saam met ons wandel, want Hy het reeds die pad vir ons voorberei. Hou jou oë gerig op Hom, dan sal jy nooit in die duisternis wandel nie.

6 November – Donderdag – Hy is die kern van alles

Jesus, U is nie net deel van die skepping nie, maar die middelpunt waartoe alles lei. U is die Brood van die lewe, die Opstanding en wat die ewige lewe bied aan diegene wat in U glo – te midde van lyding en dood.

7 November – Vrydag – Sout van die aarde

Vader, leer ons ook hoe om die sout van die aarde te wees soos wat ons in U woord lees. Ons moet die gemeenskap met medelye, geregtigheid en barmhartigheid kan geur deur aktief die leringe van Jesus uit te leef.

8 November – Saterdag – Here, leer ons

Here, help ons om ‘n baken van U liefde te wees. Gee ons die wysheid om geduldig en vriendelik te wees met elkeen wat ons pad kruis. Help ons om U lig uit te leef.

9 November – Sondag – My spesiale kind is deel van Sy plan

Wanneer ouers verneem dat hul baba met Downs Sindroom gediagnoseer is, dui jou wêreld ineen. Jy wil nie hierdie grondpad loop nie. Maar as jy met God die pad stap, dan kry jy die mooiste waardering vir die klein mensie wat jou lewe inkleur.

10 November – Maandag – Volhard in geloof

Vader, help my om te volhard in geloof met die wete dat U my nooit sal verlaat nie. Anker my siel in U waarheid en hou my vas in tye van twyfel en onsekerheid.

11 November – Dinsdag – Die lang vermoeiende pad

Jesus, wanneer ek so verlang na my familie of kinders wat so wyd versprei is, is dit net U wat my kan troos. Dit is ook net U wat langs my staan en my optel as die pad vir my te lank is.

12 November – Woensdag – Die prys is ook vir jou betaal

Jesus word geslaan, gekruisig en Hy sterf. Hy beleef die uiterste liggaamlike pyn. Hy word verwerp en verloën. Hy kan nou vir jou meegevoel en troos bied want Hy het die ergste reeds beleef deur die prys vir ons redding te betaal.

13 November – Donderdag – Vermy jy die kruis?

Vermy ons dalk die kruis omdat dit ontbering en opoffering is? Kom ons hardloop eerder na die kruis, nie in vrees nie, maar met volharding. Die doel is om die wedloop van die lewe te voltooi, met Jesus as die Leidsman en Voleinder.

14 November – Vrydag – Wanneer ons Jesus se voetstappe hoor

Jesus, wat ‘n wonderlike voorreg om U voetstappe te hoor, veral wanneer ons oorweldig en moedeloos voel. Om by U voete te sit, is vir my ‘n plek van veiligheid en vurige gebed.

15 November – Saterdag – Vertrou Hom met jou hele hart

God sê: “Ek is die opstanding en die lewe wat die dode laat verrys. Ek is die Waarmaker van jou drome – laat my toe om jou drome wat gesterf het weer te laat herleef. Jy sal leer om My stem te herken, moenie bang wees om My te vertrou met jou hele hart nie.

16 November – Sondag – Ons diepe afhanklikheid van God

Jesus Christus het juis aan die kruis ons siektes op Hom geneem en ons swaarkry gedra. Ons besef ons diepe afhanklikheid van God en weet dat Hy alleen in beheer is.

17 November – Maandag – Hy is my geliefde Seun, ‘n Kind so na my hart

Hy is die Seun van God, die Opstanding en die Lewe, die Alfa en die Omega. Hy is die Goeie Herder. Jesus Christus is onveranderlik – tot in ewigheid. Amen.

18 November – Dinsdag – God laat alles ten goede meewerk

God se waarheid is nie afhanklik van ons emosionele toestand nie. Al is ons van alles gestroop, is Jesus steeds die Koning van die konings en is aan stuur van ons lewe – ongeag wat die uitkoms gaan wees. Vertrou Hom, Hy is steeds in beheer.

19 November – Woensdag – Hoe gaan dit regtig met jou

Here, help my om op u beloftes te vertrou en op u voorsiening staat te maak. Ek wil my bekommernisse en angs aan u voete neerlê. Ek vertrou alleen op U.

20 November – Donderdag – Vertroetel die huwelik

Hemelse Vader, ons bid vir alle verhoudings en huwelike en dat U hulle sal beskerm teen elemente wat dit wil vernietig. Seën hulle met ‘n diep liefde vir mekaar en vul hulle met ‘n passie om mekaar elke dag opnuut te ontdek en te waardeer.

21 November – Vrydag – God se goedheid en guns

Vader, as ek my hoof buig voor ‘n bord kos, dan wil ek U ook dank vir lepels vol genade, koppies vol hoop en bakke vol liefde. Mag elkeen se beker vandag oorloop in die teenwoordigheid van Jesus. U goedheid en guns is nimmereindigend.

22 November – Saterdag – Mededeelsaamheid

Laat ons dan gedurig deur Hom aan God ‘n lofoffer bring, dit is die vrug van die lippe wat Sy naam bely. Vergeet die weldadigheid maar nie van mededeelsaamheid nie, want God het ‘n welbehae aan sulke offers.

23 November – Sondag – Reik uit na die ongekende

Psalm 142:7 Luister tog na my hulpgeroep want ek is magteloos. Red my van my vervolgers want hulle is te sterk vir my. FEBA verkondig die Goeie Nuus onder die nasies sodat elke man, vrou en kind die Evangelie van Jesus Christus kan hoor.

24 November – Maandag – Omsluit my van alle kante

Here, U ken my en sien dwarsdeur my. U ken my gedagtes nog voordat hulle by my opkom. U is goed bekend met my paaie – of ek reis of oorbly, U bepaal dit. Hoe kan ek anders om myself volkome oor te gee aan God wat so Almagtig is?

25 November – Dinsdag – Elkeen sterf, maar net een het opgestaan

Hemelse Vader, die dood is buite ons beheer, dit is bedreigend en onvriendelik. Die angel van die dood, die sonde, is aan ‘n kruishout vasgeslaan. Die skuldbrief is vereffen en daar is geen veroordeling vir die wat in Christus Jesus is nie. Ons loof U!

26 November – Woensdag – Sprei jou vlerke en vlieg my kind

Spreuke 4:4 “Wat ek jou sê, moet jy vashou. Moenie my woorde vergeet en daarvan afwyk nie en wees veral versigting met wat in jou hart omgaan”. So moet ons ook ons kinders as verantwoordelike, selfstandige volwassenes die lewe instuur.

27 November – Donderdag – Uit eerbied vir God, respekteer die bejaardes

Hemelse Vader, ons wil vir elke bejaarde bid vir gesondheid en krag, hoop en vertroosting, vrede en berusting en bid dat hulle familielede hulle met baie liefde sal omring. Maak dit vir hulle ‘n tyd van verdieping en voortgesette diens.

28 November – Vrydag – Welk ‘n vriend het ons in Jesus

Welk ‘n vriend het ons in Jesus, wat ons sonde straf wou dra. Wat ‘n voorreg dat ons alles, in gebed van God kan vra. As ons vriende ons verlaat het, dra ons hul op aan die Heer, in Sy arms is ons veilig, Hy vertroos ons keer op keer. Amen.

29 November – Saterdag – Vir ons onderwysers

Here, rus die opvoeders toe met wysheid om gedagtes te vorm. Rus hulle toe met die waarheid en visie om die toekoms te vorm en leer hulle van liefde om die wêreld te vorm. Ons is dankbaar vir hul onbaatsugtige liefde in elke kind se lewe.

30 November – Sondag – Wees U vir ons kinders ‘n toevlug

Vader, ons bid vandag vir beskerming vir ons kinders en kleinkinders in hierdie wêreld waar dit so boos is. Seën hulle oorvloedig en help hulle om in U wysheid te groei en U weë te wandel.

Gebedsgids – November 2025 Laai af

27 September 20251 November 2025

Gebedsgids vir Oktober 2025

GEBEDSGIDS – OKTOBER 2025

1 Oktober – Woensdag – Oktober maand

Dit is Oktobermaand en ons sê saam met Louis Leipoldt dankie vir die helder dae, ‘n blou hemel en ‘n blomtuin vol bome.

2 Oktober – Donderdag – Helpende Hand

Kom ons sê dankie vir almal wat ‘n helpende hand uitsteek en die moed het om betrokke te raak by hulle wat langs die pad lê.

3 Oktober – Vrydag – Vakansie

Dit is die begin van ‘n kort vakansie. Kom ons tree so op dat ons kinders ons ook sal navolg en ons maak hierdie vakansie vir hulle onvergeetlik. Ons bid vir alle rolmodelle en dat ons besef dat elke dag is ‘n dag om ‘n voorbeeld vir hulle te kan wees.

4 Oktober – Saterdag – Verslaafdes

Ons gebed is dat alle verslaafdes na U sal kom vir redding, reiniging en genesing en dat hulle sal besef dat die Here hulle lief het al is hulle ook in ‘n diep put en dat Hy hulle sal vergewe ongeag waarin hulle ookal verval het.

5 Oktober – Sondag – Bejaardes

Daar is baie bejaardes onder ons. Kom ons dank God dat hy by ons bejaardes is en hulle begenadig met rustigheid, vrede en wysheid en dat hulle ook sal voel dat hul nog iets beteken vir die jongeres.

6 Oktober – Maandag – Stilte

“Here, te midde van ‘n besige en luidrugtige wêreld, is ons gebed: maak dit stil in ons binneste sodat ons net ‘n sagte teenwoordigheid sal ervaar en so sensitief vir U stem sal wees.”

7 Oktober – Dinsdag – Getuig

Kom ons bid dat mense in liefde en vrede sal saam leef, dat elke knie sal buig en elke tong sal getuig dat Christus die Here is.

8 Oktober – Woensdag – Leiers

Bid vandag vir almal wat leiding gee voor U sal buig en dat hulle suiwer sal koers hou en nie sal betrokke raak by korrupsie nie en die mense vir wie hulle moet lei, hul uiteindelike oorweging sal wees.

9 Oktober – Donderdag – Ons huis

Here, maak ons huis die eerste skool en kerk vir ons kinders en dat hulle hier sal leer wat goed en reg en edel is.

10 Oktober – Vrydag – Rustigheid

Ons bid vandag dat Psalm 23 se groen weivelde en rustige waters nie net ‘n droom sal wees nie, maar ‘n werklikheid en dat ons die rustigheid en vrede wat God gee in ons elkeen se lewe sal wys en dat ons dit ook kan uitdra aan ander.

11 Oktober – Saterdag – Werk vir die Here

“Here, help ons om elke ding wat ons hand vind om te doen, ons na die beste van ons vermoë doen, asof ons dit vir U doen”.

12 Oktober – Sondag – Gideons

Ons dankoffer is vandag vir die Gideons en ons dank God vir die miljoene testamente wat hulle al langer as ‘n eeu versprei in skole, hotelle, hospitale, gevangenisse en militêre basisse en so miljoene mense bereik met die evangelie van Jesus.

13 Oktober – Maandag – Onderwysers

Die skole open weer vandag en ons dank God vir toegewyde onderwysers wat leerders voorberei vir die eise van die lewe. Ons dink aan hulle wat ook die kinders moet leer en wys met hul optrede hoe om te lewe.

14 Oktober – Dinsdag – Beskerming van Jesus

Dankie Here dat U die Weg, die Waarheid en die Lewe is en dat U met U liefde ons beskerm teen gevare en die invloed van die duiwel wat ons wil wegraap van U liefde.

15 Oktober – Woensdag – Fyn aanvoeling

Ons bid dat U aan ons sal gee, ‘n fyn aanvoeling om die regte besluite te neem en ‘n positiewe gesindheid te openbaar.

16 Oktober – Donderdag – Woord van die Here

Vandag dank ons U vir U Woord wat ewig, onfeilbaar en onmisbaar is en ons spesiale dank ook vir die leraars, sendelinge, pastore en godsleiers wat dit vir ons oopmaak en verduidelik sodat ons dit kan verstaan en uitleef.

17 Oktober – Vrydag – Jesus-liefde

Leer my Here, om lief te hê soos U liefgehad het: onvoorwaardelik en tot die einde toe. Dankie dat U gesterf het vir my sondes en my vergewe vir al my sondes.

18 Oktober – Saterdag – Sagte hart

Here, gee ons ‘n sagte hart wat medelye het met die armes en almal wat in nood is en gee dat ons sal help waar ons kan en so hul nood verlig en ook maniere sal vind om hul te bemagtig en hul trots sal herstel.

19 Oktober – Sondag – Gesondheidsdienste

Vandag is dit ‘n biddag vir gesondheidsdienste. Gee vir die dokters en verpleegsters simpatieke harte en seën hulle op hul arbeid en help hul ook dat hul die nodige insig en krag sal ontvang om hul werk met vreugde te doen.

20 Oktober – Maandag – Sondes

Kom ons bid vandag saam met Dawid in Psalm 51 dat die Here ons sondes sal weg neem sodat ons weer rein kan wees om so voor Hom te verskyn.

21 Oktober – Dinsdag – Stem van die Here

Dankie Here dat U deur U Gees by ons teenwoordig is. Help ons om U stem duidelik te hoor. Maak ons ook stil sodat ons U stem in die sagte fluistering van die wind sal herken.

22 Oktober – Woensdag- Ons land

Here, ons bid U seën af op ons land en al sy mense en ons bid dat U ons sal bevry van bitterheid en haat. Ons bid dat ons in liefde en vrede sal saambly en werk en U naam in alles sal vereer.

23 Oktober – Donderdag – Sintuie

Kom ons dank die Here vandag vir die gawe van ons sintuie en die gawe van lewe en gesondheid, die feit dat ons kan beweeg, sien voel en hoor. Ons bid ook dat ons sal dink aan die mense wat sukkel. Gee ons die empatie om ook uit te reik om behulpsaam te wees indien hulle sukkel.

24 Oktober – Vrydag – Gemeentekonsert

Dit is vanaand ons gemeentekonsert en ons wil saam met Paulus in Filippense 4:4 sê: “wees bly in die Here!” Ons sê dankie vir heerlike samesyn van ons gemeente dat hulle ook so U Naam kan vereer.

25 Oktober – Saterdag – Dankfees

Vandag is ons Dankfees! Kom ons juig saam met Dawid in Psalm 65:12. U kroon die jaar met U goeie gawes. Waar U ook gaan, is daar oorvloed. Ons dank U Here.

26 Oktober – Sondag – Hervormingsondag

Op Hervormingsondag dank ons die Here vir ons duur gekoopte Protestantse erfenis en vir al die geestelike seëninge waaraan ons vandag opnuut herinner word.

27 Oktober – Maandag – Getuienisbediening

Die getuienisbediening vergader vandag en ons dank die Here vir die bereidwillige sopkokers, sopskenkers en die uitreikspan wat die sop, brood en die Woord gaan uitdra en verkondig en ons dank die Here vir die onbaatsugtige werk wat hulle doen.

28 Oktober – Dinsdag – Die Here se lig

“Here, hoe helderder die lig van U heerlikheid skyn, hoe meer word ons bewus van ons donkerte. Dankie dat ons uit die bevryding van ‘n opregte skuldbelydenis kan leef”.

29 Oktober – Woensdag – Geloof

“Jesus, versterk tog ons hoop en liefde, maar veral ook ons geloof sodat ons seker kan wees dat niks ons van U liefde sal skei nie.”

30 Oktober – Donderdag – Geskeides

Kom ons bid vir alle geskeides dat hulle sal opstaan tot ‘n nuwe lewe van hoop en dat die Here vir hulle die pad wat hulle moet loop, sal wys. Bid ook dat hulle die liefde van God sal ervaar en weer geliefd sal voel.

31 Oktober – Vrydag –Sportmanne en vroue

Bid vandag saam vir alle sportmanne en -vroue dat hulle nie sal nalaat om aan die Heer al die eer te gee vir hul gesondheid en talent nie.

Gebedsgids – Oktober 2025 – Webwerf Laai af

28 Augustus 202512 Oktober 2025

GEBEDSGIDS SEPTEMBER 2025 NG Kerk Groot-Brakrivier

1 Johannes 3:16 Hieraan weet ons wat liefde is: Jesus het sy lewe vir ons afgelê.

1 Sep – Maandag – Jesus se nuwe seisoen begin met ‘n wildernis tyd

Nadat Jesus gedoop was, het Hy dadelik uit die water uitgeklim en die Hemele het meteens vir Hom oopgegaan. Dit is Sy nuwe seisoen en Hy verwag ook dat ons elke seisoen van ons lewe vreugdevol sal ervaar tot ere van Sy naam.

2 Sep – Dinsdag – ‘n Fondasie vir ewige lewe

Jesus, dankie dat U die ewige en onwrikbare rots in my lewe is waarop ek my fondasie kan bou. Met U kan ek die storms en aanslae teëstaan sonder om te val.

3 Sep – Woensdag – God se genade is baie meer

Die dorings van ons lewe is baie, maar God se genade is baie meer. En daar waar jy die seerste kry, is waar God se genade op sy grootste is.

4 Sep – Donderdag – Wie het ek buiten U in die hemel?

Buiten U in die hemel, begeer ek niks op aarde nie. Dankie Vader vir U teenwoordigheid in my lewe. Al is ek afgetakel na liggaam en gees, aan U behoort ek vir altyd.

5 Sep – Vrydag – God se beloftes

Jesus, versterk ons geloof sodat ons op U alleen sal vertrou. Verlos ons van die kleingeloof wat ons verhinder om U wonderwerke te sien en te ervaar.

6 Sep – Saterdag – Brandende Bos

Here, help ons om bewus te wees van die brandende bosse in ons lewens. Gee ons die vermoë om U stem duidelik te hoor en ons harte oop te maak vir U leiding.

7 Sep – Sondag – Nasionale Biddag vir Dowes

Hou my vas Here Jesus te midde van stormagtige weer. Wanneer vrese en twyfel ontstaan wil ek U liefde en vrede ervaar. Hou my naby U Jesus, daar voel ek veilig.

8 Sep – Maandag – Is jy gereed?

Vader, ek wil elke dag gereed wees om U te verheerlik. Ons vertoon U beeld en moet U koningskap en liefde weerspieël. Sonder U is ons geestelik swak.

9 Sep – Dinsdag – Geestelike Fiksheid

Wat help dit my broers, as iemand beweer dat hy glo, maar sy dade bevestig dit nie? Dankie Here vir geleenthede om geestelik fiks te bly, om vir die gemeenskap te bid en iemand na die Here toe te lei.

10 Sep – Woensdag – Waak en bid

Dankie Vader dat U ons toerus met sintuie om waaksaam te wees. Ons sal aanhou waak en bid om oorwinning oor die wêreld, die vlees en die vyand te behaal.

11 Sep – Donderdag – Dankbaarheid van kind van God

Kyk watter groot liefde die Vader aan ons bewys het: Hy noem ons kinders van God, en ons is dit ook. En die wêreld ken ons nie, omdat hulle Hom nie ken nie.

12 Sep – Vrydag – Wees soos ‘n arend

Vader, ons wil gevul wees tot volheid van U. Ons wil uitstyg soos ‘n arend, want saam met U is daar geen beperking van U liefde en genade vir ons nie.

13 Sep – Saterdag – U liefde is oneindig groot

Vader, ons begryp hoe oneindig diep die liefde van Christus strek. Mag ons U liefde ken wat ons verstand te bowe gaan en vervul word met die volheid van God.

14 Sep – Sondag – Sending aan Melaatses

Vader, ons bid dat elkeen wat geaffekteer is met die siekte, U net kan aanraak. U het nie gekom om ons liggame te genees nie, maar om ons verhouding met God te herstel.

15 Sep – Maandag – Koninkrykswerk

Laat God toe om jou toe te rus vir Sy werk. Kom ons reik uit en raak betrokke by die kerk se sendingwerk, gemeenskapswerk of by die ontferming oor die kwesbares.

16 Sep – Dinsdag – As die lewenstrome woedend om jou slaan

My toevlug en my bergvesting, my God op wie ek vertrou. Hy sal jou dek met sy vlerke, en onder sy vleuels sal jy skuil. Ek dank U vir U beskerming, leiding, wysheid en liefde.

17 Sep – Woensdag – Gee jy soms oor

Dankie Hemelse Vader dat U die duurste prys vir ons betaal het. U is my rots by wie ek skuil. U is die stuurman van my lewe en my veilige hawe. Sonder U is ek niks.

18 Sep – Donderdag – Verwoesting in jou hart?

Wees nie afgunstig op die kwaaddoeners nie en begeer nie om met hulle saam te wees nie. Hulle hart bedink verwoesting en hulle lippe spreek moeite.

19 Sep – Vrydag – God is my rigtingwyser

Here, ek erken dat ek nog te veel beheer oor my eie besluite het en vra vergifnis vir my rebelsheid. Onderrig my met wysheid in oorvloed. U leiding is konstant.

20 Sep – Saterdag – Die begeerte om te kan hoor

Jesus het gekom om ons te versoen met die Vader. Hy is die lewende weg na die troon – die voorhangsel is geskeur. Dit is ons geboorte-voorreg om Sy stem te kan hoor.

21 Sep – Sondag – Bediening aan die dowes

Here, ons buig nederig voor U en dank U vir genade so groot. Ons bid vir herstel in ons liggame wat gebreek en gekneus is. Vader, raak asb die gehoor aan van diegene wat nie al hulle sintuie kan geniet nie. By U is niks onmoontlik nie.

22 Sep – Maandag – Word ‘n visser van mense

Laat jou geloof sigbaar word in jou dade. Deel jou geloof en maak dissipels vir Jesus. Volhard sodat jy eendag alles wat Jesus vir jou in die hemel bewaar, in besit neem.

23 Sep – Dinsdag – Sy oneindige liefde vir jou

God ken ons lewe. Hy het die pad reeds voorberei. Hy ken die toekoms, vertrou Hom net. Hy ken jou bekommernis, gee dit oor en raak stil. Hy ken jou hartseer, teleurstellings en sien jou trane – Hy sal dit afdroog. Daar is geen einde aan Sy goedheid nie.

24 Sep – Woensdag – Erfenisdag

Vader, ons dra hierdie land met sy kulturele diversiteit op aan U. Seën asseblief ons land en mense en leer ons hoe om mekaar te kan aanvaar, te vergewe en lief te hê.

25 Sep – Donderdag – Alle eer aan U

Dankie Vader vir die wonderlike gawe om te kan kommunikeer. Lei ons om dit met oorgawe te gebruik om mekaar aan te moedig en te vertroos en om U te eer.

26 Sep – Vrydag – God laat alles ten goede werk

Here, ek weet dat U tot alles in staat is en alles kan uitvoer volgens U wil. Soms is ons ongeduldig as ons gebede nie dadelik verhoor word nie. Vergewe ons ongeduld Here – U is altyd op tyd.

27 Sep – Saterdag – Is die losprys te hoog?

Deur die oortreding van een mens het baie gesterf, maar deur die genade van God en die genade van een mens, Jesus Christus, was Hy bereid om die losprys te betaal – vir jou.

28 Sep – Sondag – Bediening aan Jode

Johannes 8:31 – Jesus sê vir die Jode wat in Hom geglo het: As julle in my woord bly, is julle waarlik my dissipels. En julle sal die waarheid ken, en die waarheid sal julle vrymaak.

29 Sep – Maandag – Jesus is jou skans

Jesus is die vrede in tye van moedeloosheid, siekte en hartseer. Jy is nie gemaak om hierdie storms te beleef en te beveg nie. Jy is gemaak om God te beleef en te sien hoe Hy jou storms stilmaak.

30 Sep – Dinsdag – Die uniekheid van Jesus

Hy is die enigste seun van God. Hy is ewig en die enigste weg na die Vader. Hy het die mag om lewe te gee en die enigste Regverdige wat vir ons sondes verruil het.

Gebedsgids – September 2025 Laai af

25 Julie 20251 September 2025

Gebedsgids – Augustus 2025 NG Kerk Groot-Brakrivier

1 Tess. 5: 17 Bid gedurig.

1 Augustus – Vrydag – Wedergeboorte

Dankie Here, dat ons die wedergeboorte kan ontvang en so gewek word tot ‘n nuwe lewe as U kinders en gee dat ons ook as U kinders sal leef.

Lees meer

24 Junie 20258 November 2025

GEBEDSGIDS – JULIE 2025 NG Kerk Groot-Brakrivier

1 Julie – Dinsdag – Siekes

Ons Bid vandag vir alle siek mense en allerhande soorte siektes van ons tyd en bid dat hulle die nodige geduld sal hê om dit te hanteer en ook bid ons vir U genesende hand.

2 Julie – Woensdag – Besluite

Liewe Vader, ek wil nie net besluite neem en my kop stamp nie. Laat ek volgens U wil bid en in U spoor loop sodat ek die regte optrede aan die dag sal lê.

Lees meer

28 Mei 202529 Junie 2025

Gebedsgids Junie 2025 – NG Kerk Groot-Brakrivier

God se stem in die seisoene

“U wat al die seisoene van die aarde vasgestel het; somer en winter is die werk van U hand” – Psalm 74:17.

GEBEDSGIDS – JUNIE 2025

1 Junie – Sondag – Prys die Here van die aarde af

Lees meer

25 April 20251 Junie 2025

Gebedsgids Mei 2025

Donderdag – 1 Mei – Werkersdag

Vandag vier ons Werkersdag en wil ons dankie sê vir almal wat kan werk en ook bid vir die werkloses. Ons bid vir nuwe werksgeleenthede.

Vrydag 2 Mei- Gestremde persone

Ons bid vir al die gestremde persone en dra hulle welsyn en gemoed op aan die Vader en vra dat die mense sal sensitief wees vir hulle behoeftes.

Saterdag – 3 Mei – Gemeente fees

Vader, ons vra vandag U seën op ons fees waar gemeentelede saam verkeer en ook geld insamel vir ons kerk se behoeftes.

Sondag – 4 Mei – Arbeid Sondag

Ons dra vandag die werkerskorps wat werksgeleenthede skep aan die Here op en vra dat die Here hul besighede sal seën.

Maandag 5 Mei – Omgee bediening

Ons dra vandag ons gemeente se omgee bediening aan die Here op. Ons bid vir Sy seën op al hulle werk en projekte.

Dinsdag 6 Mei – Jesus het opgestaan

Here help ons dat ons nie sal skrik of twyfel as U in ons midde kom staan nie. Dat ons nie vir bewyse sal soek of dit U is nie, maar sal glo. Ons sê dankie in ons gebede dat Jesus ons nie verwerp het nie, maar steeds by ons is.

Woensdag – 7 Mei – Verstaan die Bybel

Ons bid dat Jesus ons verstand sal open om die Skrifte te verstaan en dit uit te leef om met ons leefstyl mense na Jesus te lei. (Lukas 24:45)

Donderdag – 8 Mei – Vergifnis van sondes

Ons dank die Here dat die bekering en vergifnis van sondes in Sy naam vir alle nasies en volkere is, dus ook vir ons. (Lukas 24:47)

Vrydag – 9 Mei – Sondige bestaan

Ons bid dat Jesus ons ook uit ons sondige bestaan sal opwek sodat ons Hom voortdurend sal loof vir die vergifnis van ons sondes.

Saterdag – 10 Mei – Ramot

Ons insameling is vir Ramot môre en bid ons dat mense mildelik sal gee vir die hulp van persone wat ekstra hulp benodig met hul verslawing en ook ten volle genesing sal ervaar.

Sondag – 11 Mei – Moedersdag

Deur ons gebede vra ons dat die Here ons Moeders en instaan-Moeders sal seën en hulle die nodige insig sal gee om die kinders rondom hulle op te voed.

Maandag – 12 Mei – Mediese personeel

Ons bid vir al ons mediese personeel dra al hul werk aan die Here op en vra dat hul sensitief sal wees vir Sy leiding en ook met die nodige insig sal werk en met die nodige sagtheid met die siekes sal omgaan.

Dinsdag – 13 Mei -Vrede in onsekerheid

Ons vra vandag vir God se vrede om angstige harte te kalmeer en rus te bring in die middel van die lewe se onsekerhede.

Woensdag – 14 Mei – Mishandeling

In ons land is mishandeling op die voorgrond en bid ons vandag dat God met alle gesinne sal wees en vrede binne elke huis sal skep.

Donderdag – 15 Mei – Misdaad en Korrupsie

Ons land word geteister deur misdaad, dwelms, korrupsie, verkragtings, moord en bendes. Ons bid tot die Here en vra vir Sy drastiese ingryping en vir die staat om die nodige te doen om dit te bekamp.

Vrydag – 16 Mei –Dankbaarheid en vreugde

Kom ons dank God vandag vir sy daaglikse seëninge en ons bid dat vreugde sal oorloop selfs in die moeilike tye van ons lewe.

Saterdag – 17 Mei –Hoop vir die toekoms

Ons bid vandag dat God mense se harte sal vul met hoop en versekering van Sy goeie planne wat Hy vir die toekoms vir jou het. Glo dit en maak dit jou belofte.

Sondag – 18 Mei -Arbeidsbediening

Ons gee vandag vir die diens van die predikers wat by die besighede die woord van die Here bring en bid ons dat hul sal bydra vir hul werk maar ook dat hul vriendelik ontvang sal word waar hulle die boodskap moet bring.

Maandag – 19 Mei – Reën

Ons dank die Vader vir die oorvloedige reëns wat in ons land geval het, maar ons dra ook die bitter droë dele aan Hom op om dit met milde reën te seën.

Dinsdag – 20 Mei -Krag soos ‘n Arend

“Here, ons bid vandag dat U die vermoeide en kragtelose sal oplig en met krag sal vul om soos ‘n arend te vlieg”.

Woensdag – 21 Mei – Polisiemag

Ons dra ons plaaslike polisie aan die Vader op en vra dat Hy sy beskermende hand oor hulle sal hou in hulle daaglikse gevaarlike werk.

Donderdag – 22 Mei – Genesing en vertroosting

Ons dink vandag aan diegene wat siek is of treur en bid dat God se genesende aanraking ek diepe vertroosting voelbaar is hul lewe sal wees.

Vrydag – 23 Mei- Eenheid in ons gemeenskappe

“Vader, ons vra vandag dat U vir ons sal help om liefde en aanvaarding in ons gemeenskap te wys en te bevorder sodat ons in ons woonbuurte, kerke en dorpe kan groei en liefde en vrede ervaar.

Saterdag – 24 Mei – Leiding en Wysheid

Ons bid vir duidelikheid in ons besluitneming en die wysheid om elke dag in God se wil te wandel.

Sondag – 25 Mei – Buitelandse Sending

Vandag dink ons aan ons buurlande, Zimbabwe, Mosambiek en Malawi en die sendelinge wat die boodskap daar bring. Bid dat die sendelinge genoegsame fondse ontvang om hul werk tot die beste van hul vermoë te kan doen.

Maandag – 26 Mei – Bybelstudiegroepe

Bid vir al die Bybelstudiegroepe in ons gemeente en vir ‘n bewustheid van die teenwoordigheid van die Heilige Gees se leiding in die groepe.

Dinsdag – 27 Mei – Regering

Ons bid vir die regering van die dag en vra die Vader om met elkeen wat in verantwoordelike posisies is, te wees en ‘n gees van eerlikheid en verantwoordelikheid te skep.

Woensdag – 28 Mei –Lig vir Jesus

Vra vandag dat ons Christene so sal leef dat Christus se lig deur ons sal skyn om moed te bring in ‘n donker wêreld en so mense na Jesus te lei.

Donderdag – 29 Mei – Hemelvaart

Hier waar ons vanoggend staan met die heerlike wete dat ons Heiland leef en dat Hy opgevaar het hemel toe, aanbid ons Hom, loof ons Hom, eer ons Hom deur ons gebede.

Vrydag- 30 Mei – Vir nog ‘n maand

Vir nog ‘n maand wat verby is dank ons die Vader vir Sy liefde en genade wat Hy aan ons bewys het. Daar waar siekte is, vra ons genesing, waar afsterwe was, vra ons vertroosting, waar eensaamheid is, vra ons Sy teenwoordigheid en waar vreugde is, dank ons Hom.

Saterdag – 31 Mei – Christelike klimaat

Ons dank Vader dat ons kinders nog in ‘n Christelike klimaat kan skoolgaan. Ons bid dat die Vader dit so in stand sal hou en dat Hy elke kind, onderwyser en skoolhoof sal seën.

GEBEDSGIDS Mei 2025 Laai af…

26 Maart 20255 Mei 2025

Gebedsgids April 2025

“As iemand agter My aan wil kom, moet hy homself verloën en sy kruis elke dag opneem en My volg.”

Lukas 9:23

GEBEDSGIDS – APRIL 2025

1 April – Dinsdag – Niks vir onsself nie

Vader, help ons om weer bewus te word van ons gawes om ‘n seën vir ‘n ander een te wees. Om ander met onvoorwaardelike liefde en deernis te aanvaar en te bemoedig. Niemand van ons leef tog vir onsself nie, ons doen dit tot eer van God.

Lees meer

4 Maart 202524 Mei 2025

Bybelgenootskap – Gebedsgids Herfs 2025

Kom bid saam met die Bybelgenootskap van Suid-Afrika vir die werk wat hulle doen vir die verspreiding van Bybels in die wêreld.

Met die Bybel as grondslag en gemotiveer deur die Groot Opdrag, vervul die Bybelgenootskap van Suid-Afrika hul missie om bekostigbare Bybels beskikbaar te stel terwyl die volgende waardes al hul aktiwiteite rig – integriteit, vertroue, respek, diens, aanspreeklikheid – sodat elkeen die lewegewende boodskap van die Woord mag ervaar.

Lees meer