Nuus en Aktiwiteite

“God het, nadat Hy sy Dienskneg Jesus laat opstaan het, Hom heel eerste na julle gestuur om julle te seën, deurdat Hy elkeen van julle sal laat wegdraai van julle booshede.”

(Hand. 3: 26²⁰)

Wat verstaan ons onder seën?

Ons het almal ‘n eie idee van wat die seën van die Here beteken. Vir sommige is dit om ‘n finansieël gevulde lewe sonder bekommernisse te hê. Vir ‘n ander is dit om ‘n vol en vervullende lewe met aansien te hê. Vir ‘n ander is dit om mateloos gelukkig te kan wees. Vir sommige is dit net om genoeg te hê om van te lewe, sonder oormaat. ‘n Ander vind dit in wat hulle sien in die natuur en die ander skeppingsmagte van God. So kan ons aangaan met wat ons persepsie van die Here se seën is.

‘n Aanhaling van Duke Ellington verwoord die persepsie van seën baie goed: ‘My ma het my vertel dat ek geseën is, en ek het haar altyd geglo. Om in ‘n vorstehuis gebore te wees kan nie vergelyk word met geseën wees nie. Vorstelikheid word geërf van ‘n ander mens; seën kom van God af’.

Ons het hierdie week weer die oorvloed van God se seën beleef! Dit laat ons soms sidder en beangs wees, as ons sien hoe God se beantwoording van gebede in so ‘n oormaat gebeur. Tog is dit so ‘n groot seën, ten spyte van al die skade aan mensgemaakte strukture. Ons damme is weer tot oorlopens toe vol. Die seemere in die omgewing is weer goed oopgespoel. Die lug is weer skoongewas van alle onsuiwerhede! En die aarde sê dankie vir elke druppel!

Teksverse:

“Die seën van die Here – dit is wt ryk maak, en harde werk voeg daar niks by nie.” (Spr . 10: 22²⁰);

“Want grond wat die reën indrink wat telkens daarop val, en ‘n bruikbare oes voortbring vir hulle om wie se ontwil dit bewerk word, ontvang God se seën.” (Heb. 6: 7²⁰)

Wie het God geseën?

Ons lees dikwels van seëninge en aan wie dit toevertrou word. In die Ou Testament vind ons dikwels waar God vir Abram en sy nageslag seën. Ook waar God seën wegneem wanneer daar weggedwaal word van Hom af.

Dit klink so maklik, maar dikwels is ons ondankbaar of hoogmoedig. Daar word dikwels gedink dat die mens God nie nodig het nie. Dit is so hartverskeurend om sulke uitsprake te hoor. God is groot en goed. Daar is niemand soos Hy nie. Die Here is mildelik met sy seën as die mens regverdig is en soos ‘n kind glo.

Teksverse:

“Ek sal jou ‘n groot nasie maak; Ek sal jou seën en jou naam groot maak, sodat jy ‘n seën sal wees. Ek sal hulle seën wat jou seën,…” (Gen. 12: 2-3²⁰);

“Die Here se vervloeking rus op die huis van goddeloses, maar die tuiste van regverdiges seën Hy.” (Spr. 3: 33²⁰);

“Seëninge is bedoel vir die kop van ‘n regverdige, maar die mond van goddeloses verberg geweld.” (Spr. 10: 6²⁰);

“Hulle het die kindertjies na Jesus gebring sodat Hy hulle kon aanraak, maar die dissipels het hulle berispe. Toe Jesus dit sien, was Hy verontwaardig en het vir hulle gesê : “Laat die kindertjies na My toe kom en moet hulle nnie verhinder nie, want die koninkryk van God behoort aan mense soos hulle. Amen, Ek sê vir julle: Wie die koninkryk van God nie soos ‘n kindjie ontvang nie, sal beslis nie daar ingaan nie.: Hy neem hulle toe in sy arms en seën hulle terwyl Hy sy hande op hulle lê.” (Mark. 10: 13-16²⁰)

Hoe hanteer ons God se seën?

Gebruik ons die seën wat ons van God ontvang om tot seën van ander te wees? Oswald Chambers het dit mooi verwoord: ‘As jy in Jesus glo, sal jy agterkom dat God deur jou magtige strome van seëninge vir ander gee.’ Ook Nina Smit stel dit baie goed: ‘Om bewus te wees van God se seën is een van die geheime van ‘n gelukkige lewe. Maar hierdie seën mag nie vir jouself gehou word nie. Jy moet dit ook deurgee na die mense om jou. Jy moet bereid wees om jou vreugdedae en vreugde uitsprake met jou vriende te deel’.

Hoe gereeld stuur jy jou vriende met ‘n seënwens weg? Die baie bekende Ierse seënwens is ‘n wonderlike voorbeeld hoe jy enigiemand wat jou pad kruis kan seën: ‘Mag die pad voor jou altyd reguit wees. Mag jy die wind altyd van agter kry. Mag die son jou gesig streel en die reën sag op jou lande uitsak. En – totdat ons weer ontmoet – mag God jou in die palm van sy hand vashou’.

Laat ons mekaar altyd net die beste toewens!

Teksverse:

“Hy sal hulle wat vir die Here ontsag het, seën – die kleintjies saam met die grotes. Mag die Here julle meer maak, julle en julle kinders. Mag julle geseên word deur die Here wat hemel en aarde gemaak het.” (Ps. 115: 13-15²⁰);

“Mag die Here jou seën en jou beskerm. Mag die Here sy aangesig oor jou laat skyn en jou genadig wees. Mag die Here sy aangesig na jou toe oplig en aan jou vrede gee.” (Num. 6: 24-26²⁰)

Jesus Christus, die seën van die Here

Die aanhaling van Johannes Calvyn beskryf God se seën baie mooi: ‘God het die aardse seëninge tot ons voordeel gemaak en nie tot ons nadeel nie. Hy het al hierdie dinge aan die mensdom gegee sodat hulle sy goedheid sal prys’.

God het ook elke mens geseën met sy liefde, deur ons genadig te wees en Jesus Christus in ons plek te laat sterf, sodat ons verlossing kan kry van ons sondeskuld. Die genade is so groot dat ons dit dikwels moeilik vind om te glo. Kan dit so maklik wees? Ja, dit kan.

God het die behoefte in ons harte geplaas om gedurig na Hom op soek te wees. Elkeen van ons moet net ons hande ophef na Hom en Sy seëninge ontvang in die vorm van genade en vrede!

Ons vier weer hierdie week die herinnering van die Hemelvaart, wat deur die mense wat dit beleef het vir ons nagelaat is. Ons kan dus seker wees dat Jesus Christus opgestaan het uit die dood, en ook opgevaar het na die hemel, waar Hy sit aan die regterhand van God die Vader. Daarmee saam is ook die Heilige Gees vir ons bewillig om ons by te staan totdat Hy weer kom.

Groter seën as hierdie is daar nie!

Teksverse:

“Want so lief het God die wêreld gehad dat Hy sy unieke Seun gegee het, sodat elkeen wat in Hom glo, nie verlore sal gaan nie, maar die ewige lewe sal hê.” (Joh. 3: 16²⁰);

“En mag die God van vrede, wat die groot Herder van die skape, ons Here Jesus, uit die dood uitgelei het deur die bloed van die ewiger verbond, julle toerus met alles wat goed is, sodat julle sy wil kan doen, terwyl Hy in ons dit doen doen wat voor Hom welbehaaglik is, deur Jesus Christus, aan wie die heerlikheid behoort, vir ewig, en ewig! Amen!” (Heb. 13: 20-21²⁰);

“Gaan dan en maak dissipels van al die nasies, deur hulle te doop in die Naam van die Vader en van die Seun en van die Heilige Gees, en hulle te leer om alles te onderhou wat Ek julle beveel het. En kyk, Ek is met julle al die dae, tot aan die voleinding van die tyd.” (Matt. 28: 19-20²⁰):

“Vlug weg van die begeertes van die jeug en streef, saam met diegene wat die Here met ‘n rein hart aanroep, na regverdigheid, geloof, liefde en vrede.”

(2 Tim. 2: 22²⁰)

Hoe belangrik is vriendskap?

Elkeen van ons weet watter verskil ‘n goeie vriend in mens se lewe kan beteken. Soos Nina Smit dit so mooi stel: ‘’n Goeie vriend is so nodig soos ‘n goeie tandeborsel’. Dis iets wat die lewe die moeite werd maak, en waarsonder ons nie kan klaar kom nie. Ook die bekende anonieme aanhaling: ‘Baie mense sal in en uit jou lewe stap, maar net ware vriende laat hulle voetspore in jou hart’.

Dis daardie mense by wie jy aanklank vind. Nie noodwendig presies dieselfde as jy en al jou oortuigings nie, maar mense wat luister en regtig belangstel. Dit is harts-mense wat die lewe makliker maak vir jou. Dis mense wat jy vir jare nie hoef te sien nie, maar wanneer julle weer ontmoet, is dit asof julle mekaar gister laas gesien het. Dis mense wat jy kan vertrou!

Teksverse:

“Ter wille van my broers en vriende sê ek graag: “Mag daar vrede in jou wees!” Ter wille van die huis van die HERE ons God wil ek die goeie vir jou nastreef.” (Ps . 122: 8-9²⁰);

“Toe het Petrus hulle binnegenooi en as gaste verwelkom. En nadat hy die volgende dag gereedgemaak het, het hy saam met hulle vertrek, en sommige van die broers uit Joppe het hom vergesel. Die dag daarna het hy in Caesarea aangekom. Cornelius was hulle te wagte, en het reeds sy familie en naaste vriende bymekaar laat kom. Toe Petrus binnekom, het Cornelius hom tegemoetgegaan, voor sy voete neergeval en hom begin aanbid. Maar Petrus het hom opgehelp met die woorde: “Staan op, ek self is ook net ‘n mens.”” (Hand. 10: 23-26²⁰)

Hoe kry ons dit reg?

Ook in die keuse van vriende vir ons aardse vriendekring, gee die Bybel duidelike riglyne. Kyk na die betroubaarheid van mense. Moenie vriende kies wat kommer in jou hart wakker maak nie. Moenie vriende kies wat humeurig of opvlieënd is nie, want mens word dikwels soos jou vriende. Waak daarteen om allemans vriend te wees!

‘n Ware, eerlike vriend is nader as ‘n broer aan ‘n mens. Ons word ook daarop gewys hoe belangrik dit is om vir jou vriende te bid. Net soos Job gedoen het, en guns in die oë van die Here gevind het.

Teksverse:

“Wie in die geringste betroubaar is, is ook betroubaar waar dit om baie gaan,….” (Luk. 16: 10²⁰);

“Kommer in die hart van ‘n mens maak die hart neerslagtig, maar ‘n vriendelike woord beur dit op. ‘n Regverdige soek sy vriende uit,…” (Spr. 12: 25-26²⁰);

“Moenie vriende maak met ‘n humeurige mens nie, en met ‘n opvlieënde man moet jy nie saamgaan nie; anders raak jy vertroud met sy paaie en stel jy só ‘n valstrik vir jouself.” (Spr. 22: 24²⁰);

“’n Man met baie vriende word geruïneer, maar daar is ‘n geliefde vriend wat nader is as ‘n broer.” (Spr. 18: 24²⁰);

“Die Here het Job se lot verander toe hy vir sy vriende gebid het….” (Job 42: 10²⁰)

Hoe behandel ons vriende?

Ons kan nie net van ander verwag om goeie vriende te wees nie. Dit is ook belangrik om gedurig daarna op te let hoe ’n goeie vriend jyself is. Kan mense jou vertrou? Dink hulle in dankbaarheid, liefde en verlange aan jou?

Paulus se skrywe aan die Fillipense verwoord sy ervaring van hulle vriendskap as mede gelowiges. Hy dank God vir hierdie mense wat hom deur dik en dun bygestaan het in goeie en moeilike omstandighede! Hy noem ook dat hy duidelik die werk van die Here in hulle lewens ervaar. Wat ‘n wonderlike getuigskrif is dit nie vir die Gemeente van Filipi nie?

Teksverse:

“Genade vir julle en vrede van God, ons Vader, en die Here Jesus Christus. Ek dank my God elke keer as ek aan julle dink. Altyd, in elke gebed van my vir julle almal, bid ek met blydskap oor julle deelname aan die evangelie, van die eerste dag af tot nou, juis hiervan oortuig dat Hy, wat ‘n goeie werk in julle begin het, dit sal voltooi tot op die van Christus Jesus. Dit is immers vir my reg om so oor julle almal te dink, omdat ek julle in my hart hou.” (Fil. 1: 2-7²⁰)

Jesus Christus se vriendekring

Die liefde wat Jesus Christus vir sy naby vriende, asook almal wat nie in sy direkte vriendekring was nie, word telkens vir ons uitgebeeld in hoe Hy mense hanteer het. Watter vooreg was dit nie vir die apostels en ander naby vriende nie!

Hy het alles wat God die Vader aan Hom toevertrou het, met hierdie naby vriende gedeel. Al is Hy bietjie voorskriftelik daarin dat hulle Sy bevele moet navolg, doen Hy dit met liefde. Hy wys ons daarop hoe belangrik dit is om grehoorsaam aan die Vader te wees, want dit is hoe ons in die liefde kan bly.

Ons weet dat daar geen groter liefde is om jou lewe af te lê vir jou vriende nie, maar Christus se liefde was groter. Almal van ons wat Hom nie fisies geken het nie, en wat Hom as Verlosser aanvaar het, ook vir ons het Hy Sy lewe afgelê. Ons kan net in dankbaarheid die liefde van Jesus Christus aanvaar en so deel word van Sy vriendekring!

Teksverse:

“Julle is my vriende as julle doen wat Ek julle beveel. Ek noem julle nie meer slawe nie, omdat ‘n slaaf nie weet wat sy eienaar doen nie. Ek het julle egter vriende genoem, omdat Ek alles wat Ek by my Vader gehoor het, aan julle bekend gemaak het.” (Joh. 15: 14-15²⁰);

“Net soos die Vader My liefhet, het Ek julle ook lief. Bly dan in my liefde. As julle my gebooie onderhou, sal julle in my liefde bly, net soos Ek die opdragte van my Vader gehoorsaam het en in sy liefde bly.” (Joh. 15: 9-10²⁰):

“Groter liefde as dit het niemand nie, dat iemand sy lewe aflê vir sy vriende.” (Joh. 15: 13²⁰)