“Vrede laat Ek julle na – my vrede gee Ek julle. Ek gee dit nie vir julle soos die wêreld dit gee nie. Laat julle harte nie ontsteld en bang wees nie”
Joh. 14: 27
Jesaja wat reeds die koms van Jesus Christus voorspel het, het onder andere vir Christus die Vredevors genoem. (“Want ‘n kind is vir ons gebore, ‘n seun is aan ons gegee. Die heerskappy is op sy skouer. Hy word genoem: Wonderbare Raadgewer, Magtige God, Ewige Vader, Vredevors. Vir die uitbreiding van heerskappy vir vrede sonder einde, sal hy op die troon van Dawid en oor sy koninkryk wees, om dit te vestig en te ondersteun deur reg en geregtigheid, van nou af en vir altyd. Die ywer van die Here, heerser oor alle magte, sal dit doen” (Jes. 9: 5-6)). Die vraag ontstaan oor hoe lyk hierdie vrede wat Christus vir ons sou bring? Ons as mens het altyd ons eie menslike perspektiewe en verstaan nie noodwendig presies wat God se bedoeling is met die vrede wat God vir ons wil bewerkstellig nie.
Daar is soveel gevalle van oorlog wat in die Bybel beskryf word, en wat die persepsie van wat vrede behels by ons mense laat posvat het (“As hulle egter nie met jou wil vrede maak nie, maar teen jou wil oorlog voer, dan moet jy die stad beleër “ (Deut. 20: 12); “Sê daarom, ‘Kyk, Ek bied vir hom my verbond van vrede aan” (Num. 25: 12); “Maar die Here së vir hom: “Vrede vir jou! Moenie bang wees nie, jy sal nie sterf nie! Gideon het toe daar ‘n altaar vir die Here gebou en dit genoem” Die Here is vrede”” (Rig. 6: 23-24); “Toe al die die konings wat aan Hadad-Eser onderdanig was, sien dat hulle deur Israel verslaan is, het hulle met die Israeliete vrede gesluit en was aan hulle onderdanig” (2 Sam. 10: 19 sien ook 1 Kron. 19:19)), dat vrede te doen het met menslike vrede, waar daar geen oorloë meer sal bestaan nie (“Hiskia së toe vir Jesaja: “Die woord van die Here wat jy gespreek het, is goed.” Hy het gedink: Sal daar dan nie tog maar net vrede en bestendigheid in my tyd wees nie?” (2 Kon. 20: 19)), en waar ons mense op aarde in vrede saam sal woon (“My seun, my onderrig moet jy nie vergeet nie, en my gebooie – jou hart moet daarby hou; want die lengte van jou leeftyd, die lewensjare en vrede sal dan vir jou vermeerder word.” (Spr. 3: 1-2)).
Wanneer ons egter kyk na wat Jesus Christus sê oor die vrede wat Hy bring, kry ons duidelik ‘n ander prentjie. Jesus sê baie duidelik in Matt. 10: 34 (“Moenie dink dat Ek gekom het om vrede op aarde te bring nie. Ek het nie gekom om vrede te bring nie, maar die swaard”) Hoe verstaan ons dan hierdie stelling? Wanneer ons na Jesaja se stelling in Jes. 48:22 kyk (“Daar is geen vrede vir die goddeloses nie,” sê die Here”) kom die vraag by ons op of die vrede van God dalk net vir ‘n sekere groep mense bedoel? Die lied van die Engele vir die skaapwagters, gee ons reeds ‘n aanduiding: “Ere aan God in die hoogste hemel en vrede op aarde vir die mense in wie God ‘n welbehae het!” (Luk. 2: 14), en die baie bekende “God het die wêreld so liefgehad dat Hy sy enigste Seun gegee het, sodat dié wat in Hom glo, nie verlore sal gaan nie, maar die ewige lewe sal hê” (Joh. 3: 16) uit Christus se gesprek met Nikodemus.
Dan begin mens besef dat ons begrip van Christus se vrede totaal verkeerd is. Die vrede wat Christus vir ons nalaat (Joh. 14: 27) is anders as die vrede wat die wêreld vir ons gee. Dan begin ons verstaan dat “ denke van ons sondige aard loop uit op die dood, maar die denke van die Heilige Gees bring lewe en vrede.” (Rom. 8: 6) en “Die koninkryk van God is tog nie ‘n saak van kos en drank nie, maar van geregtigheid en vrede en blydskap in die Heilige Gees” (Rom. 14: 17). Ons moet besef wat dit is, wat vir ons vrede kan bring (Luk. 19: 41) sodat God nie oor ons hoef te huil, soos Christus oor Jerusalem en sy mense gehuil het nie (Luk. 19: 41-42). Ook is dit die vrug van die Gees “…liefde, blydskap, vrede, geduld, vriendelikheid, goedheid, getrouheid…” (Gal. 5: 22) waarby ons vrede kan vind, dié ware vrede soos vir ons beloof word in Fil. 4: 7 (“En die vrede van God, wat alle begrip oortref, sal in Christus Jesus oor julle harte en gedagtes waak”). Dan sal ons mense in opregtheid kan groet met “Genade vir julle en vrede van God, ons Vader, en die Here Jesus Christus” (Luk. 24:36; Rom. 1: 6-7; 1 Kor. 1: 3 & 2 Kor. 1: 2). Christus verseker ons dat Hy reeds die wêreld oorwin het, sodat ons in Hom kan vrede vind (“Dit het Ek vir julle gesê, sodat julle in My vrede mag vind. In die wêreld ervaar julle swaarkry, maar hou moed, Ek het reeds die wêreld oorwin” (Joh 16: 33)).
Vrede vir julle!