Die 9de Tsabong Missionale-konferensie het plaasgevind op Saterdag, 12 Augustus 2023, in Tsabong. Hierdie jaarlikse konferensie, waarmee ‘n aangevang gemaak is in 2013, is ‘n jaarliksegeleentheid, met uitsonderings in 2020 en 2021 weens die uitdagings wat deur die Covid-pandemic en sy nasleep veroorsaak is.
Dr. Frans Hancke, die Uitvoerende Direkteur van DiePLAN Assosiasie, het vir die 8ste keer as die spreker opgetree. Hy was reeds, nog voor die aanvang van hierdie jaarlikse byeenkomste, sedert 2010 betrokke by die DRCB (Dutch Reformed Church in Botswana) Gemeente in Tsabong.
Sy verbintenis met Tsabong het vinnig daartoe gelei om ook werkswinkels regdeur die Kgalagadi aan te bied, en een keer selfs ook in Gaborone. Vanaf 2015 tot 2022 het hy die Ring van Lobatse, die gemeentes van Lobatse, Kgalagadi, Ghanzi, Tlokweng en Maun, gefasiliteer in die ontdekking van hul spesifieke roeping binne die Kerk as geheel, maar ook binne gemeente-verband. Daarbenewens het hy verskeie jaarlikse retraites vir die predikante van die Ringgelei, en het hy ‘n geestelike mentor geword binne die Kerk in Botswana, veral in die Kgalagadi Gemeente. Ons is dankbaar teenoor die Here wat ons geseën het met sy nederige, kundige en toegewyde dienskneg.
Oor die jare heen het die Tsabong Missionale-konferensie deelnemers vanuit diverse plekke soos Gaborone, Mochudi, Lobatse, en selfs Suid-Afrikaanse stede/dorpe soos Kaapstad, Winburg, Kuruman, Hartswater, Johannesburg, Pretoria, Upington, en ander, aangetrek. Hierdie byeenkomste het nuwe perspektiewe aan talle kerkleiers en -lede gebied, en het diep impakte gehad op hul begrip van die Kerk se wesensdoel. Die konferensies het sinoniem geword met getuienisse van lewensverandering, wat die transformerende krag van God beklemtoon het. Alle erkenning gaan aan die Koning van die Kerk, aangesien slegs Hy nuwe lewenskrag en duidelike rigting in sy kerk kan inblaas.
Hierdie jaar se konferensie is deur 38 persone bygewoon, afkomstig van verskeie plekke insluitend Tsabong, Bokspits, Lobatse, Mmathubudukwane (naby Mochudi), en Kimberley. Gegewe die beperkte kennisgewingstyd, was ons diep dankbaar vir die opkoms. Veral merkwaardig en bemoedigend was die aansienlike verteenwoordiging van jongmense wat aktief betrokke was in die kleingroep-sessies. Ons gebed is dat hulle deur God se genade die boodskappe en insigte wat hulle ontvang het, in hul toekomstige reise as lede van sy kerk, sal koester en toepas.
Die sentrale tema van hierdie jaar se Tsabong Missionale-konferensie was “Geroep, Bemagtig, en Uitgestuur.” Oor die verloop van vier sessies het deelnemers begryp, sommige selfs vir die eerste keer volgens hul getuienisse, en ander by herhaling en met bemoediging, dat elkeen van ons deur God met ‘n unieke doel gevorm is. Hiérdie doel was reeds deel van sy plan vir ons, die oomblik van ons geboorte.
Sessie 1: Die ontdekking van hierdie unieke doel vra’n persoonlike ontmoeting en verhouding met die lewende Christus. Uit so ‘n ontmoeting word ons roeping gevorm en neem dit gestalte aan. Die essensie lê egter in die omskakeling van hierdie roeping na werklikheid. Sonder hierdie omskakeling mag ons bestaan leeg, doelloos en onvervuld wees, wat uiteindelik kan lei tot ‘n terugblik op ons lewe met die woorde van verwyt, “Ek het my lewensdoel nie benut nie, en dus was my lewe sonder ware sin.”
Sessie 2: Die struikelblok wat die naspeuring van ons God-gegewe doel kan hinder, kan ‘n gebrek aan vertroue in Hom wees. Ons mag in die kategorie van “AS-mense” val, individue wat wag op ‘n vorm van Goddelike bevestiging, soortgelyk aan Gideon wat die velletjie vir ‘n teken neerlê voordat hy sy roeping deur God uitvoer. ‘n Vaste vertroue in God se getrouheid en sy Woord bemagtig ons om “WANNEER-mense” te word, soos Abram, wat sonder huiwering en vasberade reageer op God se roeping. Langs die weg van gehoorsaamheid, kry ons lewens ‘n nuwe betekenis.
Sessie 3: ‘n Lewe geleef met doelbewuste getrouheid aan God se roep, waarborg nie ‘n ongekompliseerde lewenspad nie. Die reis van gehoorsaamheid is vol struikelblokke en beproewings. Om hierdie uitdagende pad te bewandel is alleen moontlik deur naby aan God te bly, sy leiding te volg, en sy doel met ons lewe te omhels. Hierdie noue verhouding plaas ons binne God se ‘trekstroom’ (slipstream) en lei tot ons gehoorsaamheid aan sy roepstem, en dus tot uitleef van sy plan vir ons lewens en die wêreld.
Sessie 4: Die laaste sessie was ‘n besinning oor die lewe van die profeet Jona – ‘n self-Ondersoek ende ervaring, ‘n konfrontasie wat die meeste deelnemers aan die konferensie geraak het. Dit het ons uitgedaag om introspeksie van ons eie geestelike reis te doen, deur vrae soos:
• Het ons al ons unieke roeping ontdek?
• Weerstaan ons God se roeping, en draai ons ‘n blinde oog na die dringende behoefte van mense wat verlore gaan en in duisternis gehul is?
• Bid en getuig ons toegewyd, gehoorsaam aan ons Goddelike roeping?
• Weerstaan ons die taak om die alomvattende liefde van God uit te straal? Waag ons dit om ons willens en wetens sy roeping na te laat in die strewe na ons eie begeertes en drome? Die laasgenoemde pad vernietig onvermydelik ons lewensdoel en lei tot ‘n innerlike leegheid en ‘n gevoel van doelloosheid.
Die getuienisse wat na afloop van die konferensie ontvang is, het ons met ‘n opregte gevoel van dankbaarheid vervul teenoor ‘n getroue God wat sy Woord in die lewens van sy kinders gebruik. Ons is oortuig dat die gebede van so baie gelowiges in die aanloop na die geleentheid ‘n wesenlike rol hierin gespeel het.
Ds TC du Toit