Kategorie: Nuusbriewe Oekraine

Nuusbriewe uit Oekraine

Gepubliseer op

Michele Potgieter – Terugvoer oor Mari-Alena, en sendingnuus uit Oekraïne.

Mari-Alena Oekraine

Liewe vriende en familie

Baie dankie dat julle ons in hierdie tyd in gebed bystaan. 

Dankie vir elkeen wat gee en elkeen wat ons ondersteun. 

Dankie vir elke boodskap van bemoediging en elke skrif.

Dit is tye soos die wat die Here met jou praat selfs deur ‘n plakker agter op iemand se motor. 

Soms is jy so gebroke en voel dit asof jy leeg getap is, asof jy met jou hart in jou arms rondloop en dat jy so kwesbaar is.

Jy voel so weerloos en stukkend en asof enige iets jou kan seermaak. Selfs die wind daar buite. Dit voel asof jy geen krag het om in die oggend op te staan nie. Alles in jou is al uitgehuil. Die dokter se eerste woorde. “Sy het net ‘n paar maande oor.” Of, ons hou haar nou net aan die lewe. Dan voel ek soos Job. 

Here hoeveel nog? Ek dwaal rond om die tyd verby te kry tot die volgende besoektyd. Ek wil huil en alleen wees en soek ‘n plekkie weg van die mense wat verby my loop.  Ek lees agter op ‘n publieke toilet se deur, op ‘n afgetrek ou plakker met verweerde swart koukie merke….Trust in God…

Selfs daar vind ek hoop en praat die Here met my. 

Die Here is naby! Hy PRAAT met my deur die kleinste dingetjie, die dooie voeltjie by my voordeur laat my huil. Die Here se vir my: Ek weet van elke voëltjie wat val en jy is baie meer werd as baie voeltjies! 

Ek dink aan al die goed wat ek en Mari-Alena nog wou saam doen en die seer in my is ondraaglik. Die dokter het vir my haar CT gewys en hoe ver die kanker gevorder het. Ek was stukkend en my geloof was baie min. Dit het gevoel asof ek haar reeds verloor het. Op my laagste, daar het die Here my kom optel en vir my gese, Vertrou MY!

Sy sal nie deur dit alles gaan as dit nie vir MY glorie is nie en as Ek nie daardeur verheerlik word nie. Ek sal jou NOOIT begewe of verlaat nie. Om te glo is om seker te wees van die dinge wat ons nie sien nie. 

Verlede week het ek haar hare in die hospitaal gewas en uitgekam. Ek steek die bos hare weg wat ek uit die borsel trek. Sy vra my om dit vir haar te wys. Sy begin huil en ek hou haar vas. Mamma, ek kan nie meer nie, ek wil uit hierdie kamer uitkom!! Ek huil saam met haar en probeer haar moed inpraat, skrif gee, maar my hart breek in ‘n duisend stukkies in my. Haar arms is vol bloukolle van naaldsteke. Sy is so maer en haar ribbes en ruggraat staan uit. Net vel en been. Ek help haar bad en was haar saggies draai haar in ‘n handdoek toe, soos toe sy klein was en gee haar ‘n drukkie. Sy loop vooroor met ondersteuning. 

Almal bid vir haar. Ek salf haar elke dag en spreek lewe. 

Sy het haar volgende Chemo gekry terwyl sy so swak was. Die gewas in haar maag het weer vergroot en die uitgang verstop.  Sy kon niks eet nie. Na die chemo was haar witbloed telling op 0.00

Die volgende dag was dit 0.03, die dag daarna 0.06

Die volgende dag was dit 0.16

Dit was twee dae voor Kersfees en die dokter het gesê dat sy nie sal kan huistoe kom indien dit nie 1.00 is nie.

Op Oukersaand het ons Kersfees na Mari-Alena toe geneem. Benjamin het met ‘n Kersboom in die hospitaal ingeloop, kompleet met ‘n rooi hoed. Ons het vrolike Kersmusiek gespeel en saam gebid en ‘n ware Christus-fees sommer daar in haar kamer gehou. Ons het vir mekaar geskenke gegee en Mari-Alena het dit so baie geniet. Sommer ook vir elkeen van die verpleegsters ‘n geskenkie gegee. 

Daar was nie ‘n manier dat Mari-Alena se witbloedstelling bo 1.00 sal kan wees nie. 

Kersoggend het Mari-Alena vrede daarmee gemaak dat sy nie by die huis sal kan wees nie.

Sy het vir die Here dankie gesê dat Hy na hierdie aarde toe gekom het, gebore is en dood gegaan het, omdat Hy so lief is vir ons. Later die oggend het die vrouedokter vir haar kom vra of sy graag sal wil huistoe gaan. Die dokter het vir haar gesê dat haar witboedtelling “Miraculously” opgetel het en 1.3 is!! 

Ons het omtrent hospitaal toe gejaag en vir Mari-Alena gaan haal. Daarna is ons na my swaer en skoonsuster toe, Ockert se broer Cor en sy vrou Frances het kom kuier uit Kanada en ‘n heerlike Kersfees-ete voorberei. Vier van my vyf kinders was Kersdag by my. Dit was so groot wonderwerk! Die volgende dag het ons sommer strand toe gery en almal was vroeg oggend in die water om te swem. Mari-Alena, nog baie swak het die water so geniet! Haar boeties en Janneman haar vriend het haar ondersteun en ons het die dag saam geniet. Die Here is so getrou!! Gisteraand het ons haar terug geneem na haar hospitaal kamer en vanmore het sy weer begin met vier dae van chemo. Haar hare val in bosse uit, maar dit pla haar nie meer nie. 

Ons vaar Kaapstad se strate in opsoek na ‘n pruik. 

In Suid Oekraïne gaan dit goed. Die leiers het ‘n pragtige Kersdiens gehou en die kinders het gesing. Daar is vir elke kindjie ‘n geskenk gegee en daar was tonele, danse en baie vreugde!

Alles gaan aan. Elke bediening en die leiers bring elkeen sy deel. 

Die kleuterskool doen goed en daar is nuwe kindertjies. 

Ons is dankbaar! 

Die Here is so goed en getrou! Hy hou ons vas, dra ons en sal ons nooit begewe of verlaat nie! Nooit nie! 

Ons weet nog nie wat die mediese onkostes gaan wees nie, maar ons vertrou die Here vir elke dag. Dankie dat julle aanhou bid. Elke gebed dra krag en ek weet dat Mari-Alena reeds gesond is! Deur die wonde van Jesus is sy reeds genees! Ons dien ‘n God van wonderwerke. 

Baie liefde en seën

Michele Potgieter
Suid Oekraïne

Stellenbosch

*Account Name:* Marialena Behandeling en Nasorg

*Account Number:* 2333274073

*Bank:* Capitec (Savings)

https://www.facebook.com/share/KaKbQoZMYNKG8HRy/?mibextid=LQQJ4d

Gepubliseer op

Michele Potgieter – Opvolg nuus rakende haar dogter Mari-Alena

Oekraïne

Liewe vriende en familie

Baie dankie dat julle bid en intree. Dankie vir elke bemoedigende woord en vir elke bydrae. Ons waardeer dit oneindig baie.

Hierdie was een van die moeilikste twee weke van my lewe. 

Daar was tye wat ek op my einde was, waar die dokters gesê het dat hulle Mari-Alena net aan die lewe hou. Daar was ook dae van geloof en oorwinning. Wat die Here my so kom versterk het! 

Mari-Alena is gediagnoseer met Burkitt Limfoom (tipe B-sel NHL limfoom kanker.

https://my.clevelandclinic.org/health/diseases/22777-burkitt-lymphoma

 

Die gewas in haar maag het die uitgang versper dat sy glad nie meer kon voedsel inneem nie. Dit het ook haar hele maagwand oortrek. Nadat ek die CT scans op die dokter se skerm gesien het en hy vir my gesê het dat dit graad 4 kanker is, het dit gevoel asof ek nie kon staande bly nie, maar die Here is steeds goed en getrou! Die Here het my kom verseker dat Hy haar genees! Ek glo dit met my hele hart en met alles in my. Sy was vir ‘n week in Mediclinic waarvan 4 dae daarvan in intensief. Die dokter het ons oortuig dat Tygerberg hospitaal spesialiseer in Burkitt Limfoom. Ons staan net in verwondering oor hoe die Here voorsien het vir die behandeling in Mediclinic asook vir die ambulans na Tygerberg. Na haar eerste chemo kon ons dadelik ‘n verskil sien. Binne ‘n paar dae was alle pyn weg en kon sy weer eet. Haar buik swelling het drasties verminder. Die kanker het ook na haar baarmoeder vesprei. Daar is ook 10% in haar rugmurg teenwoordig.

So nou dat ons weet waarvoor om te bid, kan ons gefokus bid.

Maandag kry sy haar tweede chemoterapie wat baie meer aggresief gaan wees as die eerste. Verlede Saterdag het Benjamin en Cilliers hul sussie in die hospitaal verras! Benjamin het uit Amerika gevlieg en Cilliers uit New Zeeland.  Ek is so jammer dat ek nie gereeld by die boodskappe en “updates” uitkom nie. Tygerberg is so halfuur se ry vanaf Stellenbosh, soms ry ek in die verkeer dan is dit sommer ‘n uur lank. Besoektye by Tygerberf is baie streng. Dit is maar ;n staatshospitaal, maar Mari-Alena het nog nie een negatiewe woord gesê nie. Sy staan so sterk, verduur elke ontbering. Dit is so verskriklik moeilik vir my om haar in soveel pyn te sien en daar was dae wat ek edink het dat ons haar gaan verloor. Sy het verskriklik gewig verloor, sy was so bleek en swak. Vandag lyk sy baie beter! Ek prys die Here vir Sy getrouheid en Sy genesing! Ons gebruik saam met Mari-Alena nagmaal en salf haar. Ons spreek lewe oor haar. Die Here gaan verheerlik word deur haar getuienis!

Ek gee daagliks kort updates en gebedsversoeke op Whatsapp en Facebook.

My Whatsapp nommer indien jy op die groep wil wees: +380938126060

In Suid-Oekraïne gaan die gemeente goed aan. Die leiers is so getrou. Hou asseblief aan om vir Suid-Oekraïne en Oekraïne te bid.

Groete en seën

Michele Potgieter.  

Stellenbosch

*Account Name:* Marialena Behandeling en Nasorg

*Account Number:* 2333274073

*Bank:* Capitec (Savings)

https://www.facebook.com/share/KaKbQoZMYNKG8HRy/?mibextid=LQQJ4d

Gepubliseer op

Michelle Potgieter – Nuus rakende haar dogter Mari-Alena

Oekraïne

Goeie môre liewe familie en vriende

Die dokter het bevestig dat Mari-Alena kanker het.

Die goeie nuus is dat dit Lymphoma kanker is wat gewoonlik makliker behandel kan word. Net 5%  van mense wat maag kanker het het Lymphoma. 

Ons sal Maandag in Paarl hospitaal die details hoor oor die vordering en behandeling. 

Vrydag het Mari-Alena duislig gevoel en was sy baie swak. Ek het haar so vinnig moontlik na die naaste hospitaal gebring. By die Mediclinic hier in Stellenbosch het hulle haar dadelik twee eenhede bloed gegee en sy was in baie pyn. Sy is in Mediclinic opgeneem en is nou vir twee dae hier. 

Die dokter het gesê dat dit baie goed is dat ek haar hierheen gebring het, aangesien sy dadelik die bloedoortapping gekry het wat lewens noodsaaklik was. Haar ystervlakke was ontsettend laag. By die staats hospitaal in Kaapstad gee hulle ‘n bloed oortapping nie sommer nie. Sy het nou weer kleur in haar gesiggie. Ons het nie ‘n mediese fonds nie, maar ek glo en ek weet dat die Here vir al haar behandeling sal voorsien. 

Ons weet nie wat vir ons voorlê met behandeling nie, maar ek weet verseker dat die Here ons dra. 

Ek loop nou hier in die hospitaal gange rond en ek voel fisies so moeg, so swak. 

Maar ek weet dat wanneer ons swak is, is Hy sterk in ons. 

Dankie dat julle vir Mari-Alena bid

Ons is so baie dankbaar. 

Michele Potgieter

Projekte rekening:

Standardbank,

Lynnwood Ridge tak (met kode 012445),

rekeningnommer 014330067 

in die naam Nuwe Dag

My persoonlike besonderhede:

Capitec

Savings Account Number: 1554335599

Branch: 470010

 SWIFT/BIC code (CABLZAJJ)

 International Sort/Routing/Clearing Code: 470010

Account number/IBAN: 1554335599

Mari-Alena Michelle Potgieter
Mari-Alena Michelle Potgieter
Gepubliseer op

Sendingnuus uit Oekraine: Oktober 2024

Oekraïne

Liewe vriende en familie

Met my hele hart wil ek vir julle dankie sê. 

Dankie vir elke brief van bemoediging, vir elke gebed vir elke bydrae. Ek waardeer dit oneindig baie!

Dit is vir my so kosbaar terwyl ek in Suid-Afrika is om mense wat die gebedsbrief ontvang raak te loop en te hoor hoe daar gebid word en ingetree word vir ons as gesin en vir die gemeente in Suid Oekraine. Die Here hoor elke gebed en Hy beskerm ons, Hy voorsien en sorg en gee ons Sy leiding. 

Die tyd hier in Suid-Afrika is werklik ‘n tyd van rus en ‘n tyd om weer opgebou te word. Ek ontvang soveel woord van bemoediging en versterking. Ek is so dankbaar teenoor Johan en Mariette van Highway gemeente by wie ek nou bly, vir hul gasvryheid en liefde. Ek is so dankbaar vir Anneke en haar ma tannie Flippie, wie se motor ek kan leen. Die Here is so goed en getrou. Ek sien elke dag hoe Hy voorsien en sorg.

Ek geniet Suid-Afrika so baie. Die mense hier is so vriendelik! Oral, in die winkels op straat. Ek beleef mense as warm en oop. Elke karwag en persoon in ‘n winkel. Dit is vir my so lekker om hier te wees! Ek weet nie of julle dit besef nie, maar hierdie is so ‘n vriendelike land. Dit is so wonderlik om deur die nag te slaap sonder sirenis wat afgaan, om nie in die nag af te hardloop in die bunker nie. Wanneer ‘n motorfiets vinnig en hard verby my skiet, skrik ek bietjie. Dit klink so bietjie na ‘n serene en die bromponies klink nogal baie dieselfde as die drones met hul 50 kg plofstof. Dan is dit so wonderlik om te weet dat ek maar kan ontspan. Ek geniet die groen en die reën wat af en toe val. In Oekraine kruip die winter nader en alles is reeds vaal en grys, nou dat die bome hul blare verloor het. 

Dit gaan goed met die gemeente in Suid Oekraine. Die leiers is so getrou, elkeen in sy bediening. Ek prys die Here en is so dankbaar so so ‘n getroue span. Ek het vanmore met van die leiers gesels. Alga vra dat ons asseblief sal bid vir genoeg vuurmaak hout vir die winter. Daar is min hout oor van verlede jaar. Dit is nog nie baie koud nie, maar diep in die winter is dit gewoonlik enige iets van tussen – 10 en – 24 grade.

Bid asseblief steeds vir die kleuterskool vir borge vir elke kindjie. Ons wil graag vir elke onderwyseres en elke assistent ‘n salaris gee wat meer is as die minimum salaris in Oekraine. Bid asseblief saam dat die Here die kleuterskool sal seen. 

Dit is al amper 1000 dae van oorlog in Oekraine! ‘n Duisend dae wat mense sterf in hierdie sinnelose oorlog. Dit is gewone mense soos ek en jy wat hul lewens verloor. Kindertjies wat in vrees lewe. Ons bid vir vrede in Oekraine. Ons bid vir ‘n wonderwerk. As die Here nie ingryp nie, kan dit net erger word met Noord Korea wat nou Rusland ondersteun. Bid asseblief. 

Sonneblomme en Sneeu is die week weer op die top 20 Afrikaanse boeke wat in Suid-Afrika verkoop is. Ek is so dankbaar dat die Here die boek gebruik in mense se lewens. Bid asseblief saam vir boek nommer twee. Dat die Here sal lei. Ek het verlede week met die uitgewer gesels. Die Here lê dit sterk op my hart om ‘n boek uit te bring oor Psalm 91 vir mense wat in vrees leef, met getuienisse van die Here se beskerming oor 28 jaar. Bid asseblief dat die Heilige Gees dit sal lei en dat mense se geloof vertrek sal word deur elke getuienis van die Here se getrouheid. Ek wil niks uit my eie doen nie. 

Bid asseblief vir my kinders. Bid asseblief vir H-J se beskerming. Hy is elke dag baie ure op die pad vir sy werk. Bid asseblief vir hom en An, dat die Here hulle sal seën. More, word verjaar H-J en word 28. Die geboorte van ons oudste seun, was vir my en O so kosbaar. 

Bid asseblief vir C en T wat in New Zealand is. 

C en T sal graag eerder in Santa Rosa in Amerika naby sy broers en O se ouers wil bly. Bid asseblief vir C vir ‘n pos wat hy as Bedryfs Ingeneur kan werk in of naby Santa Rosa. T, C se Oekraniese vroutjie se ouers woon ook as vlugtelinge nie ver van Santa Rosa af nie. 

Bid asseblief vir B C wat op die oomblik by Santa Rosa Christian Church is as jeugwerker. Hy het steeds ‘n hart vir Oekraine en bid dat die Here hom ook sal lei in sy toekoms. 

Bid asseblief vir M-A terwyl sy nou na ander moontlikhede en poste by skole begin kyk in Stellenbosch omgewing. Die kleuterskooltjie waar sy nou is, se salaris is so klein. Ons bid vir ‘n laerskool pos of vir ‘n kleuterskool waar sy kan groei en waar sy haarself kan uitleef. 

Bid asseblief vir I, dat die Here hom ook sal lei en sal wys waar hy volgende jaar moet wees. Hy wil steeds graag by sy broers in Amerika wees, maar as die deure nie vir hom oopgaan nie, sal hy moontlik saam met my na Oekraine terug keer. Bid asseblief dat die Here hom sal vertroos, versterk en hoop en Sy visie sal gee. I is nou 18 en maak skool klaar. 

Bid asseblief vir ons jongmanne van die gemeente wat in die oorlog veg. D se man, hulle het ‘n babadogtertjie. Bid vir D en S. S was vir die eerste paar jaar van sy lewe in ‘n weeshuis totdat S en T hom aangeneem het. Bid vir K wat as ‘n kind saam met sy boeties en sussies in ons huis gebly het. Hy is ook getroud en het ‘n klein seuntjie. Bid ook vir L se seun, wat in die voorste loopgrawe veg. Die winter is oppad en ek kan my net indink hoe koud en nat dit moet wees en om dag en nag blootgestel te wees aan die sneeu en reen. 

Bid vir die mans van Oekraine. Soms word hulle letterlik op die straat aangekeer, daar word ‘n sak oor hul koppe gesit, hulle word geboei en in ‘n wa gegooi om in die oorlog te gaan veg. Dit is hoe drasties daar na soldate gesoek word. Mens sien omtrent nie mans op die strate nie. 

Ons het die Here so nodig. Elke dag en elke oomblik. Hy is so naby en so goed en getrou. Hy is naby en niks kan ons van Sy liefde skei nie. Hy sê in Sy woord dat Hy ons dag na dag versterk. Die Here praat die week met my deur Efesiërs 4 en ek lees dit oor en oor. Ek lees dit in die Amplified Bible en ek sien in elke vers hoe die Here besig is om ons te vernuwe en te vul, dag na dag, hoe Sy krag in ons werk. Alle lof en eer aan ons Vader wat so lief is vir ons. 

Baie liefde en seen 

Dienswerker
Suid Ukraine

Projekte rekening:

Standardbank,

Lynnwood Ridge tak (met kode 012445),

rekeningnommer 014330067 

in die naam Nuwe Dag

My persoonlike besonderhede:

Capitec

Savings Account Number: 1554335599

Branch: 470010

 SWIFT/BIC code (CABLZAJJ)

 International Sort/Routing/Clearing Code: 470010

Account number/IBAN: 1554335599

Gepubliseer op

Sendingnuus uit Oekraïne

Oekraïne

Liewe vriende en familie

Baie dankie aan elkeen van julle. 

Dankie dat julle bid en dankie vir elkeen wat gee, elke bemoedigende woord, elke skrif.

Ek en die gemeente hier in Suid Oekraïne, die kleuterskool en elke persoon in Lig vir die Wêreld gemeente waardeer julle so baie.

Die Here sorg en voorsien. Hy bemoedig ons dag na dag en Hy beskerm ons.

Oorlog. Dit is so ‘n verskriklike woord. ‘n Woord wat jy in films hoor of in die geskiedenis van lees of plekke ver van ons. Hier in Suid Oekraïne is dit die woord wat jy heeltyd, die meeste hoor. Ek onthou, September 2021 op ‘n sorgelose somers dag het ek en my man saam met sy ouers Lviv besoek. ‘n Filmspan was besig om ‘n toneel in die pragtige ou dorp af te neem en die plein was in ‘n oorlogs toneel van die tweede wêreld oorlog omskep. Soldate, gewere, sandsakke, groot yster versperrings om tanks te keer. Ons het in verwondering deur gestap. Soos kinders deur ‘n toneel wat niks met ons te doen het nie. 

Min het ek geweet dat my hele lewe binne ‘n paar dae heeltemal sou verander. Ek, sonder my man en my pa in ‘n oorlog. Gister was dit drie jaar wat my pa oorlede is. Net ‘n paar dae voor my man. 

Net ‘n paar weke gelede was weer ek in Lviv. Verlede week sien ek op die nuus hoe die pragtige ou stad brand en sien foto’s van mense wat onder die puin uitgegrawe word.  Die aanval op Poltava alleen is daar meer as 50 mense oorlede en meer as 200 mense beseer. Met beseer dink mens partykeer net ‘n skrapie, maar dit is mense wat ledemate verloor of erg gebrand is. Ons harte is seer. Vanmiddag lui die klokke in Suid Oekraïne. Nog ‘n soldaat word vandag begrawe. Die pad van die kerk staan mense met Oekraniese vlae in hul hande. Party mense staan op hul knieë langs die pad terwyl die lykswa met die oop kis stadig verby ry. Niemand sê ‘n woord nie. Almal in die dorp praat sag asof hulle ‘n groot las dra. Mense se harte is seer. Hoe lank gaan dit nog aanhou is die vraag op elkeen se lippe. Dit is asof die oorlog net erger word. Mans probeer die land verlaat om nie te gaan veg nie. Mans word van die straat af geneem en weggestuur om te gaan veg. ‘n Jongman wat ons ken het deur die Donau rivier geswem om Oekraine te vlug. Elke jaar verdrink daar soveel mense in die rivier as gevolg van die strome wat mense intrek. Ek weet nie hoe hy dit reggekry het nie, maar hy was glo vir ‘n maand in Moldavie onwettig. Hy wou weer terug kom Oekraine toe, weer swem, maar is vanmore oorlede. Hulle sê dat hy van spanning oorlede is.

Dit is die realiteit van die van Oekraine. Ons het ‘n wonderwerk nodig. 

Die geveg oor Univermag, ons gebou gaan ook voort. 

Bid asseblief vir uitkoms om die hele gebou te onderhou, elektrisiteit en salarisse.

Ek kom D.V in Oktober/November in Suid-Afrika kuier en sien so baie uit daarna. As daar enige iemand is wat dalk asseblief vir my ‘n karretjie het in Pretoria of in die Kaap om te leen in daardie tyd sal ek dit so waardeer. Dit voel asof ek net op die regte tyd kom, en asof ek op my einde is. Oktober 11 is dit al drie jaar wat die Here vir my man kom haal het. Ek het weer finaal deur die Engelse weergawe vir Sonneblomme en Sneeu gewerk saam met Juliet en dit voel asof ek alles net weer so naby beleef het. Al die projekte vir die jaar is afgehandel. Die leiers gaan goed aan terwyl ek nie hier is nie. Ek voel rou seer binne. September maand voel altyd soos afsluit. Soos die laaste kuier saam met my man in Lviv voor ons Suid-Afrika toe gaan. 

1 September het die nuwe skooljaar in Oekraine begin. Ons het 9 nuwe kindertjies in die 2 tot 3 jariges se klassie. Bid asseblief Vir Raduga se finansies. Elke maand staan ons in geloof en verwondering oor hoe die Here voorsien. Elke maand uit ‘n ander oord, en mens lê in die aande wakker en wonder en wanneer jy somme maak, kan jy die hele nag wakker lê. Ons sukkel om aan die einde van elke maand almal se salarisse te gee. Hierdie volunteers van ons kry minder as die minimum salarisse in Oekraïne. Van hulle is enkel mammas en het heen ander inkomste nie. Ons wil so graag vir hulle ‘n behoorlike salaris gee. 

A is deur sy ma so mishandel toe hy klein was, daarom is hy nou blind. Hy is baie musikaal en het homself geleer om trekklavier te speel. Ons het vir hom ‘n elektriese klavier geneem en hy was baie bly. D was in Raduga toe sy klein was. Sy het so swaar gekry in soveel armoede en ouers wat drink. D is nou getroud en het ‘n baba van so 6 maande oud. 

Haar man is nou vir opleiding om in die oorlog te gaan veg. Sy huil, want elke dag sterf daar soveel mense. Ek verstaan dit nie, maar elkeen wat gaan veg moet sy eie helmet en borsharnas koop. ‘n Goeie kwaliteit een is verskriklik duur. Sy vra vir ons vir hulp. Sy stuur ‘n foto van haar man met die beskermende klere wat hy sal moet aankoop. Bid asseblief saam vir hom en ook vir T, die coffee shop se vorige kok. Sy is ook besig om vir haar seun geld in te samel. Hy veg ook in die voorste loopgrawe. 

Mens sien min mans in die strate. Die weermag stop enige iemand en stuur hulle om te gaan veg. 

Bid asseblief vir Suid Oekraïne. Bid vir Oekraine. Dit voel asof die dae donkerder word, asof daar geen einde aan die oorlog is nie. Maar die Here kan in een dag alles verander. 

Dankie dat julle bid

Baie liefde en seën

Medewerker vir Christus – Suid Oekraïne

Gepubliseer op

Sendingnuus: Oekraine

Oekraïne

Liewe Vriende en Familie

Ek wil net begin om uit my hart dankie te se. Dankie vir elkeen wat die gebedsbriewe lees en saam bid. Dankie dat julle saam op julle knieë gaan en intree vir die mense van Oekraine, vir Suid-Oekraine en vir Lig vir die Wêreld gemeente hier in Suid-Oekraine. Dankie dat julle ook vir my en my kinders en familie bid. Ek weet en ek glo dat die vurige gebed van ‘n gelowige groot krag het! Die Here is getrou en elke gebed hoor Hy. Hy is vir ons. Hy is so goeie Vader en weet wat ons nodig het nog voordat ons dit vra! Ek is so dankbaar vir elkeen wat op hierdie gebedsgroep is en saam bid, saam leef en omgee. Dankie vir elkeen wat ‘n bydrae maak om die koninkryk van die Here hier in Oekraine te versprei, maak nie saak wat of hoeveel dit is nie, ek waardeer dit oneindig baie! Ons leef in geloof en ek weet dat elke goeie gawe uit Vader se hand kom. Ek kan net getuig oor Sy goedheid. Hoe Hy werklik sorg en voorsien. Dankie vir elke boodskap, skif en brief. Die Here bevestig so baie keer vir my goed deur julle boodskappe, soms is daar soveel troos en word ek so versterk deur julle.

Dankie dat ek soms my hart met julle kan deel wanneer dit moeilik gaan en dat julle saam bly is oor elke oorwinning!

Dankie, dankie dankie! 

03:00 Vanmore het die sirenes weer afgegaan. Daar was 10 drones oppad na Suid-Oekraine. Elkeen dra ongeveer 50kg plofstof. Na ‘n uur het die drones rigting verander, waarvan 4 Suid-Oekraine getref het. ‘n Vyf verdieping woonstelblok is getref. Suid-Oekraine is so 65 km van Suid-Oekraine af. Van hulle het in Rominië verwoesting gesaai. Een was steeds oppad na Suid-Oekraine, maar het ook op die laaste oomblik rigting verander. 

Die Here hou Suid-Oekraine in Sy hand. 

More moet ons Suid-Oekraine toe ry na die Immigrasie kantore. Bid asseblief. 

Masada is verby en ons is so dankbaar vir elke jongmens se lewe wat die Here aangeraak het. Die hoogtepunt vir my was toe ‘n 17 jarige seun na die aanddiens na my toe kom met trane in sy oë en vir my se: Michele, ek is ‘n slegte mens, bid asseblief vir my. Wanneer iemand weet hy het gesondig en het die Here se vergifnis nodig is dit alles die moeite werd! Hy het Jesus verlosser en Redder aangeneem en toe ek vir hom sê dat daar nou in die Hemel blydskap is het sy oë gestraal. nie net hy nie, maar elke jongmens vir wie ek gebid het, het tot bekering gekom, elke aand. Dan ook die ander leiers. Amper al die kinders, behalwe een wat vir my gese het, sy gaan daarooor dink. Prys die Here vir elke lewe wat verander is. 96 Jongmense se lewens is verander. Dankie vir elke bydrae en elkeen wat die moontlik gemaak het.  

Die leierspan het so goed gedoen. Meeste van hulle is jonger as 20 en ek was regtig benoud hoe dit gaan wees sonder die mans wat nie kon saamgaan nie, aangesien hulle nie Suid-Oekraine wil verlaat nie. Mans word van busse afgeneem by die pad blokkades en net daar gestuur om in die oorlog te gaan veg. Die pad na die kamp het ons deur twee pad blokkades gery en nie een keer het hulle in die kar gesoek na mans nie.

W werk al vir meer as twee jaar in die coffee shop. Hy het partykeer kerk toe gekom, maar nog nooit ‘n oorgawe gemaak nie. Aangesien ons nie genoeg leiers vir Masada gehad het nie, moes ons vir W leier van die  speletjies en runnes span gemaak het. Dit was ‘n moeilike besluit. Hoe kan mens ‘n nie-Christen op jou leierskap span sit? Maar die Here het ‘n ander plan gehad. W was die perfekte persoon en op Masada, die eerste dag het hy uitgekom en het hy tot bekering gekom! Hy is verantwoordelik en nou so deel van ons span! 

Ons gee steeds van Maandag tot Vrydag vir die vlugtelinge kos. Mense wat alles verloor het. Party het by ons aangekom met net die klere aan hulle lywe. Huise is afgebrand en hulle het niks om na terug te keer nie. Hulle vertel vir ons hul verhale van hoe hulle vir hul lewens gevlug het en verby lyke wat in die pad le, hardloop met kindertjies aan die hand.  Soveel lewens en soveel seer. Met hierdie bediening staan ons op ‘n punt wat ons ‘n besluit moet neem. Die hulp wat uit Rominie gekom het, het opgedroog en ons vriende in Rominië kry nie meer die ondersteuning vir Oekraine nie. Baie mense vergeet van Oekraine en die oorlog en fokus op ander lande wat ook groot hulp nodig het. Ons stap ‘n pad met hierdie mense en hulle voel al soos familie. Hulle is so dankbaar vir elke bord kos. Die oorlog is steeds baie erg al sien mens dit nie meer op die hoof nuus nie. Die maand is ‘n kinder hospitaal deur ‘n missiel getref en op een dag reg oor Oekraine is daar oor die honderd gewone mense soos ek en jy dood. Moet asseblief nie ophou bid vir Oekraine nie. Vra asseblief jou gemeente en gebedsgroepe om aan te hou bid vir Oekraine en Suid-Oekraine. Ons staan egter op ‘n kruispad en moet besluit of ons voort gaan om vir die vlugtelinge kos te maak of nie. Want ons bron van inkomste vir die voedings program droog op, of het die Here ‘n ander weg. 

Oppad na Masada het ons motor langs die pad gebreek. Ons het die laaste paar honderd meter die motor gestoot tot by die kampterrein. Ons prys die Here dat hy net voor die kampterrein gebreek het!  Die kerk se bussie staan ook en is nou in Suid-Oekraine besig om reg gemaak te word. Ons het die bussie so nodig maar ek is benoud oor die dag wat hulle sê dat die bussie gereed is en dat ons hom kan kom haal, want dan moet ek dadelik betaal! Bid asseblief saam vir die regmaak kostes vir die voedtuie. Dit is soos ‘n berg voor my. Die grondpaaie in Suid-Oekraine is in ‘n erge toestand en ons bussie moet amper aftree. Hy kan nie meer nie. 

ons het ‘n wonderwerk nodig!

Ek sien op die internet hoe koud dit in Suid-Afrika is en ek sien die sneeu en reen terwyl ons weer hier in Oekraine die ergste somer in jare beleef. Ons het hierdie week temperature van tot 45 grade. Die mense wat hier woon sê dat hulle nog nooit so warm somer beleef het nie. Bid asseblief, baie mense beland in die hospitaal weens hitte uitputting. Dit is ‘n hitte wat alle energie uit jou tap. 

Bid asseblief vir die  in Oekraine. Ons het party dae net 3 ure elektrisiteit. Dan moet ons vinnig ons telefone laat laai en wasgoed doen. 

Bid asseblief vir A. Toe hy klein was. was hy in Raduga. Sy ma het hom na geboorte by sy ouma gelos om groot te maak. Toe hy twee jaar oud was, het sy ma hom weer kom haal om geld by die staat te kry aangesien sy ‘n enkel ma is. Hy het by haar gebly totdat hy vier jaar oud was.

A bly nou weer by sy ouma. Hy speel trekklavier en droom daarvan om ‘n klavier te hê. Ons sal hom graag binnekort wil verras met ‘n klavier. A het homself geleer om in die dorp rond te beweeg, sonder ‘n stok stap hy en tel die tree af. Sy gehoor is uiters goed en hy kan van ver af hoor of daar motors of mense naby is. Ek sien hom so selfverseker in die straat af loop, mens sal nie eers se dat hy totaal blind is nie. Bid asseblief vir hierdie pragtige skaam seun, dat hy genesing sal kry, fisies en geestelik. 

Bid asseblief vir Raduga vir finansies en borge vir elke kind.

Bid asseblief vir my, dat die Here my daagliks sal versterk en Sy vrede gee. Ek het Hom so nodig. Julie maand is dit ‘n maand van soveel eerstes. Julie maand 30 jaar gelede het O op sy eerste uitreik na Suid-Oekraine gekom. ‘n Jaar later in 1995 in Julie het ek die eerste keer op ‘n kort uitreik hierheen gekom en in Juliemaand 1996 het ons ons eerste doop geleentheid gehad en is Lig vir die Wêreld gemeente gebore.

Ek mis soms vir O soveel dat dit so seer is. 

Ek beplan om Oktober in SA te kom kuier. Ek moet ‘n nuwe visum en bestuurslisensie kry. Bid asseblief vir die finansies. 

Baie liefde en seën uit Suid-Oekraine

Michele Potgieter
Suid-Oekraine, Ukraine

Projekte rekening:

Standardbank,

Lynnwood Ridge tak (met kode 012445),

rekeningnommer 014330067 

in die naam Nuwe Dag

My persoonlike

besonderhede:

Capitec

MRS M POTGIETER

Savings Account Number: 1554335599

Branch: 470010

 SWIFT code (CABLZAJJ)

International Sort/Routing/Clearing Code: 470010

Gepubliseer op

Sendingnuus: Oekraïne Junie 2024

Oekraïne

(Nuusbrief ge-anomiseer ter beskerming van ons dienswerkers)

Liewe vriende en familie

Partykeer op ‘n dag soos vandag het ek die Here so nodig. Dan kyk ek op na die berge en ek weet waar my hulp vandaan gaan kom. Hy kom en Hy tel elke stukkende potskerf op en maak my heel. Hy gee vir my in hierdie vreeslike stilte die mooiste sonsondergang. Jesus. 

Verlede Maandag het ons die derde Gebedsontbyt geleentheid gehad. Al die pastore en kerkleiers van ons streek is na die spesiale geleentheid genooi. Die Adjunk raad leiers van die streek asook die burgemeesters van twee dorpe was teenwoordig. Die Amerikaanse ambassadeur van NAVU Kurt Volker was ook daar asook die spesiale teenwoordiger van die Amerikaanse staatsdepartement vir Oekraine was teenwoordig.  Dit was vir my so groot voorreg toe hulle my gevra het om die dag af te sluit en in Afrikaans te bid vir Oekraine en vir vrede in Oekraine.

Bid  asseblief saam vir vrede in Oekraine en vir die Here se beskerming. Die nuwe koring oes is gereed en die hawe gaan weer bedrywig raak, wat die suide weer ‘n teiken maak. Dankie dat julle intree vir my en die mense van die suide. Die Here is so getrou. 

Ons bussie en my kar gee weer probleme. Die bussie moet die week ingaan om reg gemaak te word, voor die jeugkamp begin.

Ek het nie ‘n sent om daarvoor te betaal nie en ek weet nie hoe ons dit gaan doen nie. Ek is baie dankbaar vir die bussie, maar hy is al so oud. Ons het hom tweedehands gekoop meer as 20 jaar gelede. Elke jaar moet ons so baie op hom spandeer om te laat regmaak aangesien hierdie paaie so sleg is. Bid asseblief saam met my vir ‘n voertuig vir die kerk. Al die kos vir die bejaardes in die gemeente word met hom rondgery asook en alle bedienings. 

Die manne ouer as 25 gaan omtrent nie uit hul huise nie, want mans word van die straat af geneem om oorlog toe gestuur te word. Niemand wil vrywillig gaan nie. Hulle noem die oorlog die vleismeule en alle planne wat ons probeer maak het deur die kerk het in duie gestort. Die weermag lag dit af. Indien die mans in Oekraine nie hulself gaan aangee om vrywillig in die oorlog te veg nie, moet hulle ‘n boete van 19 000 grivno betaal en die volgende maand 80 000 en indien hulle dit nie betaal nie, kan hul motors of huise afgeneem word en verkoop word om hul skuld te vereffen. Ons bid dat hierdie oorlog tot ‘n einde sal kon. Ons hoor van gevalle wat ‘n pa van die oorlogsfront bel en vra dat iemand sal gaan kyk wat by sy huis aangaan. Sy vrou het begin drink, omdat sy nie die spanning kan hanteer dat haar man se lewe elke dag in gevaar is nie en dat hulle klein kindertjies het. 

Drank is ‘n groot probleem in Oekraine. Natasia het ook weer vir maande aan mekaar begin drink.  Haar seun, Artiom van 18  het vir hulp kom vra. Natasia het opgehou eet en net gedrink en begin halusineer. Ek is na haar huis toe met ‘n verpleegster en ‘n sak met medikasie en ‘n drup. In die donker kamertjie, sonder elektrisieteit, het die verpleegster probeer om ‘n naald vir die drup in haar arm te druk onder my selfoon se liggie. Natasia was kwaad en het met die verpleegster baklei, tog was sy dankbaar dat ek daar is en begin huil en gesê hoeveel keer hy haar gehelp het, nou is dit ek wat haar kom help. Ek is net so dankbaar om hier te wees, juis in ‘n tyd soos nou. 

Ek, Madeleine en Juliette het saam met die veterane organisasie die maand soveel mense by hulle huise besoek. Daar is net soveel mense wat alleen is, wat honger is vir gesels en versorging. Ons het onder andere ‘n ouma van in die 90 gaan besoek wat alleen bly, sy kan skaars loop. Ons het vir haar ‘n groot sak kos geneem asook ‘n audio Bybel wat met sonkrag werk. Al vyf haar kleinseuns veg in die oorlog. Sy huil wanneer sy praat. My hart breek elke dag vir die mense van Oekraïne. Julle verstaan net nie hoe erg dit gaan nie. Elke dag gaan daar mense dood en die wêreld het vergeet. Dit kom nie eers meer in die nuus nie. Elke dag is daar woonstelblokke wat uitmekaar geskiet word. Vandag is daar net in Kharkiv 8 mense dood en so baie beseer. 

Hoe lank kan dit so aangaan? Bid asseblief vir hierdie bejaardes in ons dorp vir bekering. Ons het lekker gekuier by die Kaptein. Hy is 84 en was skeepskaptein baie jare gelede. Hy woon alleen op die vyfde vloer van ‘n woonstel en kom oor die weg met ‘n rolstoel as hy die dag wil uitgaan. Ons het ook vir hom ‘n audio Bybel gegee en hy is baie opgewonde en sien reeds uit na ons volgende besoek. Hy het geen Bybelkennis nie en ons neem baba stappies met hom. Moesia het gister weer die evangelie met hom gedeel en ons bid vir hom. Op ons lysie is 60 bejaardes en sover het ons by 26 uitgekom. Amal in hul 80’s. Party kan nie beweeg na beroertes nie en is so dankbaar en meeste van hierdie mense huil sommer net en sê: Dankie dat julle nie van my vergeet nie. 

Ons het die maand op internationale Kinderbeskermings Dag ook die sentrum vir kinders met spesiale behoeftes besoek met Mickey mouse en roomys! Ons het vir hulle ‘n spesiale program aangebied en dit is so wonderlik hoe ons jong mense verhouding bou met hulle “Night To Shine” vriende. Ons prys die Here vir elke oop deur.

De oesveld is so gereed en die arbeiders min. 

Bid asseblief vir die kleuterskool. Ons het meer kindertjies ingekry en moet dringend nog ‘n onderwyseres aanstel. Daar was Vrydag ‘n baie oulike onderwyseres vir ‘n onderhoud, maar sy sien nie kans om vir so klein salaris te werk nie. Die minimum salaris in Oekraine is 8000 grivna en ons kan nie meer as 7000 aanbied nie. Ek weet nie wat om te doen nie. Bid asseblief vir uitkoms vir die kleuterskool, vir ‘n borg vir elke kindjie. Ek weet nie wat om te doen nie. 

Bid asseblief vir die jeugkamp wat 1 Julie begin. 

88 jongmense en meeste van hulle ken nie die Here nie. Ons leiers is so min en ons spanne gaan groot wees omdat die mans bo 25 nie uit die suide kan gaan nie. Bid asseblief vir hierdie jong leiers. Ek voel soos Gideon wat met so min mense so groot geveg moet gaan veg, maar ek weet wie veg vir ons. Die Here is altyd getrou en ons kan dit net in Sy krag doen. 

Bid asseblief vir voldoende finansies vir die kamp. Die onkostes is baie meer as wat ons in die begin uitgewerk het, aangesien die kamp die jaar ‘n dag langer gaan wees. Ons is 110 mense wat gaan. As ek daaraan dink, raak en benoud, maar die Here sal voorsien. Ons loop weer op water en in geloof. Ons moet ook ‘n projektor kry vir die kamp aankoop. Daar is soveel goed, te veel vir my. Maar ek gee dit alles net in die Here se hande en ek vra julle om asseblief saam met my te bid.

Bid asseblief vir die twee voertuie se herstel. Laas jaar was elke voertuig meer as R40 000

Bid asseblief vir ‘n nuwe bussie.

Bid asseblief vir voldoende finansies vir die Jeugkamp. 

Bid asseblief vir Natasia en Artiom haar seun.

Bid vir die oorlog om te stop. Bid vir die vroue en kindertjies in die oorlog.

Bid asseblief vir my, vir krag, wysheid en ook vir finansies.

Bid ook asseblief vir die Kleuterskool vir finansies.

Ek kyk na die Here en sal nie oorweldig word nie. Hy is my hulp en Hy is my man en ek vertrou net op Hom. 

Baie liefde en seen uit die Suide van Ukraine

Dienswerker in Oekraïne

Gepubliseer op

Oekraïne: Nuusbrief en gebedsversoeke vanaf Michele van die Oekraïne – Augustus 2023

Liewe vriende en familie

Ek wil begin om dankie te sê. Baie dankie vir elke persoon wat bid en intree vir ons en vir Reni asook vir Oekraïne. Ek weet dat die gebed van ‘n gelowige groot krag het. Dankie vir elke bydrae en ondersteuning vir die werk in Reni, asook vir ons as gesin. Ek waardeer dit oneindig baie. 

Ek dink so aan Psalm 23

 Die Here is my Herder. Niks sal my ontbreek nie.

Hy laat my neerle in groen wyvelde, na waters 

waar rus is lei Hy my heen. 

Hy verkwik my siel.

Om in Suid-Afrika te wees is soos die wyvelde vir my en elke keer wat ek met iemand kuier, verkwik Hy my siel deur my vriende en familie. Dit is so groot voorreg om hier te wees. Ek weet dat Suid-Afrika ook sy probleme het, maar ek geniet elke oomblik. Elke geleentheid wat ek kry om te deel, is my hoof doel om oor die Here se goedheid en getrouheid te getuig en dat Hy verheerlik word. Soms is dit by heel wêrelse geleenthede. Verlede Vrydag was ek na ‘n dans konsert wat by ‘n universiteit in Johannesburg aangebied is, juis oor Oekraine en die stryd waardeur Oekraine gaan is in dans vorm uitgebeeld. Daar was heelwat studente en hooggeplaasdes van die universiteit, asook ‘n moslem vrou. Hulle het my gevra om bietjie te vertel. Ek kon deel oor die Here se getrouheid en Sy beskerming. 
Heelwat mense het na die tyd kom gesels. 

Elke besoek aan ‘n gemeente is vir my so bemoedigend. Elke woord en gebed bêre ek diep in my hart vir die dae wat voorlê en wat ek dit nodig mag hê. 

Dit is met groot dankbaarheid aan die Here en aan elke persoon wat Sonneblomme en Sneeu in Oekraine gekoop het. Hy was verlede week nommer 11 op die top 100 Nielson lys wat alle boeke by alle winkels in Suid-Afrika verkoop is vir week 33 van 2023. Vanaf Maandag 16 Oktober elke aand net na 7nm aandnuus op Pta FM gaan hy deur Estelle Zeeman voorgelees word. 

In Reni is dit ‘n ander storie. Hou asseblief aan met bid. Reni hawe is 2 keer die afgelope aand getref. Tanya vertel dat hulle die hommeltuie bo ons huise in die donker sien vlieg terwyl die weermag dit in die donker probeer skiet en vernietig, maar hulle het net twee groot ligte waarmee hulle hom in die donker nag soek. Elke hommeltuig veroorsaak ‘n groot ontploffing in die graan skure. Dit is baie hartseer. Dit hou aan tot in die vroeg oggend ure en niemand in Reni kan slaap nie.  Alex stuur vir my ‘n video van ons jeug Sondagaand aan. Daar is oor die 50 jongmense. Met die gemeente gaan dit ook goed. Die leiers maak beurte om Sondae woord te bring en hulle gaan getrou voort met die woord.

Bid assebief vir Raduga kleuterskool vir finansies. Ons moes die besluit geneem om van die onderwyseresse te laat gaan, na ‘n paar maande wat ons nie voldoende finansies gehad het nie. Verlede maand het Wikus en Jubilee gemeente ons gehelp om die maand te kon afsluit. Bid asseblief vir ons vir uitkoms. 

Ek en Ivan beplan om die tweede helfte van Oktober terug te vlieg na Reni, deur Roemenië. Bid asseblief vir finansies vir ons visums asook die vliegkaartjies. Die kaartjies is verskriklik duur omdat dit na Roeminië is. 

Terwyl ek vir ‘n boek bekendstelling in George was, was ek een dag in Grootbrak by ‘n gemeente en na die geleentheid het ek sommer Kleinbrak toe gery. Sommer na die huis toe waar ons met Ockert die laaste paar dae gebly het. Die huis was toe en die gordyne was dig toegetrek. Ek het afgestap tot by die hekkie wat na die strand lei. Die strand waar ek voor die Here gehuil het, die plek waar die Here vir my gesê het om terug te gaan Oekraïne toe. Die plek waar die Here my weer opgetel het en Sy beloftes gegee het. Dit was moeilik om weer daar te wees, maar my hart was ook vol dankbaarheid vir die manier hoe die Here my gedra het en vertroos het en die diep werk wat Hy in my lewe doen. Die troos en genesing wat ek reeds ervaar het. 11 Oktober gaan dit twee jaar wees wat ek sonder Ockert is. Ek mis hom nog elke dag en maar die Here het reeds ‘n diep werk in my gedoen. Om die boek te skryf was vir my vetroostend en genesend, om weer deur elke emosie te gaan. 

Ek dank die Here dat Jy elke oomblik by my is en dra. 

My nessie raak leeg. Benjamin ook is in Santa Rosa waar Hannes-Joshua is asook Ockert se ouers en my skoonsussie Rynie en haar man Keith woon. 

Bid asseblief vir Mari-Alena wat die jaar klaar maak met haar studies in Onderwys vir grondslagfase. Sy wil graag in of om Stellenbosch omgewing ‘n pos hê. Bid asseblief dat die Here vir haar deure sal oopmaak by die regte skool. 

Dankie dat julle bid. Baie liefde en seën 

Ek is môre, Sondag 3 September by Kononia gemeente in Modimolle 8:30

10 September in Klerksdorp by NG Doringkruin

17 September in Bloemfontein by Kairos gemeente

19 September (Dinsdag) sal daar ‘n boekbekendstelling wees in Somerset Wes by Helderberg gemeente. 10:00

Begin Oktober gaan ek ‘n draai maak in Upington 

Michele Potgieter
Reni, Ukraine

Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag

My persoonlike besonderhede:
Capitec
MRS M POTGIETER
Savings Account Number: 1554335599
Branch: 470010

Gepubliseer op

Nuusbrief en gebedsversoeke vanaf Michele van Oekraïne

Liewe vriende en familie.

Hierdie brief is in twee dele geskryf, vandag en eergisteraand in Turkye. 

Ek begin eers met vandag, 25 Julie.

Ons het gister oggend hier in Kaapstad geland. Ons het geen internet toegang gehad nie, maar die oomblik toe ek toegang gekry het, het die skokkende nuus deurgekom. Reni is in die nag aangeval deur hommeltuie en daar was 7 groot ontploffings in die hawe. Ses persone is beseer en een persoon is in Intensief opgeneem. Die graan silos waar koring bewaar word is uitgebrand. 

Ek het dadelik vir Tanya gebel. Sy was bleek en het moeg gelyk. Hulle het die hele aand nie geslaap nie. Die laaste ontploffings was 6 uur die oggend. Van ons mense werk by die hawe asook haar seun Gena. Hy het dadelik op sy motorfiets huistoe gery en almal het gevlug. Die twee jong meisies wat in ons huis bly het die hele nag in die voorportaal gesit. Die dag wat ek in Suid Afrika land het hulle op Reni begin skiet. Ek is so jammer dat ek nie nou daar is nie. Die gemeente het gisteraand bymekaar gekom om saam te bid. Ek voel asof ek gevlug het, maar ek rus daarin dat die Here ons tye bepaal. Mari-Alena sê ook vol trane, “Mamma ek moes nou daar gewees het vir my maats.” 

Die nuus sê dat die afgelope week 60 000 ton se graan verbrand is die afgelope week in Oekraïne. 

“Odesa head Oleh Kiper, whose region also covers the Danube ports of Reni and Izmail, said in his Telegram channel that Russia had attacked the infrastructure there for four hours with Iranian-made drones.

He said a grain hangar and tanks for storage were destroyed. Other local officials say three warehouses were bombed.

Three drones out of about 15 involved in the attack were destroyed by air defences.”

In Turkye:

Ek lees vanmore hierdie gedeelte terwyl ons vir ons vliegtuig hier in Turkye wag:

Die gebed van Paulus vir die Efesiërs

14Daarom kniel ek in gebed voor die Vader 15aan wie die hele gemeenskap van gelowiges in die hemel en op die aarde sy bestaan te danke het. 16Ek bid dat Hy deur sy Gees uit die rykdom van sy heerlikheid aan julle die krag sal gee om innerlik sterk te word, 17dat Christus deur die geloof in julle harte sal woon en dat julle in die liefde gewortel en gegrondves sal wees. 18Mag julle in staat wees om saam met al die gelowiges te begryp hoe wyd en ver en hoog en diep die liefde van Christus strek. 19Mag julle sy liefde ken, liefde wat ons verstand te bowe gaan, en mag julle heeltemal vervul word met die volheid van God.

20Aan Hom wat deur sy krag wat in ons werk, magtig is om oneindig meer te doen as wat ons bid of dink, 21aan Hom kom die eer toe, in die kerk, deur ons verbondenheid met Christus Jesus, deur al die geslagte heen tot in alle ewigheid. Amen.

Ek besef dat die Here ons Sy liefde wil wys en dat ons dit kan sien en begryp, hoe groot Hy is en hoe goed Hy is vir ons en dat Hy ons daagliks versterk. Ek kyk terug na die afgelope maand en sien hoe die Here werk en ek staan in verwondering.

Masada is verby en ek kan net alle eer aan die Here gee. Hy werk in elkeen se lewe. Daar was 72 jongmense en 20 leiers. Meeste van die jongmense het nie die Here geken nie en nie ‘n idee van wat in die Bybel staan nie. Daar was ‘n groep seuns wat van die eerste dag af gekom het met heeltemal ander bedoelings. Hulle het drank saamgebring asook iets wat hulle gerook het. Hulle het by die aand beeenkomste, bymekaar gesit en ondelangs gesels en aanmerkings gemaak wat verskriklik steurend was. Ek het hulle probeer ignoreer en net liefde gewys.  Benjamin het die eerste aand gedeel en die tweede aand het ek gdeel oor Jesus se offer aan die kruis en wat dit vir ons beteken.  Hulle het begin stiller raak en elke aand het hut van hulle uit gekom vir gebed. Teen die laaste dag het die hele groep uitgekom om te getuig. (foto) Hulle het elkeen vertel dat hulle die tot bekering gekom het. Een van die ouens het die mikrofoon geneem en gese: “Die eerste twee aande het ons gedrink en gevloek in ons kamer, die derde aand het ons saam die Onse Vader gebid!” Dit was een van die hoogtepunte vir my van die 27 jaar in Reni. Sondag was hulle in die kerk en het van hulle weer uitgekom en getuig oor wat die Here op Masada in hul lewens gedoen het. Die Here het wonderbaarlik vir Masada voorsien. Dankie vir elke bydrae. Ons waardeer dit oneindig baie! Dankie dat julle gebid het, die Here het ons gebede verhoor. 

Bid asseblief vir tuta Moesia. Sy was ons heel eerste bekeerling in 1996, voor ons troue in Reni, met my eerste uitreik. Moesia is vir my soos ‘n ma en vir my kinders soos hul Oekraniese ouma. Sy is in die hospitaal en het groeisels wat in haar vrouedele wat dringend verwyder moet word. Die dokters is versigtig om haar te opereer en weet nie of haar hart deur ‘n operasie gaan kan hou nie. Die operasie gaan ongeveer ‘n 1000$ kos wat ons nie het nie. Bid asseblief vir uitkoms en vir genesing. 

Odessa is gisteraand weer hard getref en in die middestad was daar heelwat ontploffings. Bid asseblief vir Odessa, Reni en dat die oorlog sal stop. ‘n Pragtige ou Ortedokse kerk is getref en asook woonstelle waar mense rustig gelaap het. Odessa is ongeveer 400km vanaf Reni, maar nog nader soos die kraai vlieg. 

Ek sien uit om in Suid-Afrika te kom kuier, maar my hart bly agter in Reni. Hierdie Saterdag 09:30 is ek by Highway gemeente in Centurion vir die eerste boekvrystelling. Die 12de is ek in George by Exclusive Books by die Mall. 

Ek gaan ook ‘n paar gemeentes besoek en sal die datums en tye later deurgee. Dankie vir elkeen wat Sonneblomme en sneeu gekoop het en lees en dit ook met ander deel. Die maand was hy in die top 10 van verkope van nie-fiksie by Graffiti Boeke en onder die top 20 van ander plekke. Ek is baie dankbaar hieroor en gee aan die Here alle eer. Mag die Here verheerlik word, want Hy is so goed vir ons. 

Baie dankie dat julle saam met my hierdie pad stap, dankie vir elke gebed en elke manier van ondersteuning. 

Liefde en seën 
Michele Potgieter 

Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag

My persoonlike besonderhede:
Capitec
MRS M POTGIETER
Savings Account Number: 1554335599
Branch: 470010

Gepubliseer op

Sendingnuus: Oekraïne – Michelle skryf vir ons uit Oekraïne

Kiev Oekraïne

Gebedsbrief Junie 2023

Liewe vriende en familie

Baie dankie vir elke gebed. Dankie dat jy deel is van die werk wat die Here hier in Reni doen. Dankie vir elke boodskap en bemoediging. Dankie vir elke bydrae vir Masada. Ons is oneindig dankbaar. 

Ons staan op die vooraand van so baie goed wat gebeur. Die Here is so goed en getrou.

Verlede Sondag gee die Here drie keer vir my deur verskillende mense dieselfde woord uit Joshua 1:

Wees sterk en vol moed. En weer later; Wees sterk en vol moed, wees nie bevrees of verskrik nie, want die Here jou God is met jou oral waar jy heengaan. ‘n Mens hoor dit, neem dit in, maar dit is partykeer so moeilik om toe te pas.

More begin Masada jeugkamp. So gou vergeet ek om dapper te wees. Die eerste Masada sonder Ockert. Daar is soveel reëlings en die voorbereiding is intens.  Meer as ‘n honderd jongmense vir ses dae. Alles word tot op die minuut uitgewerk. Die leier span help en elkeen doen sy deel, maar ek mis vir Ockert. Sy wysheid en die manier hoe hy die kamp georganiseer het. Ek mis my maatjie. Daar is so baie goed om aan te dink, maar ek kry op sy rekenaar programme, alles om aan te dink, sy “moenie vergeet nie lysie” vir Masada. Ek het nie ‘n idee gehad wie die video’s die jaar gaan maak wat Ockert elke jaar so goed gedoen het nie. Elke dag se tema video is so deel van Masada. Gister was ons Izmaiel toe om aankope te doen vir Masada. Op pad terug huis toe begin ‘n migraine my beetpak. By die huis vind ek uit dat die deur toegesluit is en almal weg is kerk toe om vir Masada gereed te maak. Ek sit buite die huis op ‘n bankie en kan die pyn nie verduur nie. Edik, Jura en Zina se seun bring vir my die huis se sleuter en vra of hy vir my kan bid. Hierdie jong seun wie se eie ma hom na geboorte in ‘n boksie buite iemand se huis gelos het, salf my en bid vir my. Ek kom lê op die bed en krul van die pyn. Alles wat ek inneem kom net weer uit. Ek kan nie eers ‘n pil binne hou nie. Masada staan soos ‘n berg voor my, ons visums vir Moldavie staan voor my. Sonder die visums kan ons nie uit Oekraine gaan nie. Al die finansies vir Masada is nog nie in nie en ek het nie ‘n idee hoe ons vir alles gaan betaal nie.  Ek voel ek wil aan niks dink nie en roep net, “Here help my.” Na 12 gisteraand lig die migraine en ek staan op. Die Here herinner my aan Sy woord, Hy sê weer vir my dat Hy by my is en dat ek sterk moet wees.

 Ivan se vir my, “Mamma, ek sal die video’s afneem en maak.” Vanmiddag kom wys hy sy video’s vir my. Ek is sonder woorde! Perfek! Kunstig en so goed gedoen. Die Here is so getrou! En so sorg die Here vir elke klein dingetjie. 

My eerste Masada sonder Ockert, ons het soveel herinneringe by die kampterrein. Soveel pret en lag, sit om die vuur in die aande en warm sjokolade drink. Die mooiste sonsondergang oor die Jalpug meer. Elke jaar was ek en Ockert in verskillende spanne wanneer die leiers ook deur die “Dirty Games” gaan. Ons was gewoonlik van kop tot tone in modder of meel en eier besmeer. Elke jaar het Ockert se span gewen!  Ockert het alles gedoen, Masada het soos ‘n geoliede masjien gewerk. Nou het ek net die olie van die Heilige Gees so nodig.  

Ek het die Here so nodig in hierdie week wat kom. Bid asseblief vir al die leiers van Masada, vir eenheid, wysheid en om Jesus se lig te skyn. Meeste van die leiers is nog jonk, so baie jeug leiers is land uit met die oorlog.

Bid ook asseblief vir die situasie by die Zaparozhzhia kernkragsentrale. Die Russe wat dit beset het het begin om te onttrek en daar is gevaar dat daar ‘n groot kern ongeluk kan plaasvind. Ons is so 7 ure se ry van die kragsentrale. 

Bid asseblief vir elke jongmens. Dat die Here elkeen sal aanraak. Bid vir bekerings. Bid asseblief vir die Here se beskerming, dat niemand seerkry tydens die speletjies nie.

Die burgemeester stuur polisie om die vier busse te vergesel tot by die kampterrein. 

Ons het ‘n wonderwerk nodig. Bid asseblief dat die Here sal voorsien vir al die uitgawes vir die kamp. Die busse werk baie meer uit as wat ons beplan het. 

Bid asseblief vir tuta Moesia wat met hoe bloeddruk en duisligheid nie kan saam gaan Masada toe nie. 

Dankie vir elkeen wat Sonneblomme en Sneeu gekoop het. Hy was die afgelope twee weke onder die top 20 nie-fiksie boeke in Afrikaans in Suid-Afrika. Prys die Here en aan Hom al die eer.

Baie liefde en seen uit Reni.

Michele

Michele Potgieter
Reni, Ukraine

Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag

My persoonlike
besonderhede:
Capitec
MRS M POTGIETER
Savings Account Number: 1554335599
Branch: 470010
SWIFT code (CABLZAJJ)

Gepubliseer op

Oekraïne Nuusbrief vanaf Michele – Reni Gebedsbrief Mei 2023

Liewe vriende en familie

Net gou vra, indien daar op die Gebedsbrief gereageer word, stuur asseblief ‘n epos vir my na nuwedag@gmail.com   anders gaan jou brief na almal op die gebedslys terug gestuur word. 

Dankie dat julle bid en dankie vir elke brief, oproep en bemoediging. Ek waardeer dit oneindig baie.

Die Here is so goed en getrou. 

Sondag aande is soms die moeilikste. Ek weet nie hoekom mens dan juis so verlang nie. Wanneer die duisternis soos ‘n kombers alles om mens toevou, trek verlange so hard aan my hart. Ek mis vir Ockert so verskriklik baie. Daar is soveel goed wat ek met hom sal wou deel, maar ek deel dit met my Vader en Hy versterk my elke dag. Maandag oggend is alles weer nuut en die Here gee ‘n nuwe week met nuwe uitdagings en moontlikhede. Hy kom en gee mens weer vreugde en soveel vrede. Ek sit net in stilte en wag in Sy teenwoordigheid. Hy gee skrif en Sy liefde vul my hart dat ek so veilig voel in Sy teenwoordigheid. Hy is genoeg. Sy liefde is in oorvloed en bring troos en vrede. 

Love Reni is verby en ons het soveel nuwe vriende gemaak. Ek kon van die skoolhoofde beter leer ken asook van die onderwyseresse. Drie onderwyseresse van verskillende skole het met my oor die Here gepraat en gesê dat hulle Sondae na ons aanlyn diens kyk. Een het gesê dat sy so rustig voel terwyl ons sing en dat sy die woord geniet. Sy se daar kom so vrede oor haar, wat sy nie kan beskryf nie. Dan dink ek, dit is alles die moeite werd! 

Van die skool kinders wil graag na Masada jeugkamp gaan wat vanaf 3 tot 8 Julie plaas gaan vind. Bid asseblief vir elke jongmens wat gaan, dat die Here elkeen sal aanraak.

Bid asseblief vir genoeg finansies vir Masada.

Die Here is so getrou en een vliegkaartjie na Suid-Afrika is reeds gedek! Dankie vir ons gebedsvriende wat so bygedra het. Ons waardeer dit baie. Ek en Ivan beplan om net na Masada Suid-Afrika toe te kom vir die boekvrystelling wat in Pretoria en George gaan plaasvind. In Pretoria gaan dit moontlik op 29 Julie by Highway gemeente in Centurion wees en weer 12 Augustus in George by Exclusive Books wees.  “Sonneblomme en Sneeu” is reeds op die rakke by die meeste boekwinkels soos Bargain Books, PNA en CUM boeke.  Indien dit nie by die boekwinkel naby jou beskikbaar is nie, vra asseblief of hulle dit kan bestel. 

My gebed is dat die Here verheerlik sal word op elke bladsy en dat mense se geloof versterk sal word wanneer hulle ons getuienis lees van die Here se getrouheid. 

Daar is steeds drie klein kindertjies wat by ons in Raduga bly en oorslaap. Hul ma het geboorte gegee aan ‘n 4de baba en sy het die kindertjies alleen by die huis gelos wanneer sy met vriende gaan drink het. Sosiale dienste het die kindertjies na ons gebring. Die kleinste kindjie is ‘n jaar oud en daarna twee, drie en vier jaar oud. Elke jaar het sy ‘n baba gehad. Die mamma het tot sy geboorte gegee het ook in Raduga gebly. Ons stap ‘n pad met haar en leer haar om haar kindertjies te versorg en na hulle te kyk. Na ‘n paar maande sien ons verandering in die mamma. Gaar naam is Aliona. Bid asseblief dat sy haar leefwyse sal verander. 

Bid asseblief vir ons beskerming, vir Reni en vir Lig vir die Wêreld gemeente, vir herlewing in hierdie donker tye. 

Michele Potgieter

Reni, Ukraine

Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag

My persoonlike
besonderhede:
Capitec
MRS M POTGIETER
Savings Account Number: 1554335599
Branch: 470010
SWIFT code (CABLZAJJ)

—

Michele Potgieter
Reni, Ukraine

Gepubliseer op

Sonneblomme en sneeu in Oekraïne

Boek Michele Potgieter

Nadat Ockert en Michele Potgieter getroud is, het hulle hul tasse gepak en vertrek Oekraïne toe. Dit is ’n groot ontnugtering vir Michele in die begin maar die mense is baie vriendelik en hulle word meestal met oop arms verwelkom. Maar dan sterf Ockert tydens die Covid 19-pandemie tydens ’n besoek aan Suid-Afrika. Michele moet besluit of sy teruggaan Oekraïne toe, waar ’n oorlog dreig en of sy in Suid-Afrika bly.

ISBN: 9780796323231

Uitgewer: Lux Verbi

Datum: Mei 2023

PRYS (Inkl. VAT): R 250.00

Beskikbaar by:

https://www.nb.co.za/mg/booksellers

Gepubliseer op

Oekraïne: Nuus van Michelle Potgieter uit Reni

Liewe vriende en familie

Hierdie is ‘n ander wêreld as wat ek en Ockert saam geken het, ‘n ander Reni en ‘n ander Oekraine. 

Die sorgelose dae van twee jaar gelede is vergete en om ons is daar oorlog, hartseer en soveel vrees. Ek ry Reni alleen binne en in my geestesoog sien ek die Reni van jare gelede. Die dae van vrede en vry wees. Die laning bome in die laatmiddag son. Vrede, rustigheid. Nou is dit padblokkades, soldate, gewere en loopgrawe. Groot yster versperrings in die paaie wat soos dubbeltjies oor die pad verstrooi is en waardeur jy stadig moet vleg. Die vragmotors wat by die hawe wag, trap diep modder spore langs die pad en versper die bad buite Reni. Soms sit ons vir twee ure voor ons Reni kan binne ry. Dit is ‘n ander wêreld. Ek leer om boontoe te kyk. Om oor dit alles te kyk en my vrede te soek in die Here in ‘n tyd van oorlog. Om te bly staan en in geloof op die water te loop. Ek leer om te vertrou en op te kyk om elke sonsondergang te waardeer en nie in die modder en hartseer om my vas te kyk nie en om hoop te bring in Jesus en vrede uit te spreek oor die wat bitter en sonder hoop is. 

Ons skuil onder die vlerke van die Allerhoogste. Hy bly getrou en Ek weet dat Sy arms om ons is en dat Hy ons beskerm. Ons vertrou net in Hom en leer om ons oog net op Hom te hou en nie na die golwe om ons te kyk nie. 

Van die vlugtelinge vanuit het alles verloop. Man, kinders, huise staan nie meer nie. Van hulle is kwaad vir die lewe en bitterseer. Elke dag kom eet hulle by ons saam met soveel ander wat alles verloor het. Hulle pak uit en huil en verwoord hoeveel soveel ander se voelens. Ek vertel van Jesus se liefde, van ‘n Vader wat haar styf vashou en soveel vir hulle omgee. Van Jesus wat Sy lewe vir hulle gegee het en nou vir hulle sorg. Van die vyand wat kom steel, doodmaak en verwoes. Dag na dag, maand na maand sien ons ‘n verandering. Harte word sagter, hulle kry weer hoop. Ons bly waarheid saai. Die Here is getrou en dra ons. Hy hou ons styf vas. 

Soms spoel die verlang soos ‘n golf oor my kop en soms vergeet ek net. Dit is makliker so. Partykeer gaan ek dae net aan sonder om te diep te dink. Party dae moet ek my verlang en mis in die oë kyk en dit hanteer, maar ek wil nie daardie paadjie afloop nie, ek vermy dit. Wanneer ek dit wel doen kom die Here en vertroos my en hou my vas. Hy is so getrou en gee elke dag nuwe krag en vreugde.

Ons is nou in die middel van Love Reni. Elke dag die afgelope week het ons skole besoek. Elke skool ontvang ons met ope arms, behalwe een skool. Die hoof was vriendelik, maar ongemaklik en het verskoning gemaak dat hulle te besig is om die jaar aan Love Reni deel te neem. Hy het gese dat die kinders nie aan Love Reni wil deelneem nie en hulle nie belangstel om in die video-kompetisie deel te neem nie. Maar die kinders het vir ons gese dat hulle baie graag wil deelneem. Eers later het ons uitgeving dat die priester van daardie dorpie se Ortedokse kerk, teen ons kerk is en teen Love Reni is. Hy regeer die dorpie en daarom was die hoof so ongemaklik. 

In Limanskaya se die hoof gister vir my, “Dankie dat jy met Ockert se werk voortgaan. Love Reni is al waarna ons kinders elke jaar uitsien.”

Vrydagaand die 12de Mei gaan die Gala konsert en prysuitdeling vir die wen-video in die park plaasvind. Bid asseblief dat die Here die geleentheid sal seen. 

Die 19de Junie begin Masada jeugkamp. Ons is reeds besig om te beplan en bid dat die Here dit ook sal seen. Ons beplan in geloof. Ons loop op die water. Ons het huidiglik nie die finansies vir Love Reni se prysuitdeling of vir Masada jeugkamp nie. Bid asseblief saam met ons. 

Maandag het die streekshoof my uitgenooi na ‘n Gebedsonbyt wat gereel is vir die volunteers in Izmail streek. Daar was priesters met lang swart gewade en hoë hoofbedekkings asook soldate en belangrike parlementslede. Ek het so klein soos ‘n wurmpie gevoel toe hulle my vra om ‘n gebed in Oekrainies voor te lees. Dit het gevoel asof my hart het amper by my keel wou uitgespring terwyl en lees, so bang dat ek reg lees en dat mense sal verstaan. Ek kon net voel hoe die here oorvat en was baie bly toe dit Psalm 91 is, wat ek eintlik uit my kop, of liewer hart ken. Ek kon voel hoe die Here my versterk en alle vrees wegneem. 

Vir die eerste keer in 27 jaar het ek die hospitaal in Reni as pasient besoek. Die dokter het vermoed dat ek ‘n maagseer het en het my ‘n kameratjie laat sluk. Die medies hier lyk steeds soos iets uit ‘n ou film, net na die tweede wêreldoorlog. Kaal grys gange met dowwe ligte. Na my besoek aan die hospitaal was ek vir ‘n week buite buite aksie. Die hele ervaring was vir my nodal traumaties en dankbaar dat dit my eerste keer was wat ek die hospitaal nodig gehad het na 27 jaar. 

Bid asseblief vir gesonheid en krag.

Mense vlug uit Odessa. More 9 Mei, is ‘n belangrike dag hier in Oekraine. Dit is “Oorwiningsdag” en word gevier. Vandag word daar blomme neergele in die park vir die soldate wat gesterf het. Bid asseblief vir more. Die afgelope paar dae is dit asof hulle van vooraf op al die stede skiet. Gister en vanmore was daar ontploffings in Odessa en Zatoka wat so 2 ure van ons af is. Bid ook oor die Zaporizhzhia aanleg, waar mense gevra is om die naby gelee gebiede onmiddelik te verlaat. 

My boek, “Sonneblomme en Sneeu” wat deur Lux Verbi uitgegee word, sal 31 Mei op die rakke wees. Bid asseblief saam dat die Here dit sal seen en dat mense wat dit lees aangeraak word, dat hul geloof versterk word deur die getuienisse daarin. Ek en Ivan vlieg D.V. einde Junie na Suid-Afrika vir die boekvrystelling. Bid asseblief ook vir finansies vir ons persoonlik en vir vliegkaartjies. 

Dankie dat julle bid en intree. Dankie vir elke bydrae, ons waardeer dit oneindig baie. Ek weet dat die vurige gebede van ‘n gelowige groot krag het. 

Liefde en seën 

Michele Potgieter 

—

Michele Potgieter
Reni, Ukraine

https://www.facebook.com/michele.potgieter

Whatsapp: +380938126060
Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag
My persoonlike besonderhede:
Capitec
MRS M POTGIETER
Savings Account Number: 1554335599
Branch: 470010

Gepubliseer op

Michele van Oekraïne se maandelikse Gebedsbrief uit Reni – Maart 2023

Oekraïne

Liewe vriende en familie

Party dae, soos vandag voel dit asof daar berge voor my is, waaroor ek nie kan kom nie. Wanneer ek na die berge kyk, groei vrees en wil dit my oorweldig. Ek mis ook vir Ockert so verskriklik baie en soms raak dit net te veel om te dra. Ek weet ek moet laat gaan, dit is al anper ‘n jaar en ‘n half gelede. Ek weet ek moet daaroor kom. Hoe kom mens ooit daaroor? Ek vra, wanneer die berge voor my staan, Here sal U hierdie berge net wegneem? My hulp en krag is in die Here. Sonder Hom sien ek nie kans nie. Ek het Hom so nodig om my elke dag te dra. Ek voel soms so swak en klein. 

Daar is soveel verantwoordelikhede en nood om my en ek weet ek kan dit nie self dra nie. Ek weet ek moet dit net vir die Here gee, maar dit hou my in die nag wakker. Ek bid daaroor en vra dat julle asseblief saam met my sal bid. 

Love Reni lê voor die deur. Dit begin weer 24 April. Ons gaan 13 skole besoek en elke skool gaan weer ‘n video maak. Tydens die Gala konsert 12 Mei, gaan ons die wenners aankondig. Dit is ‘n groot gebeurtenis in die park. 

Tydens Love Reni het ons ook vir die jongmense projekte in die dorp. Ons wil graag bankies langs die Dunau rivier opsit. 

Bid asseblief vir finansies vir al die projekte. 

Gister het Ina, hoof van Raduga gebel en gese dat sy nog ‘n groot bedrag nodig het om die maand af te sluit. Bid asseblief vir finansies vir Raduga en die kerkgebou om alles te betaal wat nodig is. 

Yura, een van ons leiers in die gemeente en ‘n staatmaker het verskriklike angsaanvalle en depressie die afgelope maand uit vrees dat hy opgeroep kan word om in die oorlog te gaan veg. Hy en Zina het 5 kinders wat hulle aangeneem het. Van die kinders is al uit die skool, daarom kan hulle hom oproep. Bid asseblief dat die Here hom sal vry maak van vrees en angstigheid. Hy voel drukking op sy bors en sonder krag. 

Bid asseblief vir Cilliers, my tweede oudste seun wat in New Zealand is, dat sy vroutjie Tanya haar visum spoedig sal kry om by hom aan te sluit. Sy is nog hier by my in Oekraine en dit is vir hulle baie moeilik om so lank uitmekaar te wees. 

Bid asseblief vir Univermaak se aandele om uitgesorteer te word. Dat ons aandele na ons sal terug gegee word en dat die ander aandeelhouers sal doen wat reg is in die Here se oë. 

Die Here is besig om so kragtig te beweeg onder ons vlugtelinge.  Hulle harte word sag en die Here is besig om soveel genesing te bring in die wat alles verloor het. Een van die dames van Baghmut het haar man, kinders en huis in die oorlogverloor. Sy was kwaad vir die Here en ons stap ‘n pad met haar. Die week het sy begin glimlag en rustig gesit en luister. Vroeër het sy haar mening kliphard uitgeskree.  Die Here is besig om haar hart te verander. Bid asseblief vir elkeen van ons vlugtelinge. 

Bid asseblief vir Reni. Dat die Here ons sal beskerm. Ons het vannag deurnag gebed, tot 5 uur môreoggend. 

Hieraan hou ek vas. My hulp is in die Here wat hemel en aarde gemaak het. Hy sal jou voet nie laat wankel nie. Jou bewaarder kan nie sluimer nie. Die Here is jou Bewaarder, die Here is jou skaduwee aan jou regterhand. 

Baie dankie dat julle bid. Dankie vir elke bemoediging en woord. Ek waardeer oneindig baie. 

Liefde en seën. 

Michele 

https://www.facebook.com/michele.potgieter

Whatsapp: +380938126060

Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag

My persoonlike besonderhede:
Capitec
MRS M POTGIETER
Savings Account Number: 1554335599
Branch: 470010

Gepubliseer op

Oekraïne: Nuusbrief vanaf Michelle Februarie 2023

Oekraïne

Liewe familie en vriende 

Vandag is dit 365 dae gelede wat ons 5 uur die oggend wakker gemaak is met die woorde: “Die oorlog het begin!”

Die eerste bomme het begin val en ons almal se lewens is drasties verander binne ‘n dag. Ek het soveel vrede gehad om te bly en net die Here te vertrou. Vandag wil ek net getuig van die Here se goedheid en getrouheid. Hy het ons elke dag beskerm, krag gegee en vir ons voorsien. Dankie vir julle gebede die afgelope jaar. Ek waardeer dit so baie. Dankie vir elke boodskap en bemoediging. Dankie vir elke bydrae wat dit moontlik maak om hier te wees en met die werk aan te gaan. 

Daar was dae wat ek gewonder het of ek die regte ding doen, maar die Here was keer op keer so getrou en het berge versit en deure oopgemaak. Alle eer aan Hom wat nooit sluimer of slaap nie en Sy oë op elkeen van ons hou. Ek voel so klein en so afhanklik van die Here elke oomblik. 

In Februarie het ons weer Night to Shine gehad vir ons gestremde mense in Reni en die dorpies rondom. Die aand is geborg deur Tim Tebow Foundation en elke spesiale gas was so dankbaar en het die aand baie geniet.

Ons beplan Love Reni en Masada weer die jaar en gaan in geloof aan met al ons projekte. 

Elke dag maak ons gemeente steeds kos vir die  vlugtelinge en elke dag is daar nuwe mense wat bykom. Ons deel die Evangelie met hulle en hulle harte is so oop en ontvanklik. Meeste van hulle het alles verloor en het soveel seer. Die Here werk in elkeen se hart. 

Die .aand was hier verskye groepe mense wat in ons huis kom bly het. Hier was ‘n groep van vyf dokters van reg oor die wêreld van Ierland, Amerika en Nederland. Ons burgemeester se assistent het gevra of ek hulle kan help met verblyf terwyl hulle ons vlugtelinge help. Nie een van hierdie dokters dien die Here nie, maar ons het oor en oor die geleentheid gekry om te getuig. Tuta Moesia, ek, Andrus en sy vrou Maritza het getuienisse gegee. Ons kon sien dat die Here hulle aanraak met Sy liefde. Andrus en sy gesin  is van Suid-Afrika uit Namibië en bly hier by my vir twee maande. Ons kuier lekker saam en maak selfs biltong! Andrus gaan uit na plekke soos Baghmut wat uitmekaar geskiet word en gaan haal mense uit terwyl bomme om hulle val. 

Die Here gee ook vir my kontrakte om vir ons seuns uit Reni en uit ons gemeente wat in Baghmut gaan veg, goeie koeëlvaste helmets en baadjies te kry. Iets wat die staat nie vir hulle gee nie. Die soldate moet dit self aankoop. Die week kan ons vir drie van ons seuns toerusting stuur. Een van die seuns se ma werk in ons koffie winkel en was in die kerk toe hy jonger was. Nadat hy dit ontvang het, stuur hy vir my n video terug en ook fotos van hom met my en Ockert toe hy n kind was. Die ander twee is Sveta se twee seuns. Die een seun Sasha het sy aangeneem toe hy nog klein was. Bid asseblief vir hierdie drie seuns en al die soldate. Elkeen het ‘n ma en familie wat vir hulle lief is, aan Rusland se kant en aan Oekraine se kant. 

Hou asseblief aan met bid vir ons beskerming en die beskerming van Reni. Ons is nie ver van Transnistrië af nie, ‘n plek met baie Russiese wapentuig. Ons hawe is steeds die grootste werkende hawe in Oekraine. 

Die Here is besig om iets wonderlik te doen onder ons jeug. Hulle bid gereeld saam en ons ervaar dat die Here besig is om te beweeg onder hulle.

Bid asseblief vir my en Ivan vir uitkoms met ons Schengen visums wat binne twee weke verval en ons verblyfpermitte wat nog in Odessa is om verleng te word. Indien ons Schengen visums verval, kan ons nie uit Oekraine uitgaan indien nodig nie. Al die ambesades in Oekraine werk nie nou met visums nie. Ek vertrou dat die Here vir ons weer ‘n deur sal oopmaak op die regte tyd. 

Die laaste hoofstuk van die boek “Sonneblomme en Sneeu ” het ek gisteraand vir Lux Verbi gestuur. Bid asseblief dat die Here die boek sal seën om mense se geloof weer te versterk in die Here. 

Bud asseblief vir elkeen van my kinders dat die Here ook vir hulle sal deure oopmaak daar waar hulle Hom moet dien. 

Baie liefde en seën uit Reni 

Michele 

Whatsapp: +380938126060
Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag
My persoonlike besonderhede:
Capitec
MRS M POTGIETER
Savings Account Number: 1554335599
Branch: 470010
SWIFT code (CABLZAJJ)

Gepubliseer op

Oekraïne: Maandelikse nuusbrief vanaf Michele – Januarie 2022

Ockert en Michele Potgieter van die Oekraine

Liewe familie en vriende.

Vandag sou my en Ockert se 27ste Huweliksherdenking gewees het.

My hart is seer en ek mis hom so verskriklik baie, maar die Here het  vir my die wonderlikste kinders gegee. Vanmore is ek wakker gemaak met die mooiste bos rose en scones wat Mari-Alena en my skoondogter Tanya vir my gemaak het. Tanya is Cilliers se Oekraniese vroutjie. Ek is dankbaar vir 25 jaar, vir die voorreg om Ockert se vrou te kon wees. Ek is dankbaar die die pragtige kinders wat die Here ons mee geseën het vir dit wat die Here hier in Reni besig is om te doen. Ek prys Sy naam dat Hy Sy kerk hier oprig om waarlik lig te wees in die donkerste tyd in Oekraine. Ek dank Hom vir elke dag wat Hy ons gee en beskerm in Reni. Die Here sê vir my dat Hy iets nuuts doen en dat ek vorentoe moet kyk en Hom moet vertrou.

Ons is in Reni, Oekraine. Ek, Mari-Alena, Benjamin, Ivan en Tanya. Cilliers het gister na New Zealand gevlieg en Tanya wag nog vir haar visum. Dit kan dalk ‘n maand neem voor sy ook kan gaan. Mari-Alena en Benjamin vlieg weer volgende week terug Suid-Afrika toe. Ek is so dankbaar dat 4 van my kinders die Kersfees hier in Reni by my kon wees. Dit gaan goed met Hannes-Joshua en Anastasia ook. Hulle is by Ockert se ouers en sussie in Santa Rosa CA.

Die terug reis na Oekraine het redelik glad verloop. Ons is deur Rominie oor die Donau rivier met ‘n veerboot. Dit was baie koue en mistig en ons moes ure wag totdat die mis opklaar voor die veerboot na Oekraine se kant gevaar het. Teen vier uur die middag het ons eers oorgegaan steeds in digte mis. Alles het so onheilspellend gelyk, maar dit is wonderlik om te weet dat die Here ons vashou en lei. 

Die gemeente en die leiers was so bly om ons te sien. Die vlugtelinge wat elke dag by die kerk eet was ook so bly om ons te sien. Ons het vir hulle ‘n Kersete gegee met kersies op die tafels, ‘n plekkie waar hulle kon mooi foto’s neem en ons het elkeen mooi afgeneem. Dit was so mooi geleentheid. Hulle het ook nader gestaan en vir my ‘n geskenk gegee. Niemand se oë was droog nie. Hulle is so verskriklik dankbaar vir dit wat die gemeente doen en kan nie ophou om dankie te sê nie.

Hier is ‘n bejaarde vroutjie uit Bagmut wat nou baie erg deurloop in die oorlog. Alles in Bagmut is omtrent vernietig. Sy het elke dag kop onderstebo gesit en was baie depressief. Ons het met haar gepraat en sy sê dat dit vir haar so moeilik is om te dink dat haar huis nie meer staan nie en dat haar tuin waarvoor sy so lief is vernietig is. Ons het haar bemoedig en gesê dat die Here met haar is en vir haar nuwe geleenthede gaan gee. Dat sy nou al kan beplan waar sy wat gaan plant en dat die Here vir haar ‘n nuwe bladsy gee. Ons het saam met haar gebid. Daardie selfde middag het haar kleinseun vir haar gevra wat met haar gebeur het, want sy is heeltemal ‘n ander mens. Die Here het haar weer laat glimlag en hoop gegee. Sy het besef dat haar lewe nie verby is nie. Elkeen van hierdie mense het ‘n ander verhaal.

Op elke telefoon kon daar ‘n waarskuwing wanneer daar ‘n lugaanval in ‘n streek is. Party dae is die hele Oekraine rooi en daarna het ons vir ‘n paar dae nie elektrisiteit nie en nie verhitting of water nie. Veral wanneer Odessa en Odessa streek se kragstasies gebombardeer word. Ons is baie dankbaar vir die twee kragopwekkers wat ons reeds gekry het vir Raduga en ons huis asook die een groter een wat uit Turkye op pad is vir Univermag en die kerk. Dankie aan elk een wat bygedra het. Ons waardeer dit oneindig baie. Ek ‘n baie groot dankie aan Wikus Rautenbach van Jubilee gemeente wat so alles reël en koördineer.

 Baie dankie vir elke gebed, ondersteuning en bydrae. Ons waardeer dit so baie. Dit maak vir ons dit moontlik om hier aan te gaan met die etes vir die vlugtelinge asook vir Raduga kleuterskool se onderhoud.

 Dit is nuwe jaar en ons gaan voort soos die vorige jare, met die Here se genade, wil ons steeds onder omstandighede op 10 Februarie voortgaan met Night to Shine 2023 vir die gestremde mense in en om Reni. Asook Love Reni in April maand.

Bid asseblief vir ons gesondheid. Omtrent almal is siek met erge verkoue of griep. Omtrent almal is nou siek. Die hele dorp. Baie mense lê met hoe koors. Ek is ook in die bed en Benjamin gaan more Woord bring in die diens.

Bid asseblief vir ons beskerming in Reni. Die hawe werk steeds en ons prys die Here vir elke dag wat Hy Sy hand oor ons hou.

Bid asseblief vir die boek “Sonneblomme en Sneeu”. Lux Verbi gaan dit uitgee. Ek het uitstel gekry tot die 14de Januarie om hom klaar te skryf. Bid dat dit geseënd sal wees en dat die Heilige Gees daardeur sal werk en mense se geloof te versterk.

Onder omstandighede gaan dit met ons goed. Die Here is goed vir ons en Hy sorg.

Verlede Sondag het ons nie R500 gehad om vir die vlugtelinge kos te koop nie en het nou gehoor dat daar genoeg is om volgende week kos uit Rominie te bring! Dit Here is so getrou!

Baie liefde en seen

Michele

Reni, Ukraine

Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag

My persoonlike besonderhede:
Capitec
MRS M POTGIETER
Savings Account Number: 1554335599
Branch: 470010

Gepubliseer op

Nuus vanaf Michele van die Oekraine: Einde November 2022

Oekraïne

Reni Gebedsbrief November 1022

Liewe vriende en familie.

Baie dankie vir elke gebed, elke boodskap, Skrif en bemoediging. Dankie vir elke inbetaling en ondersteuning. Ons waardeer dit oneindig baie. Dankie dat julle die pad saam met ons stap.

 Meer en meer praat die Here met ons oor Jesaja 60.

“Staan op, skyn, want jou Lig het gekom en die Gemanifesteerde Teenwoordigheid van die Here het oor jou gekom, want let op, duisternis sal die aarde oortrek en ‘n diepe donkerheid die volke, maar die Here sal oor jou opkom en Sy Lig sal oor jou verskyn. Nasies sal na jou lig toe kom en konings na die helderheid van jou opkoms. Lig op jou oë en kyk rondom, hulle kom almal by mekaar, hull kom na jou toe.”

Die Here roep ons as Sy kinders, as Sy kerk om ligdraers te wees in hierdie donker tye. Om op te staan.

In Oekraine is dit nou letterlik so donker, fisies en geestelik. Elke dag gaan die oorlog aan. Elke dag is daar mense wat sterf. Rusland probeer nou om die winter te gebruik as wapen en teiken kragstasies en gas. Vir dae is Reni en Oekraine sonder elektrisiteit. Dit beteken geen verhitting, water of kommunikasie nie. Ek kyk na soldate wat in die koue in water in loopgrawe staan. Papnat en in modder oortrek van kom tot tone en my hart gaan uit na die wat hierdie winter so moet deurgaan. Elke dag daar die temperatuur. Aan die einde van die week trek Kiev by -7 reën en sneeu word voorspel. Maar iets wat my so tref is die blymoedigheid van die soldate en van die mense. Hulle maak grappies, dans in die koue, lag, staan saam en veg saam, bou dadelik, herstel en oorkom moeilikhede.   

In Reni lyk die prentjie nie veel anders nie. Reni was omtrent hierdie hele week sonder elektrisiteit. Hulle het gister vir twee ure elektrisiteit gehad en ons kon bietjie kommunikeer. Hulle verwag nog erger missiel aanvalle en dat hulle dalk vir langer sonder elektrisiteit sal wees. Die burgemeester het twee plekke op die dorp opgerig met kragopwekkers, waar mense hul kan kom sit en warm maak en telefone kan laai. Die plekke is oorvol en almal stroom daarheen. Meeste huise is sonder verhitting. Ons is in die proses om te kyk of ons uit Rominie kragopwekkers kan bekom. Daar is niks te koop in Oekraine nie en die winkels is weer leeg. Ons wil een vir Raduga aanskaf en een vir die kerk waar ons kos maak vir die vlugtelinge. ‘n Ligpuntjie waar ons wil hê mense heen kan kom en warm word, krag kry en ‘n warm bord sop en brood kan kry. Ons het ‘n groot saal en kan baie mense huisves. Ons wil die geleentheid gebruik om te evangeliseer en net liefde te wys vir die gemeenskap. Nou het ons die geleentheid soos nooit tevore nie om LIG te wees in die donker. Daar stroom steeds elke dag meer vlugtelinge na Reni, wat soos ‘n veilige hawe is.

Ons kon vir Raduge 9 ton bikette aankoop vir verhitting, maar sodra die elketrisiteit afgaan, moet hulle die vuur doodgooi, aangesien die pomp ophou om te werk wat die water deur pype deur die gebou laat beweeg. Daarom moet ons vir Raduga ook ‘n kragopwekker aanskaf. Die kragopwekkers gaan natuurlik heelwat brandstof gebruik en daarvoor moet ons ook die Here vertrou.

Ek, Ivan, Mari-Alena en Benjamin is besig om vir ons visums vir Poland te maak, om terug te keer Oekraine toe. Ons wil graag by die mense van Reni wees die Kersfees en Cilliers en Tanya gaan ook moontlik oor Kersfees in Reni wees, so moontlik gaan vier van my kinders by my wees in Reni. Hannes-Joshua en Anastasia is by Ockert se sussie Rynie en haar man Keith in Kalifornië, Santa Rosa waar hulle reeds help met televisie werk. Hannes-Joshua moet nou twee keer ‘n week ‘n Nuus program vir die plaaslike TV saamstel en aanbied. Ons vertrou die Here vir voorsiening vir vlieg kaartjies en om op die regte tyd te vlieg. Elke tree is ‘n tree in geloof. As ons, ons Schengen visas kry,  sal ons makliker uit Oekraine kan gaan indien dit nodig is en ek sal self na Rominie kan gaan om humanitêre hulp in Oekraine in te bring. Bid asseblief vir guns. Ons sal die 9 de Desember ons paspoorte terug kry.  

Elke dag deel ons mense met die vlugtelinge oor Jesus en mense word gered. Daar is soveel mooi stories. Een man het die week gesê dat hy ‘n Ateïs was, maar nou glo hu in die Bybel en glo hy dit wat ons met die mense deel. Sy hele lewe het omgekeer.  Is dit nie wonderlik hoe die Here stukkende vrlore mense na ons toe stuur van oor die hele Oekraine en dat ons nou waarlik lig kan wees. Ons mense in die gemeente staan so saam, soveel eenheid en wanneer alles wegval, alle aardse dinge is net net Jesus. Hierdie vlugtelinge het alles verloor, baie het nie eers ‘n huis om na terug te keer nie, maar hulle ontmoet hulle Skepper en hulle is so dankbaar.

Bid asseblief vir ons om op die regte tyd terug te gaan en dat die Here ons as gesin en Reni sal beskerm.

Bid asseblief vir elke mens wat na ons toe kom vir hulp, dat die Here hulle sal aanraak en dat elkeen gered sal word. Mense is nou so oop.

Bid asseblief vir finansies vir vliegkaartjies.

Bid asseblief vir voorrade en die aankoop van kos vir die vlugtelinge en aankoop van kragopwekkers en brandstof.

Bid asseblief vir my hierdie laaste week. My boek moet die 2 de Desember in wees by Lux Verbi en ek het nog heelwat om te skryf. Die boek se naam gaan glo “Sonneblomme en Sneeu” wees. Bid asseblief dat die Here dit sal seën en dat dit waarlik ‘n getuienis sal wees waardeur mense net nader aan die Here sal kom.

Baie liefde en seen

Michele 

Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag

My persoonlike
besonderhede:
Capitec
MRS M POTGIETER
Savings Account Number: 1554335599
Branch: 470010

.

Gepubliseer op

Oekraine: Michele se maandelikse Reni Gebedsbrief

Liewe vriende en familie. 

*Indien jy dalk ‘n boodskap aan die einde wil stuur, skryf asseblief vir my na: Nuwedag@gmail.com of Whatsapp na +380838126060

As jy net “reply” druk, kry almal op die verspreidingslys jou brief.

Baie dankie dat julle bid. Baie dankie vir elke bemoediging en boodskap. Baie dankie vir elke bydrae en donasie. Ek waardeer dit alles oneindig baie. Dit is julle wat die werk in Reni moontlik maak. Dankie dat ons saam ‘n span kan wees. Ons het geen sending organisasie of uitstuur gemeente wat ons ondersteun nie. Dit is net ons vriende en familie wat al die jare by ons staan. Vir 26 jaar en veral ook nou, die moeilikste jaar van die 26 jaar. Ek sou dit nooit alleen kon doen nie. Elke bemoediging is vir my so kosbaar en ek dank die Here dat jy in my lewe is. Ek is so verskriklik baie dankbaar. 

Ek kan net vanmore weer getuig oor hoe goed en getrou die Here is! Ek en Ivan is oppad Suid-Afrika toe om by Mari-Alena, Benjamin en Ockert se ouers te wees. More sal dit ‘n jaar terug wees wat die Here vir Ockert kom haal het. Hierdie is net ‘n tyd om bietjie af te sonder, tyd met familie te spandeer en om die boek klaar te skryf. Ek is halfpad maar het net tyd tot begin Desember en het klaar die ooreenkoms onderteken. Ek weet nie hoe ek die tyd daarvoor gaan kry nie. Bid asseblief dat ek dit sal klaar kry en wanneer ek skryf dat die Heilige Gees my sal lei. Ek wil net dat die Here verheerlik word en dat mense se geloof versterk word wanneer ons getuig van die Here se goedheid en getrouheid.

Soos ek hier sit en skryf is ek en Ivan in Bucharest en vlieg ons D.V. vanaand SA toe. By die Moldavie grens het hulle ons sonder ‘n visum deurgelaat, vit transit omdat dit ‘n kort entjie is tot by Rominie se grens. By Rominië het die grens hulle gesê dat hulle nie vir ons kan deurlaat nie omdat ons al in Poland was na die oorlog begin het…ons kan ook nie terug draai Moldavie toe nie, want hulle het gesê dat hulle my net een keer deurlaat! Ek het hom probeer ompraat om te help, alles probeer, toe sê hy streng vir my, “Nee, verstaan jy my!! Jy het n visum nodig.” Ons het in niemandsland gesit en kon nie Rominië ingaan nie en ook nie Moldavie terug gaan nie. Hy het gesê: “Gaan Moldavië toe en gaan more oggend na die kunsul dat hulle vir jou n visum vir Rominië oopmaak.” Maar ons het nie visums vir Moldavie nie en sal moet terug gaan Oekraine toe.  Hy sê hy gaan vir my ‘n brief skryf vir die konsulaat in Moldavie vir ‘n Rominië visum. Ons bid…. na ‘n lang ruk kom hy terug en gee my paspoort en sê dat sy jonger kollega van Charlene Theron die SA akstriese hou, daarom het hy die rekenaar “getriek” en ons paspoorte gestempel en vir ons gesê: “Say thank you to my younger colleague. Welkom in Rominië.” Ek sal dit ‘n duisend maal sê….die Here is so goed en getrou! Tot in alle ewigheid! Halleluja! Aan Hom alle eer en heerlikheid.

Hannes-Joshua en Nastia is veilig in Santa Rosa Kalifornië.  Hulle pas goed aan en Ockert se sussie Rynie en haar man is so goed vir hulle. Hulle help hulle met ‘n blyplek en kyk so mooi na hulle. 

Ek wil net ‘n regstelling maak oor Cilliers se baas. Ek het ‘n baie goeie gesprek met hom gehad en wil net eerstens sê hoe dankbaar ek teenoor hom en die Here is vir die geleentheid wat Cilliers en Tanya het om in Duidsland te wees en daar te kan werk. Met my vorige brief het ek ondankbaar en onvergenoegd voorgekom en dit is regtig nie my hart nie. Daarom wil ek omverskoning vra. Cilliers se baas doen alles in sy vermoë om vir Cilliers te help en stap ook ‘n nou pad met die Here. Dit is so wonderlik om te sien hoe die Here alles regstel wanneer ons net met mekaar praat, want wanneer ons mekaar nie ken nie maak ons foute. Soms kan slegte kommunikasie soveel misverstande tot gevolg hê. Bid asseblief dat die Here hierdie maatskappy sal seën in alles wat hulle doen. Bid asseblief vir al vyf my kinders dat die Here vir elkeen sal wys waar hulle moet wees en waar hulle die Here kan dien. 

In Reni het daar wer die week twee bussies met kos uit Rominië gekom en ons mense in die gemeente maak steeds elke dag kos vir vlugtelinge. Daar is elke dag nuwe mense wat in Reni aankom, veral nou dat die oorlog meer na die Suide beweeg. Ons is in kontak met Nikolai se ma en sussie Olga wat daagliks vra dat ons vir hom bid. Sy hele battalion se posisie is moontlik bekend gemaak aan die vyand. 80% van die soldate is dood in ‘n lokval. Nikolai het gesien hoe een van sy vriende van Reni langs hom dood is. Dit is ‘n groot wonderwerk dat hy bly lewe het. Hy is nou op hierdie oomblik in loopgrawe waarop daar herhaaldelik geskiet word. Daar is glo 10 van Reni se jongmanne in twee dae naby Kgherson dood. Gister en eergister is die liggame van van hierdie soldate terug gebring Reni toe. Die hele dorp het langs die strate met vlae en blomme gestaan. Een van die soldate was Nikolai se vriend. Hy het ‘n vrou en dogtertjie na gelaat. Bid asseblief vir hierdie families. 

Die laaste punt van die brandweer se voorwaardes is afgemerk met ‘n groot wonderwerk. Ons het vir ‘n paar maande lank gesoek na ‘n groot genoeg tenk sodat daar genoeg water sal wees op die perseel. Die laaste keer het ons in Izmail na ‘n 20 000 liter staal tenk gaan kyk. Ons sou ‘n hyskraan moes huur in Izmail en Reni en ‘n groot vragmotor om die tenk te vervoer. Die onkostes was verskriklik groot en daar was net nie ‘n manier hoe ons dit kon doen nie. Ons het na die ou geroeste tenk gaan kyk en toe het die persoon nog die prys verdubbel as wat hy geadverteer het. Die een wat hy geadverteer het was begrawe en heelwat kleiner as die een wat hy toe aan ons wou verkoop. My moet was op. Ek het die burgemeester gebel.Hy gee toe vir ons ‘n tenk heeltemal gratis! Hy het ook gratis ‘n hyskraan gestuur en ‘n trekker om ‘n gat te grawe. Bomme ‘n dag is die gat gegrawe, die tenk met pik geverf en in die gat gesit. Nie ‘n sent betaal nie. Die Here is so goed en getrou! Raduga kan werk selfs nou tydens die oorlog. Die Here gee vir ons soveel guns. Daar is nuwe kindertjies in Raduga wat uit die oorlog gebiede kom. Ek sien die week ‘n video van een van die vlugtelinge se dogtertjie wat in Raduga is. Haar ouma wat nie die Here ken nie het dit geneem. Haar ouers is ook nie Christene nie. In die video sing sy van die Here met haar handjies in die lug!  Dat hierdie dogtertjie die evangelie bring in haar huis deur ‘n liedjie. Prys die Here vir Raduga en vir elke juffrou wat daar werk. Bid asseblief vir finansies vir Raduga. Ek moet die borge vir die nuwe kindertjies kry en weer op datum kry. Dit is iets wat Ockert gedoen het, waarby ek nog moet uitkom. 

Bid asseblief dat ek en Ivan vanaand net op daardie vliegtuig kan klim. Dat die Here weer vir ons die deur oopmaak om uit Rominië te kan kom.

Baie liefde en seën uit Rominië 

Michele Potgieter 

Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag

My persoonlike
besonderhede:
Capitec
MRS M POTGIETER
Savings Account Number: 1554335599
Branch: 470010

Gepubliseer op

Oekraine – Reni Gebedsbrief Oktober 2022 – Michelle Potgieter

Oekraine watertenk

Liewe vriende en familie.

Die Here se koms is so naby. Hy staan al voor die deur om Sy bruid te kom haal. Ons tyd is so min om die oes in te bring. Bid vir die Here van die oes vir meer werkers in Sy land. Bid ook dat die werkers nie sal moeg word of opgee nie. Vir elke dag se werk genoeg krag.

11 Oktober sal dit ‘n jaar terug wees wat die Here vir Ockert kom haal het. Ek kan dit nie dink nie. Dit voel soos gister. Pappa Hannes en mamma Magda het vir Benjamin Cor gevra om blomme op Ockert se graf te gaan sit terwyl hy in George by Philip en Andiah kuier. Bid asseblief vir my kinders en Ockert se ouers. Dit bly maar seer en ons verlang.

Ek was verlede week in Odessa saam met Madeleine wat van Suid-Afrika bietjie kom kuier het. Terwyl ons daar was het ek net weer besef hoe geseënd ons in Reni is en hoe goed die Here vir ons is. Daar het dag en nag serenis wat afgaan. Terwyl ons daar was het ons ook skiettery en ontploffings gehoor. Daar was ‘n aantal hommeltuie oor Odessa wat Oekraine afgeskiet het en dit is ‘n geluid wat ek nie gou weer wil hoor nie. Ons het nie geweet wat om te doen nie. In Reni is dit rustig, behalwe vir ‘n man in Reni wat die week gearresteer is omdat hy vir die Russe gewerk het en kaarte geteken het van plekke om te vernietig.

Net dat almal sien hoe getrou die Here is: Die Here is so goed. Ons sukkel al vir maande lank om genoeg water by Raduga te kry sodat die brandweer tevrede is. Ons het na groot watertenk van hier tot in Izmail gesoek. Die laaste persoon wou ‘n verskriklike groot bedrag hê wat ons nie gehad het nie en dan moes ons die tenk nog van Izmail bring en daar en hier ‘n hyskraan huur om dit op ‘n vragmotors te laai. Dit alles was net ver bo wat ons kan doen. Die Here is so goed! Ons burgemeester het een oproep gemaak en vir ons ‘n 10 ton watertenk gegee. Hy het dit vir ons afgelewer en sy trekkers het ‘n gat gegrawe en vandag is die tenk in die gat! Alles, heeltemal gratis! Ek huil van dankbaarheid. Elke goeie gawe is van ons Vader. Hy is so goed vir ons. Ek prys Sy naam want Hy is so getrou. Die Here verhoor ons gebede!

Hannes-Joshua en Anastasia gaan vanaand oor die grens na Roemenië vanwaar hulle more Amerika toe vlieg. Hulle gaan vir Ockert se sussie Rynie en haar man Keith help met Christen televisie en radio. Bid asseblief dat hulle maklik oor die grense kom en betyds is vir hul vliegtuig more oggend 3 uur. Bid asseblief vir Benjamin Cor oor sy toekoms. Hy wil onder mamma se vlerk uitkom en is ook opsoek na ‘n werk by ‘n gemeente om te help met jeugwerk, maar hy mik ook Amerika toe om naby aan sy oupa en ouma en boetie te wees. Hy is nog besig met sy Teologiese studies. Cilliers en sy vroutjie Tanya is nog in Duitsland, maar hy wil ook skuif. Die lewe in Duitsland is net te duur met die salaris wat hy daar kry dat hulle nie meer kan uitkom nie, veral toe hy hoor hoeveel medies hulle moet betaal. Sy salaris as bedryfs ingenieur is net genoeg om hul woonstel te betaal en die Suid-Afrikaner vir wie hy daar werk betaal hom minder as die minimum salaris. Bid asseblief dat die Here ook vir hulle sal voorsien vir ander werk en blyplek. Bid asseblief dat elkeen van my kinders hulle plekkie sal kry.

Elke dag maak ons nog kos vir die vlugtelinge. Daar is soveel hartseer verhale. Hierdie mense het so swaar gekry.

Baie dankie vir elke gebed, vir elke bydrae en geskenk.
Dankie vir elke brief en bemoediging.

Kontak en bankbesonderhede: 

Epos: nuwedag@gmail.com,

Kontak nr: Op WA +380938126060

Bank: Capitec Rekeningnaam: Mev M Potgieter,

Takkode: 470010,

Rekeningnr: 1554335599,

Soort rekening: Spaar

— ONTHOU ASSEBLIEF: Indien u op hierdie gebedsbrief reageer en ‘n persoonlike boodskap aan ons wil stuur, om die “To” (“Aan”) te verander na nuwedag@gmail.com

Gepubliseer op

Oekraïne – Michelle Potgieter – Erkenning aan Christene op die voorfront

Michelle Potgieter - Oekraine

Liewe vriende en familie

Die Here is so goed en getrou. Dit is my getuies. Hy dra ons elke dag. Hy sê in Sy Woord dat Hy ons onder Sy vlerke weg steek en ons beskerm teen elke plan van die vyand en Hy doen dit. Alle lof en eer aan ons Vader wat so vir ons sorg en voorsien. Dankie vir elkeen wat vir ons intree, wat vir ons bid en wat ons ondersteun op een of ander manier. Dankie dat ons as ‘n span en as ‘n eenheid saam kan werk. Elkeen op sy gegewe plek. Dit is soos die oorlog. Iemand is in die voorkant van die geveg, waar die bomme val, ander stuur, ander dra by op een of ander manier ander bid, todat die oorwinning daar is.

Meer as 6 maande hou hierdie oorlog aan en ons sien hoe Dawid teen die groot Goliat staan en dat die Here klein Dawid sterk maak teen die dreigement van die vyand.

Ons as gemeente hou steeds aan om vir die vlugtelinge kos te maak, te help met verblyf, kospakkies, klere en waarmee ons ook al kan. Meer mense vlug na Reni. Hulle noem Reni die “hemel” want hier is nie soveel sirenes nie en mens voel veilig hier. Ek glo met my hele hart dat dit 26 jaar se gebede is en die Here se teenwoordigheid in Reni. Al is ons hawe ‘n groot teiken, steek die Here ons weg onder sy vleuels.

Die week was en Odessa toe. Ek is uitgenooi deur Odessa streeks hoofde, om ‘n forum by te woon wat aangebied is om dankie te sê vir mense wat bystand en hulp gee aan die mense van Oekraïne tydens die oorlog. Dit was ‘n groot voorreg om ‘n toekenning te ontvang. Alle eer aan die Here wat so getrou is. Mag Hy verheerlik word. Hulle het ook klem daarop gelê dat dit die Christene is wat tot op die voor front gaan om kos en medikasie te neem. Daar was generaals en staatshoofde wat hulle dank en waardering uitgespreek het.

Terwyl ek in Odessa was het daar ‘n paar keer serenis afgegaan. Ek kan nie dink hoe kindertjies onder so ‘n vreesaanjaende geluid probeer slaap nie. Daardie oomblik voel dit so onwerklik asof jy in ‘n tweede wêreldse filmstel is. Mens weet nie waarheenom te hardloop of wat om te doen nie. Meeste mense is al so gewoonden hou net aan met hul alledaagse gang. ‘n Bietjie verder van ons af, in Odessa, het ‘n vriendin van my, vertel dat sy daardie oggend deur haar balkon venster gesien hoe ‘n missiel oor haar woonstelblok trek. Sy se dat sy al die verskillende missiele hoor en uitken.

Raduga was vir ‘n week toe, maar Maandag begin ons weer werk. Daar is ook baie nuwe kindertjies, baie van hulle is vlugtelinge. Ons hofsaak met die brandweer gaan steeds aan oor ons laaste punt, water toevoer indien daar ‘n brand is. Ons begin nou twee putte grawe en pleister groot wat saam 12 ton water te hou.

Lux Verbi uitgewers het my genader om ‘n boek te skryf. Hulle wil hê dat die boek helfte November klaar wees. Bid asseblief vir my, vir kreatiwiteit. Ek kan niks sonder die Here doen nie.

Cilliers en sy vroutjie Tanya was vir so 10 dae in Reni. Hannes-Joshua en Anastasia is nou hier in Reni, vir nog ‘n maand, dan vertrek hulle na Amerika. Met Ivan en Benjamin Cor gaan dit goed. Mari-Alena is in Suid-Afrika en die verlange is groot.

Baie dankie dat julle bid en intree. Dit het groot krag! Die Here doen wat Hy gesê het. Hy is so goed vir ons.

Bid asseblief vir die kernkragsentrale wat in groot gevaar is. Bid asseblief vir ons beskerming

Baie liefde en seën in Jesus

Michele 

Projekte rekening:
Standardbank,
Lynnwood Ridge tak (met kode 012445),
rekeningnommer 014330067 
in die naam Nuwe Dag

My persoonlike
besonderhede:
Capitec
MRS M POTGIETER
Savings Account Number: 1554335599
Branch: 470010

Whatsapp: 

+380938126060

Facebook:

https://www.facebook.com/michele.potgieter

Privaatheidsbeleid Trots aangedrewe deur WordPress