Kategorie: Seisoene in die kerklike jaar

VISIO DIVINA #36

Deel 1

Sommige van Jesus se gelykenisse is so deel van die volksmond dat daar idiome bestaan wat vele mense dalk nie eers besef hul oorsprong kom direk uit Jesus se mond nie, soos byvoorbeeld, ‘n blinde kan nie ‘n blinde lei nie.

In 1568 het die Nederlandse kunstenaar, Pieter Bruegel, ‘n skildery gemaak, genaamd “Die gelykenis van die blinde.” Dit was ‘n tyd in Europe toe protestantse bloed gevloei het. In die agtergrond staan die kerkgebou met sy hemelwaartse toring hoog; op die voorgrond lei ses gesiggestremdes mekaar, selfs ‘n kruisie om die hals; tog, duidelik, sáám, oppad na ‘n afgrond.

Maak ons regtig erns met mekaar se lewens en hoe ons mekaar – met woorde en met gedrag – begelei?

Deel 2

TEKSVERS:

“Die hart is bedriegliker as enigiets anders, hy is ongeneeslik; wie kan hom verstaan? Ek, die Here, deurgrond en toets hart en verstand,” (Jer 17:9-10).

Jesus se oordeel was baie skerp teenoor die Fariseërs wat ‘n stel reëls vir hulself gehad het, maar nie self daarvolgens geleef het nie. “Witgepleisterde grafte” het Jesus hulle genoem. Geestelike blindes. Buitekant was hulle diep gelowige maar verdor van binne. Hulle kon die regte dinge sê, selfs uit die Wet van Moses aanhaal, maar van die God van Moses het hulle niks verstaan nie.

Geestelike blindheid is ‘n gevaarlike ding. Jy maak jouself wys dat jy reg is en glo dan jou eie leuen. Dit is oral om ons – selfs in die kerk! Dit is so volop rondom ons dat ons nie daaraan dink dat dit op onsself ook van toepassing kan wees nie.

Geestelike blindheid doen skade – nie net aan jouself nie maar aan almal om jou. Is wat ons sien in die wêreld gebeur nie juis die gevolg van geestelike blindheid (en geestelike hoogmoed) nie!

Ons beweeg al nader aan die Heilige Week. Moet ons nie ook eerlik worstel met die bedrieglikheid wat dalk in ons eie hart en gemoedere gekoester word nie?

GEBED:

Ek pleit vir ‘n eerlike hart en ‘n eerlike verstand, my Here. Ek pleit dat U my van enige geestelike blindheid sal genees.

---

Jesse Manibusan – “Open my eyes, Lord.”

Op Dag 36 van ons Lydenstydreeks #VisioDivina luister ons na ‘n lied, geskryf deur Jesse Manibusan, getiteld, “Open my eyes, Lord.”

Kopiereg: Dr. R.M. Bezuidenhoudt
Hierdie reeks ‘Visio Divina‘ word deur Kopiereg beskerm.
Geen gedeelte van hierdie reeks mag gedupliseer of herversprei word sonder die eksplisiete goedkeuring van die outeur: Dr. R M Bezuidenhout nie.

Indien hierdie reeks u geïnspireer het kan u haar bediening finansieel ondersteun deur die volgende skakel te volg:
https://ronellbezuidenhout.co.za/steun

VISIO DIVINA #35

Deel 1

Teen die muur van ‘n kerk, die St Clement in Tahull, Spanje, is ‘n ikoon uit 1123 nC. Die hand binne ‘n sirkel word die “Dexteria Dei” (Latyn vir die “Regterhand van God”) genoem. Soos Psalm 118:16 sê, “Die regterhand van die HERE is hoog gelig; die regterhand van die HERE doen kragtige dade.”

Dit is nie ‘n vuis nie; nie ‘n afwysende, veroordelende hand nie. Dit is ‘n uitnodigende hand. “Kom na My toe”, nooi die hand. ‘n Eenvoudige ikoon, maar met soveel betekenis! Die hand kom vanuit ‘n “Groot Wit Niks” – ‘n onbekend, misterieuse ruimte. Tog is wit die kleur van reinheid en lig. Om die wit sirkel is ‘n band van koninklike purper; asof dit ons teen die helder lig moet beskerm. Dan volg die blou sirkel – die kleur van die hemel; gevolg deur ‘n sirkel van rooi: die kleur van bloed. Die kleur van liefde.

Deel 2

TEKSVERS:

“Dié wat my Vader vir My gegee het, is die belangrikste van almal, en niemand kan hulle uit die hand van die Vader ruk nie. Ek en die Vader is een.” (Hand 10:29-30).

Ons Lydensreis raak al hoe korter; tree vir tree kom ons nader aan Palmsondag; die begin van die Heilige Week; die week wat uitloop op die “dag van chaos” en die “dag sonder woorde.”

Deesdae voel dit vir my asof ons in die “Tyd van Chaos” leef. (Was dit al ooit anders?) Terwyl ek hierdie dagstuk skryf, is die nuusblaaie vol van politici se dreigemente om die land tot stilstand te bring. Gaan daar geweld uitbreek, of sal alles vreedsaam verloop? As die chaos nie hierdie keer uitbreek nie; wanneer gaan dit? Is dit nie onvermydelik gegewe die chaos van armoede en magsmisbruik nie? Soos wat die chaos daardie week in Jerusalem ook moes uitbreek nie. Jesus het dit geweet – hy het drie maal sy dood met die dissipels bespreek. Maar sou hulle ooit die impak van die chaos kon begryp?

Waaraan die “Dexteria Dei”-ikoon ons herinner is dat – midde hierdie chaos (wat die wêreld nog nooit ontsien het nie) – word ‘n hand uitgesteek. ‘n Hand wat jou intrek na ‘n plek van rus. ‘n Hand wat jou moeë en (soms) beangsde siel aanraak. ‘n Hand wat troos en versterk. Dit is dieselfde hand tot wie Jesus gesê het, “Vader, in U hande gee ek My gees.” (Luk 23:46). Ons mag dit ook doen.

GEBED:

Maak my ‘n getroue medewerker, my Here, tot U koninkryk kom.

---

John Rutter n.a.v. Numeri 6:22-24

Op Dag 35 van ons Lydenstydreeks #VisioDivina luister ons na ‘n verwerking van die Britse komponis, John Rutter n.a.v. Numeri 6:22-24. Wat my veral bygeval het, is die kunswerk op die video – so gepas as ‘n hand wat na ons uitgesteek word.

Kopiereg: Dr. R.M. Bezuidenhoudt
Hierdie reeks ‘Visio Divina‘ word deur Kopiereg beskerm.
Geen gedeelte van hierdie reeks mag gedupliseer of herversprei word sonder die eksplisiete goedkeuring van die outeur: Dr. R M Bezuidenhout nie.

Indien hierdie reeks u geïnspireer het kan u haar bediening finansieel ondersteun deur die volgende skakel te volg:
https://ronellbezuidenhout.co.za/steun

VISIO DIVINA #34

Deel 1

Hierdie skildery van Jorge Cocco (sien ook #32) en die ikoon van Jesus, die Pantokrator (#31) loop hand-aan-hand. Jesus het herhááldelik sy volgelinge daarop voorberei dat Hy gaan sterf, maar hulle moes nie ontsteld wees nie – vir ‘n kort rukkie sal Hy weggaan, en dan sal Hy weer terugkeer, “sodat julle ook kan wees waar Ek is” (Joh 14:5). Die Pantokrator kom beslis terug!

Maar wanneer kom U? Die dissipels wou dit weet; óns ook. Elke nou en dan maak iemand ‘n voorspelling, asof hulle “inside info” het. Tog sê Jesus, “(niemand) weet op watter dag en uur dit sal gebeur nie” (Matt 24:36; 25:13). Dit is waaroor hierdie gelykenis (en die skildery van Jorge Cocco) gaan: Hou julself gereed – want, sowaar, daar gaan ‘n dag kom waar ons uitoep, “Hier kom die bruidegom! Gaan hom tegemoet!” (Matt 25:6).

Is jou lampie vol olie?

Deel 2

TEKSVERS:

“Leef in verwagting dat die dag van God kom en beywer julle daarvoor … om vlekkeloos en onberispelik voor God, en in vrede met Hom, te lewe” (2 Pet 3:12-14).

Dit is vanselfsprekend dat iemand wat die vraag hoor (“Is jou lampie vol olie?”) hulself sou afvra, maar hoe weet ek of my lamp vol olie is? Wie sê ek is nie dalk een van die onverstandige meisies oor wie die gelykenis van Jesus vertel nie? Is dit nie ‘n vraag waaroor ons almal wonder nie?

Die wonderlike is dat Jesus direk na die gelykenis van die 10 jong meisies wat wag op die koms van die Bruidegom (Matt 25:1-13); dadelik oorgaan en vertel wat God se verwagtinge is (Matt 25:14-46). Nes die dissipels is ons ook die tussentydse mense, en van súlke mense verwag God net één ding: soos Jesus die gebrokenes om Hom versorg het, wees julle nou, in die tussentyd, die versorgers. Wees met ander woorde wie Jesus was. Soek die plekke op wat Jesus sou opsoek. Doen die dinge wat Jesus sou doen. Of eenvoudig gestel: volg die voorbeeld wat Hy vir julle nagelaat het. Net dit. Niks meer nie. Niks minder nie.

Daarom het Jesus – heel aan die begin van sy prediking –vertel hoe leef mense wat die koninkryk van God dien: die barmhartiges; die vredemakers; die wat opstaan vir reg en regverdigheid; die wat van God afhanklik is (Matt 5:3-12). Dit is die geseëndes. Hulle is gevul met die Heilige Gees. Hulle lampe is altyd vol. Dit is hulle wat bid, “laat U koninkryk kom.”

GEBED:

Maak my ‘n getroue medewerker, my Here, tot U koninkryk kom.

---

Russiese “Otche Nash” (Onse Vader) – uitgevoer deur die kwintet , “Olga Vocal Ensemble”.

Op Dag 34 van ons Lydenstydreeks #VisioDivina luister ons (net soos op Dag 32 met Jorge Cocco se kunswerk) na die Onse Vader. Maar, in plaas van ‘n Afrikaanse weergawe, luister ons na ‘n Russiese “Otche Nash”; uitgevoer deur die kwintet , “Olga Vocal Ensemble”.

Kopiereg: Dr. R.M. Bezuidenhoudt
Hierdie reeks ‘Visio Divina‘ word deur Kopiereg beskerm.
Geen gedeelte van hierdie reeks mag gedupliseer of herversprei word sonder die eksplisiete goedkeuring van die outeur: Dr. R M Bezuidenhout nie.

Indien hierdie reeks u geïnspireer het kan u haar bediening finansieel ondersteun deur die volgende skakel te volg:
https://ronellbezuidenhout.co.za/steun

VISIO DIVINA #33

Vyfde Sondag in Lydenstyd

Deel 1

Omdat ek vandag meer as een foto wil plaas, is daar drie stukke wat ek aanstuur:

Dit is juis die spieëlbeeld-skildery van Jorge Cocco (#32) wat my aan hierdie spieëlbeeld-ikoon laat dink. Dit word “Jesus Pantokrator” genoem: Jesus, die Heerser oor alles. Die ikoon hang in ‘n klooster in Sinaï en dateer uit 6.n.C. Danksy ‘n argeologiereis in 1938 het dit bekendheid in die Weste verwerf. Vandag sien ‘n mens in vele katedrale – bo teen die plafon – soortgelyke ikone.

Dit is die verstommendste kunswerk – sou jy die ikoon middeldeur sny is dit twee verskillende gesigte, een van ‘n jonger man, en een van ‘n ouer man. Dit beeld die twee nature van Jesus uit: gelyktydig God en gelyktydig mens.

Voordat jy voortgaan, kyk of jy die verskille kan sien.

Deel 2

Hier kan jy sien, die linkerkantste helfte (met die tipiese seën-teken van die handposisie) is van ‘n jonger man. Sy oë kyk tot diep in jou siel. As jy jou hand so hou dat jy net die oë sien, is dit ‘n deernisvolle, direkte kyk: Jesus sien jou raak. Hierdie kant beeld Jesus, die mens, uit – – gebore as verlosser ook van jóú.

Die regterkantste gesig van ‘n ouer man met ‘n boek in sy hand het opgetrekte wenkbroue Wat sou dit kommunikeer? Selfs die oogposisie kyk wyer. Hierdie kant beeld Jesus uit as die regter wat sal kom om te oordeel. Die Een voor wie almal sal buig.

Deel 3

TEKSVERS:

“Nou wag die oorwinnaarskroon vir my, die lewe by God. Op die dag dat Hy weer kom, sal die Here, die regverdige Regter, dit vir my gee, en nie net vir my nie, maar ook vir almal wat met verlange uitsien na sy koms” (2 Tim 4:8).

Die woord “Pantokrator” word gewoonlik in die Bybel net met God vereenselwig: God, die Almagtige. Tog bring die profeet Jesaja reeds die boodskap: die Seun wat gebore sal word,“…sal heers, en Hy sal genoem word: Wonderbare Raadsman, Magtige God, Ewige Vader, Vredevors. Sy heerskappy sal uitbrei, en Hy sal vir altyd vrede en voorspoed bring. … Hy sal dié koninkryk vestig en in stand hou deur reg en geregtigheid, van nou af en vir altyd” (Jes 9:5-6).

Oor Homself het Jesus so getuig: “Wanneer die Seun van die mens in majesteit kom en al die engele saam met Hom, sal Hy op sy koninklike troon gaan sit.  Al die volke sal voor Hom bymekaar gebring word, en Hy sal die mense van mekaar skei … Dan sal die Koning vir dié aan sy regterkant sê: ‘Kom, julle wat deur my Vader geseën is! Die koninkryk is van die skepping van die wêreld af vir julle voorberei. Neem dit as erfenis in besit,.. (Matt 25:31-34).

Intussen oefen ons om in die koninkryk van God te leef. Daagliks. Ons oefen deur die geringstes te versorg. Ons oefen om barmhartig en genadig te wees. Ons oefen om lief te hê en ons medemens te dien (Matt 25:35-40).

Vandag kan ons uitroep: Die Pantokrator kom!

GEBED:

Almagtige God, Heerser oor die heelal – dankie dat ek U Naam ken; en U my naam ken.

­­­­­­­­­­­­———-

“Oorwinningslied” – Piet Smit saam met die Drakensbergse Seunskoor.

Op Dag 33 van ons Lydenstydreeks #VisioDivina luister ons na die “Oorwinningslied” soos opgeneem deur Piet Smit saam met die Drakensbergse Seunskoor.

Kopiereg: Dr. R.M. Bezuidenhoudt
Hierdie reeks ‘Visio Divina‘ word deur Kopiereg beskerm.
Geen gedeelte van hierdie reeks mag gedupliseer of herversprei word sonder die eksplisiete goedkeuring van die outeur: Dr. R M Bezuidenhout nie.

Indien hierdie reeks u geïnspireer het kan u haar bediening finansieel ondersteun deur die volgende skakel te volg:
https://ronellbezuidenhout.co.za/steun

VISIO DIVINA #32

Deel 1

Jorge Cocco, die kunstenaar uit Argentinië, het ‘n hele reeks kunswerke oor Jesus se gelykenisse geskilder, o.a. die onbarmhartige skuldeiser. Daar is net drie mense in hierdie kunswerk; die middelste figuur is ‘n duplikaat van mekaar. Eers is hy knielend voor die heerser (in blou); en dan is hy weer die een wat ‘n trappie hoër sit as die een wat voor hom pleit.

Daagliks maak ons ook keuses of ons met genade wil optree, en of ons iemand van genade gaan weerhou. Ons maak almal daagliks die keuse of ons iemand gaan vergewe al dan nie. Soms vra dit dat jy jouself in die spieël van ‘n kunswerk soos hierdie sal raaksien om uit te pluis aan watter kant jy jouself bevind.

Deel 2

TEKSVERS:

“Moes jy nie jou mededienskneg ook barmhartig wees soos ek jou ook barmhartig gewees het nie?” (Matt 18:33).

Jesus het al ‘n tweede keer sy dood aangekondig (Matt 17:22-23), maar hoe min het die dissipels regtig verstaan. (Hulle stry dan selfs oor wie die belangrikste in die koninkryk sal wees – 18:1). Hoe min het selfs Petrus verstaan as hy later vir Jesus vra: “Here, hoe dikwels sal my broeder teen my sondig en ek hom vergewe? Tot sewe maal toe” (18:21). Die Wet van Moses het gesê, drie keer. Ek wonder of Petrus gedink het dat Jesus hom sal komplimenteer dat hy self antwoord, “sewe maal?” Is sewe dan nie die volmaakte getal nie; wat meer is nodig?

En dan verduidelik Jesus: Die koninkryk van die hemele kan vergelyk word met ‘n amptenaar wat sy koning miljoene rand skuld, en omdat hy dit nie kan terugbetaal nie, sê die koning die amptenaar en sy ganse gesin moet verkoop word om die skuld te betaal. So hartstogtelik pleit die man dat die koning se hart versag en hy al die skuld afskryf (v23-27). ‘n Mens sou verwag dat die amptenaar dan net so goedhartig teenoor ‘n kollega sou wees wat hom weer (‘n bietjie) geld skuld. Die doel van die gelykenis: Vergewe soos julle vergewe is.

Maar dit is met daardie gebeure die Vrydag by Kopbeenkoppie dat die dissipels eers die werklike betekenis van hierdie gelykenis sou begryp. Daar aan die kruis het Jesus uitgeroep: “Vader, vergeef hulle.” Vergewe hulle hul miljoeneaan skuld. Vergewe hulle álles. Vergewe hulle sewe-en-sewentig maal sewe keer.

Hoe kan ons dan wil boekhou van ander se kwaad?

GEBED:

Ons Vader in die hemel, vergeef my, soos ek hulle vergewe wat teen my sondig.

---

Rina Hugo: Onse Vader,

Op Dag 32 van ons Lydenstydreeks #VisioDivina luister ons na Rna Hugo se weergawe van die Onse Vader,

Kopiereg: Dr. R.M. Bezuidenhoudt
Hierdie reeks ‘Visio Divina‘ word deur Kopiereg beskerm.
Geen gedeelte van hierdie reeks mag gedupliseer of herversprei word sonder die eksplisiete goedkeuring van die outeur: Dr. R M Bezuidenhout nie.

Indien hierdie reeks u geïnspireer het kan u haar bediening finansieel ondersteun deur die volgende skakel te volg:
https://ronellbezuidenhout.co.za/steun

VISIO DIVINA #31

Deel 1

Die Russies-gebore, Alexey Pismenny, het ‘n ikoon in drie panele geskilder van verskillende vyeboom-tonele uit die evangelies. Hierdie paneel is ‘n verwysing na die gelykenis van die onvrugbare vyeboom (Luk 13:6-9). As jy na die ikoon as ‘n geheel kyk, sien jy die gewelddadigheid raak. Behalwe vir die byl wat gereed is in Petrus (langs Jesus) se hande; tuimel die toring van Siloam op mense neer (lees Luk 13:3). Aan die anderkant sit Pilatus op sy troon en kyk toe hoe ‘n laksman gereed staan met ‘n slagtersmes om iemand te onthoof (aldus Luk 13:1).

Duidelik hou die tonele verband met geweld. Maar Jesus hou sy een hand na bo; die simbool van shalom en seën. Sy ander hand wys na die ontkiemende groen blaartjies. Simbole van lewe. Asof Jesus wil sê, gee genade net nog eers ‘n kans.

Moet dit nie dalk ‘n ikoon vir ons tyd genoem word nie?

Deel 2

TEKSVERS:

“Maar die tuinier antwoord: Meneer, laat hom nog hierdie jaar staan. Ek sal die grond rondom hom omspit en bemes. Miskien sal hy dan volgende jaar vrugte dra. Maar so nie, kan u hom uitkap” (Luk 13:8-9).

Kyk weer lank na die ikoon: moenie die graaf en die waterhouer miskyk nie! Simbole van ‘n tuinier se werk. Jesus vereenselwig hom baie duidelik as die tuinier in die gelykenis. Die een wat vir nog ‘n kans by die boer pleit. Duidelik is Jesus die een wat die “genadejaar” vir die vyeboom bewerk het.

Drie jaar reeds is Jesus met sy preekbediening besig en steeds wil die Jode hom nie as Messias aanvaar nie. (Simbolies: drie jaar lank is daar geen vrug in die vyeboom nie). Nog net een jaar, vra Hy. Wat Hom gegun word – alhoewel dit Hy is wat dan die byl se kap sal moet verduur.

Die sinnetjie, “Meneer, laat hom (die vyeboom) staan” kan vertaal word met, “vergewe hom.” Jesus se kruiswoorde, “Vader, vergewe hulle”, is ‘n pleit: “laat hulle staan … moenie hulle iets aandoen nie.” En dit is presies wat ons bid: Gee ons tog U genadejaar, Heilige God, sodat die Tuinier kan omspit en bemes, sodat ons weer kan vrug dra.

GEBED:

Dankie dat die Tuinier ook vir ons by U intree, Ons Vader.

---

Emmy Rose – “Tend” (“Be the gardener of my heart”)

Op Dag 31 van ons Lydenstydreeks #VisioDivina luister ons na Emmy Rose wat “Tend” (“Be the gardener of my heart”) sing. Die lirieke verskyn in die video.

Kopiereg: Dr. R.M. Bezuidenhoudt
Hierdie reeks ‘Visio Divina‘ word deur Kopiereg beskerm.
Geen gedeelte van hierdie reeks mag gedupliseer of herversprei word sonder die eksplisiete goedkeuring van die outeur: Dr. R M Bezuidenhout nie.

Indien hierdie reeks u geïnspireer het kan u haar bediening finansieel ondersteun deur die volgende skakel te volg:
https://ronellbezuidenhout.co.za/steun

VISIO DIVINA #30

Deel 1

Ek moes eers die gedeelte in Lukas 12 gaan lees omdat ek nie dadelik hierdie Grieks-ortodokse ikoon herken het nie. (Daarin is ‘n groot les – ‘n ikoon wil niks anders openbaar as wat die Skrif reeds sê nie, maar hoe kan die Heilige Gees die “oë van jou hart” laat sien, as jou ore nie geluister het nie.)

Hier word die gelykenis uitgebeeld van die ryk man (Lukas noem hom ‘n “ryk dwaas”) met aardse skatte wat nie hul einde ken nie; maar hoe armoedig is jy as jy nie aansit by die rykdom wat by God se tafel gevind word nie. Een oomblik maak jy nog bymekaar, die volgende oomblik besoek die engel van die dood jou.

Is dit nie ‘n ikoon wat ons almal se waarskuwing is nie? Bely jy nie ook soms dat Jesus die “koning” van jou lewe is, terwyl die daaglikse realiteit dalk iets anders demonstreer nie?

Deel 2

TEKSVERS:

“Julle moet julle ook nie gedurig afvra wat julle gaan eet of drink nie, en julle moenie besorg wees nie. … Beywer julle vir sy koninkryk, dan sal Hy julle ook hierdie dinge gee.” (Luk 12:29-31).

Dit bly altyd vir my ‘n vraag: wanneer is genoeg genoeg? Dit hang sekerlik af met wie ek myself vergelyk: wil ek opwaarts die leër uitklim, dan is ek bevrees het ek nog glad nie genoeg nie. As ek afkyk, skaam ek my vir myself; want diep binne weet ek, ek leef nie volgens wat Jesus geleer het nie: “Verkoop julle besittings en gee bydraes vir die armes. Skaf vir julle ‘n beurs aan wat nie leeg raak nie, ‘n onuitputlike rykdom in die hemel, waar geen dief dit kan bykom en geen mot dit kan verniel nie” (v33).

Hoe lyk ‘n “beurs wat nie leeg raak nie”? Dadelik dink ek aan Psalm 42:2-3 waar Dawid pleitend sug: “Soos ‘n wildsbok smag na waterstrome, so smag ek na U, o God. Ek dors na God, na die lewende God. Wanneer kan ek gaan en voor God verskyn?” As ek so smagtend leef om vervul te word met die goedheid en kennis van God, dan sal ‘n aardse beurs met note wat kraak nooit my verlange kan stil nie. Een trappie hoër op die leër sal dan sinloos wees.

Hierdie reis is ‘n tyd vir eerlik wees. Ook oor my smagtinge. Dit is ‘n tyd vir belydenis. Ook van my gierigheid. Dit is ‘n tyd van vas en mindermaak. Dit is ‘n tyd van vervuld raak met God se teenwoordigheid.

GEBED:

My Here, mag ek aanskuif aan U tafel, as iemand wat U woorde ernstig geneem het.

---

Retief Burger – “Alles vir my”

Op Dag 30 van ons Lydenstydreeks #VisioDivina luister ons na Retief Burger se weergawe van “Alles vir my. Die lirieke verskyn in die video.

Kopiereg: Dr. R.M. Bezuidenhoudt
Hierdie reeks ‘Visio Divina‘ word deur Kopiereg beskerm.
Geen gedeelte van hierdie reeks mag gedupliseer of herversprei word sonder die eksplisiete goedkeuring van die outeur: Dr. R M Bezuidenhout nie.

Indien hierdie reeks u geïnspireer het kan u haar bediening finansieel ondersteun deur die volgende skakel te volg:
https://ronellbezuidenhout.co.za/steun

VISIO DIVINA #29

Deel 1

Uit die 40+ gelykenisse wat Jesus vertel, is bykans vyftien die sg. Koninkryksgelykenisse. Hoe kan ‘n mens ooit die koninkryk van God voorstel as jy dit nie kan sien nie! Daarom gebruik Jesus alledaagse beelde om die ingewikkelde teologiese konsep te verduidelik. Daar is voorbeelde uit boerdery; sommige hou verband met geld, ander met visvang; daar is beelde van ‘n huwelik; selfs een uit ‘n kombuis. So help Jesus sy luisteraars (ons ook) om te sien.

Elke kunswerk vertel ‘n visuele storie. Wat hierdie skildery van Daniel Bonnell so treffend maak is dat ons twee van Jesus se gelykenisse gelyktydig sien. Dink jouself in dat Jesus saam met jou kyk en vir jou sê, “Met die koninkryk van die hemele gaan dit soos met…” Wat sou dit wees?

Deel 2

TEKSVERS:

“Maar wat eers vir my ‘n bate was, beskou ek nou as waardeloos ter wille van Christus,ja, nog meer: ek beskou alles as waardeloos, want om Christus Jesus, my Here, te ken, oortref alles in waarde.” (Fil 3:7-8).

Jesus vertel drie baie kort gelykenisse in Matteus 13:44-50. Die skildery van Daniel Bonnell, getiteld, “The pearl of great price”, beeld twee daarvan uit. Die dissipels het steeds nie heeltemal verstaan wat Jesus hulle oor die koninkryk van God wou leer nie; toe gebruik Jesus hierdie voorbeelde: dit is soos ‘n waardevolle skat is wat iemand in die grond ontdek. So waardevol is dit vir hom, dat hy alles verkoop wat hy het, net om die grond te gaan koop sodat hy die skat kan kry. Dan kom die tweede voorbeeld, “Met die koninkryk van die hemel gaan dit soos met ‘n handelaar wat op soek is na goeie pêrels. As hy ‘n baie waardevolle pêrel raakloop, gaan verkoop hy alles wat hy het, en koop die pêrel.”

Destyds was pêrels werklik so skaars dat ‘n handelaar alles daarvoor sou opoffer net om die eienaar daarvan te kon word. Maar as jy daardie één gekry het, dan hoef jy nooit weer te soek nie. Jou soekende siel het tot bedaring gekom. Paulus het dit verstaan. Niks ewenaar die vrede wat jy ervaar as die vrede tussen mens en God nie. Soos Paulus ook skryf, dit is vrede wat ‘n mens se verstand te bowe gaan.

Net as jy dit eers self beleef, sal jy weet hoekom dit so kosbaar is!

GEBED:

Here, my Here, laat alles wat eens waardevol was, hul betekenis verloor net sodat ek meer van U kan kry.

---

“Laat U Koninkryk hier kom”, deur Jannie du Toit

Op Dag 29 van ons Lydenstydreeks #VisioDivina luister ons na ‘n “Laat U Koninkryk hier kom”, soos gesing deur Jannie du Toit, op sy CD: Palet.

Kopiereg: Dr. R.M. Bezuidenhoudt
Hierdie reeks ‘Visio Divina‘ word deur Kopiereg beskerm.
Geen gedeelte van hierdie reeks mag gedupliseer of herversprei word sonder die eksplisiete goedkeuring van die outeur: Dr. R M Bezuidenhout nie.

Indien hierdie reeks u geïnspireer het kan u haar bediening finansieel ondersteun deur die volgende skakel te volg:
https://ronellbezuidenhout.co.za/steun

VISIO DIVINA #28

Deel 1

In 1684 is hierdie Arabiese manuskrip in Egipte deur ‘n koptiese monnik geïllustreer, toegebind met ‘n bokvel buiteblad. Die hele bundel (met bykans 50 illustrasies) is uitbeeldinge oor die vier evangelies. Hierdie is die 24ste folio van die bundel, en die gelykenis is getiteld: Die mosterdsaad. ““Die koninkryk van die hemel is soos ‘n mosterdsaadjie wat iemand gevat en in sy land geplant het. Dit is die kleinste van al die soorte saad, maar as dit uitgegroei het, is dit groter as die tuinplante en word dit ‘n boom, sodat die voëls in sy takke kom nes maak.” (Matt 13:31-32). ‘n Piepklein (2mm) swart mosterdsaadjie met ‘n enkele stam wat uitspruit met takke en tot 3 meter hoog kon groei.

Lees meer “Lydenstyd: “Visio Divina” Dag 28″

VISIO DIVINA #27

Deel 1

Vir ‘n geruime tyd het ons na uitbeeldinge van Jesus se wonderwerke gekyk; hierdie week begin ons met van Jesus se gelykenisse.

In 1888 het Vincent van Gogh “die Saaier teen die sakkende son geskilder.” Van Gogh het die kunstenaar as ‘n saaier beskryf, en die kyker (ons) as die saailand. Maar kyk langer, biddend hierna, dan breek die kunswerk oop voor jou oë. Die sakkende son is meer, dit is ‘n stralekrans (“halo”) om die saaier se kop. Die kleure van die omgewing dui op vrugbare grond. Reg langs die saaier groei ‘n reuse boom aan die oewer van die rivier. Soos Jer 17:7-9 leer, “Dit gaan goed met die mens wat sy vertroue in die Here stel, die mens vir wie die Here ‘n veilige vesting is; so iemand is soos ‘n boom wat by water geplant is en sy wortels na die stroom toe uitstoot.”

Lees meer “Lydenstyd: “Visio Divina” Dag 27″

VISIO DIVINA #26

4de Sondag in Lydenstyd

Teen hierdie tyd weet jy al, Sondae is ‘n dag van viering. Elke Sondag vier ons opstandingsdag. Sondae is nie deel van die 40-dae Lydensreis nie. Dit is so nodig dat ons deur die 40 dae in Lydenstyd nadink oor ons lewens. Wie is ons? Wie s’n is ons? Waarop is ons hoop werklik ingestel? Wat is ons roeping? Leef ons dit uit? Leef ons as beeld van God en verteenwoordiger van Jesus?

Lees meer “Lydingstyd: “Visio Divina” 4de Sondag in Lydenstyd”

VISIO DIVINA #25

Deel 1

Die Johannes-evangelie gebruik ‘n ander woord vir wonderwerke as die res van die evangelieskrywers. Vir Johannes is die wonderwerke meer as net wonders; dit is fisiese tekens dat die profesie oor die Messias vervul is. Alhoewel die wonderverhaal waar Jesus ‘n doofstom man genees het, net in Markus voorkom, is hierdie uitbeelding báíe, báíe meer as net ‘n wonder! Dit beeld eeue se profesieë uit dat die Messias sal kom: “Blindes sal kan sien, dowes sal kan hoor, lammers sal kan rondspring soos takbokke, stommes sal kan sing. Strome water sal uit die woestyn uit bars; daar sal riviere loop in die droë wêreld” (Jes 35:5-6). Maar meer nog, dit beeld die die ganse lewe van Jesus uit: van gekruisigde tot opgestane tot verheerlikte. Wat dood is a.g.v. sonde bring Sy bloed weer lewe.

Lees meer “Lydenstyd: “Visio Divina” Dag 25″

VISIO DIVINA #24

Deel 1

Hierdie is nie ‘n antieke uitbeelding nie (die Engelse woorde daarop verklap dit). Ons ken die verhaal: 10 melaatses word genees, maar slegs een kom terug om dankie te sê. Wat val jou op terwyl jy hierna kyk? Vir my is dit die enkele man wat by Jesus se voete kniel. Nege ander mans is steeds vol sere. Maar is al tien dan nie genees nie? Waarom hou die kunstenaar die ander nege dan nog steeds siek? Waarskynlik omdat hulle dalk van hul melaatsheid genees is, maar nie die heelheid (vrede) ontvang het (sien #16) wat Christus werklik wil aanbied nie.

Lees meer “Lydenstyd: “Visio Divina” – Dag 24″

VISIO DIVINA #23

Deel 1

Vroeër (#VD 6) is ‘n mosaïek-muurpaneel geplaas wat uit die 6de eeu dateer; vandag se toneel kom uit dieselfde basilika in Ravenna, Italië.

Dit is ‘n visuele uitbeelding van die vrou wat “aan bloedvloeïng gely het” (Matt 9:20; Mark 5:25; Luk 8:43). Die kunstenaar beeld hier nie die groter skare uit nie; net vir Jesus saam met 4 dissipels. Die vrou is seker reeds “uitgevang” omdat sy knielend voor Jesus is. Kyk net hoe toegevou is haar hande (ook een van die agterste mans s’n). Hierdie vrou is volgens die Torah onrein. (Twaalf jaar reeds!) Niemand mag haar aanraak nie. Maar Jesus hou sy hand uitgestrek.

Lees meer “Lydenstyd: “Visio Divina” Dag 23″

VISIO DIVINA #22

Deel 1

In 1433 het ene “Daniel van Urank” ‘n Armeense miniatuur Evangelie(tjie) geïllustreer in ‘n bykans naïwe manier! Sewe figure (die getal van volkomenheid) is by ‘n tafel: ses dissipels (vandaar die stralekrans) en Jesus (sy kleedskleure en die kruis in sy stralekrans dui dit aan). Al die oë is na Jesus gedraai; en Jesus se oë is boontoe gerig. Dit is duidelik ‘n nagmaaltafel, maar Jesus staan bo-op die tafel. Waarom?

Elke dissipel het een broodjie; Jesus hou twee vas. Dit is nie vir hulle nie; dit is om uit te deel. Tel die broodjies en vissies in elke kelk – nie een van die verhale in die Bybel praat van drie vissies en drie broodjies nie. Waarom dan? Maar, jy weet: drie is die Goddelike getal. Op die tafel – weerskante lê 2 x 7 broodjies.

Die nagmaal en die verhaal van Jesus wat die skare voed – alles in een klein illustrasie, om ons te herinner: God deel oorvloediglik uit!

Deel 2

TEKSVERS:

“En God is by magte om aan julle alles in oorvloed te skenk, sodat julle in alle opsigte altyd van alles genoeg kan hê en volop kan bydra vir elke goeie werk” (2 Kor 9:8).

Net een wonderwerk verskyn in al vier evangelies, en dit is daardie een waar Jesus die honger skare voed (Matt 14:15-21; Mark 9:1-10; Luk 9:12-17; Joh 6:1-13). Elke evangelieskrywer gee sy eie weergawe van die verhaal, maar daar is veel meer aan hierdie gebeurtenis as maar net Jesus wat honger mense jammer kry en vir hulle kos wil uitdeel. Jesus doen veel meer! Dit is ‘n illustrasie van wat wag! Hy gee nóú reeds ‘n proesel van die feesmaal wat ééndag gehou gaan word (aldus Openb 3 en 19). Selfs Dawid kon daaroor juig: “U ontvang my soos ‘n eregas, ek word oorlaai met hartlikheid” (Ps 23:5).

Daar is etlike beskrywende woorde vir God in die Bybel: genadige; liefdevolle; goeie; sterke, ens. Maar, die woord wat dit alles vir my omsluit, is dat God die vrygewige God is. Lees net weer 2 Kor 9:8. Kyk net hoe kies Paulus sy woorde: alles; in oorvloed; alle opsigte; altyd; van alles; genoeg; volop. God hou niks terug nie!

Maar net soos in die wonderverhaal waar Jesus by die dissipels wil weet wat húlle by hulle het om te eet; gaan 2 Kor. 9 ook oor óns wat kry om te gee. Gaan lees vandag 2 Kor 9 en kyk weer na Daniel van Urak se illustrasie, en vra jouself af: is jou beskrywende woord ook soos díé van God – vrygewige? Jy is immers beeld van God.

GEBED:

Maak van my ‘n vrygewige mens, Heilige Gees, omdat ek so vrygewiglik van U ontvang.

Du bist gesegnet, ein Segen bist du” (Jy is geseën, ‘n seëning is jy) deur Helge Burggrabe

Op Dag 21 van ons Lydenstydreeks #VisioDivina luister ons “Du bist gesegnet, ein Segen bist du” (Jy is geseën, ‘n seëning is jy) deur Helge Burggrabe. Dit is so maklik om saam te sing, omdat dit ‘n enkelfrase lied is.

As hierdie reeks jou bemoedig (én jy kan dit bekostig), wil jy nie oorweeg om my finansieel te ondersteun nie? 
STANDARD BANK
Takkode:  051001
Rek No:  080042805
RM BEZUIDENHOUT
Kampstraat 13, Eurekapark, 
Groot-Brakrivier, 6525.

VISIO DIVINA #21

Deel 1

In 2007 het die Amerikaanse kunstenaar, Michael Dudash, die skildery gemaak, getiteld: “Not by bread alone.” Dit sou ook seker getiteld kon wees, “Not by work alone.” Want is dit nie ons groot “probleem” nie! Vra iemand hoe dit gaan, en die antwoord is iets soos, “aan die hardloop…”.

Soveel keer lees ons in die Bybel dat Jesus “soos sy gewoonte was” (Luk 22:39) homself afgesonder het om te gaan bid. “Hy het alleen na die berg toe gegaan om te bid. Toe dit aand word, was Hy daar alleen” (Matt 14:23).

Dudash (wat self in die berge van Vermont leef) kontrasteer die ruheid van die berge (is dit dalk simbolies van die lewe?) met die sagte, vloeiende wit van Jesus se kleed, ‘n postuur van kalmte.

Lydenstyd is ‘n tyd van afsondering en luister. Ek het herhaal my eie motto aan myself: “die sekerste manier om nie God se stem te hoor nie is ‘n besige lewe.”

Deel 2

TEKSVERS:

“Hy beskut jou onder sy vleuels en is vir jou ‘n veilige skuilplek. Sy trou beskerm jou aan alle kante.” (Ps 91:4).

Vandag se meditasie het eintlik anders om begin: eers het ek – toevallig – op die musiek van Melissa Dittrich oor Psalm 91 afgekom. Terwyl ek na die woorde luister, is dit nie ons menslike vrese en behoefte na veiligheid waaraan ek eerste gedink het nie, maar aan Jesus s’n. Is dit dalk waarom Hy Homself daagliks afgesonder het om te bid? Soms ‘n ganse nag lank!

Die Psalms was die gebede van Jesus se tyd. Hoeveel keer het Hy dalk Psalm 91 opgesê (wat Hy – as ‘n Joodse man – uit sy hoof sou ken). Ek kan my indink, hoe nader Jesus aan daardie Donker Vrydag gekom het, hoe groter sou sy begeerte na tyd met God geword het. Ons weet nie wat Jesus gebid het as hy homself so afgesonder het nie. Maar ek hoor Hom in sy moedertaal bid: “El Shaddai … Abba …”. Allerhoogste God … Vader…

En terwyl ek Psalm 91 weer lees, sien ek weer die ikoon van Rublev se drie engele met hul vlerke (of “vleuels”) wat aan mekaar raak; ‘n muur agter hulle vorm. Soos Dawid skryf: “Hy beskut jou onder sy vleuels en is vir jou ‘n veilige skuilplek. Sy trou beskerm jou aan alle kante.” Geen opening waardeur ons kan val. Veilig. Vasgehou.

GEBED:

U, Almagtige, “U is my toevlug en my veilige vesting, my God op wie ek vertrou.

Melissa Dittrich David: Psalm 91

Op Dag 21 van ons Lydenstydreeks #VisioDivina luister ons na die Kanadees, Melissa Dittrich David, se weergawe van Psalm 91.

As hierdie reeks jou bemoedig (én jy kan dit bekostig), wil jy nie oorweeg om my finansieel te ondersteun nie? 
STANDARD BANK
Takkode:  051001
Rek No:  080042805
RM BEZUIDENHOUT
Kampstraat 13, Eurekapark, 
Groot-Brakrivier, 6525.

VISIO DIVINA #20

Deel 1

Wat hierdie kunswerk van die Koreaanse kunstenaar, Yongsung Kim, vir my so uniek maak is dat jy nie presies weet vanuit watter rigting jy daarna moet kyk nie. Een oomblik kyk jy van bo en sien die figuur aan die onderkant staan met ‘n uitgestrekte hand. Is dit nie wat Saggeus (Visio Divina #18) dalk ook gesien het nie – ‘n hand, opgesteek in sy rigting: “Saggeus, klim af.” Die volgende oomblik kyk jy weer van onder af en sien jy die hand wat afgesteek word na jou: “Hou vas, ek sal jou uit trek.”

Natuurlik, ja, jy moet van onder af kyk, want die son is dan agter die figuur se kop. Is dit Jesus met ‘n stralekrans om sy kop (‘n “halo”)? Alles is uit fokus geskilder, behalwe die Hand.

Dit is alles wat ek sien. Die vraag is, wat sien jy?

Deel 2

TEKSVERS:

“As jy deur water moet gaan, is Ek by jou, deur riviere, hulle sal jou nie wegspoel nie” (Jes 43:2).

Ek kan werklik nie met sekerheid sê uit watter rigting ek na die uitgestrekte hand moet kyk nie. Natuurlik suggereer die golwe ‘n drenkelling aan wie ‘n reddened hand deur die water aangesteek word. Tog sien ek ook hoe ek te hoog geklim het, en die hand van onder af aangebied word om my te help om af te kom. Dit is toe dat ek besef, eintlik maak dit nie saak van waar ek kyk nie, die hand wat uitgestrek is, kan ek – ongeag die rigting – nie miskyk nie. Dit is altyd daar. “U omsluit my van alle kante,” skryf Dawid (Ps 139:5). Die Hand is nooit afwesig nie.

“Klim ek op na die hemel, is U daar, gaan lê ek in die doderyk, is U ook daar,” skryf Dawid (139:8). Oral vind ek U hand. Hoe instemmend sal ons nie almal kopknik nie. En tog… waarom voel ons dan soms so godsverlate? Het jy dan nie ook al gewonder nie: Here, wáár is U dan? Waar is die uitgestrekte Hand dan nou wanneer ek dit nodig het?

Soek ons dalk die hand vanuit ‘n rigting en herken ons dit nie vanuit ‘n ander rigting nie? Soos die persoon wat – na ‘n groot vloed – op sy huis se dak sit, pleitend dat God sal red. Menigmaal kom iemand daar verby wat aan ‘n groot boomstomp klou: “spring, hier is plek!” Maar jy kyk in die lug vir die helikopter…

GEBED:

Dankie dat die “Ek is”, altyd by my is!

Take My Hand, Precious Lord – John Thomas.

Op Dag 19 van ons Lydenstydreeks #VisioDivina luister ons na ‘n ou bekende Spiritual – “Take My Hand, Precious Lord” – soos uitgevoer deur die bariton, John Thomas.

Uit die lirieke:

When my way groweth drear
Precious Lord, linger near
When my light is almost gone
Hear my cry, hear my call
Hold my hand lest I fall
Take my hand, precious Lord
Lead me on

As hierdie reeks jou bemoedig (én jy kan dit bekostig), wil jy nie oorweeg om my finansieel te ondersteun nie? 
STANDARD BANK
Takkode:  051001
Rek No:  080042805
RM BEZUIDENHOUT
Kampstraat 13, Eurekapark, 
Groot-Brakrivier, 6525.

VISIO DIVINA #19

3de Sondag in Lydenstyd

“Die genade van die Here Jesus Christus en die liefde van God en die gemeenskap van die Heilige Gees sy met julle almal” (12 Kor 13:13). Die grootste misterie speel voor ons af wanneer ons Sondae in die erediens gegroet word in die Naam van die Drie-Enige God. Maar wat sal ‘n gewone sterfling tog ooit van hierdie misterie kan verstaan? Daarom het ons digters. En ons het komponiste. En ook kunstenaars. Hulle wat dit sê wat ons nie kan nie. Andrei Rublev (15de eeu) was so iemand. Geen ander ikoon kan vir ons die Drie-Eenheid (Triniteit) so “verwoord” soos die “Ikoon van die drie besoekers” (1425-27) nie.

In Genesis 18 lees ons van drie engele wat Abraham en Sara besoek, maar kyk jy dieper, dan leer jy hierin iets van die misterie van die Drie-Enigheid ken:

Drie engele – so intiem teen aan mekaar dat hulle vlerke raak – sit in ‘n sirkelvorm (simbool van ewigheid) aan ‘n tafel. Daar is aan die voorkant ‘n opening – dit nooi jou in om deel te neem aan die ete. Ons lees dat Abraham ‘n kalf geslag het. Die bak staan op die tafel. Al drie figure seën die bak. Sonder woorde verklap die kleure alles! Een is geklee in die kleur van heerlikheid: goud. Een dra die kleur van bloed; met hemelse blou daaroor. Die derde figuur dra ook groen (die kleur van nuwe lewe). Alles is goddelike kleur. Kyk na die agtergrond: ‘n boom verrys agter die middelste figuur. Die boom van die lewe. Die boom wat die hout kon verskaf vir ‘n kruis?

Daar is drie bekers – een op die tafel; een op die grond (waarin die gebede van gelowiges opgevang word?) en een waarin die middelste figuur sit (sien die videoverduideliking).

Al wat oorbly is vir ons om te sê, “O diepte van die rykdom en wysheid en kennis van God! Hoe ondeurgrondelik is sy oordele, hoe onnaspeurlik sy weë! Uit Hom en deur Hom en tot Hom is alle dinge. Aan Hom behoort die heerlikheid tot in ewigheid” (Rom 11:33-36).

GEBED:

Heilige Drie-Enige God, dankie dat ek die misterie van U wese in hierdie Lydenstyd beter mag leer ken.

Ikoon van die Triniteit

Kyk gerus na hierdie verduideliking van die Ikoon van die Triniteit:

As hierdie reeks jou bemoedig (én jy kan dit bekostig), wil jy nie oorweeg om my finansieel te ondersteun nie? 
STANDARD BANK
Takkode:  051001
Rek No:  080042805
RM BEZUIDENHOUT
Kampstraat 13, Eurekapark, 
Groot-Brakrivier, 6525.

VISIO DIVINA #18

Deel 1

In 1170 nC is ‘n klein (27 x 18 cm) geïllustreerde manuskrip vir die St Albans Abbey (Abdy) saamgestel – die sg. Albans Psalter. By elke illustrasie van ‘n bybelverhaal word die teks met ‘n versierde eerste letter (so groot soos ‘n klein muntstuk) begin. Waarna ons vandag kyk is die eerste letter (‘n “d”) waarmee die verhaal van Saggeus begin. Kyk lank hierna – wat sien jy alles? ‘n Boom met 4 takke. En druiwetrosse? Sou dit herinner aan Jesus se woorde: “Ek is die wingerdstok; my Vader die boer” (Joh 15:5). Of, dat ons aan ons vrugte geken sal word nie (Matt 12:33)?

Waarom 5 trosse as daar dan net 4 takke is? In die Bybel is die getal 5 die simbool van genade. Dit beeld God se genade-op genade, sy goedheid en guns teenoor die mens uit. (En is die verhaal van Saggeus nie juis ‘n verhaal van genade nie!)

Deel 2

TEKSVERS:

“Die Seun van die mens het immers gekom om te soek en te red wat verlore is” (Luk 19:10).

Saggeus was nie net ‘n tollenaar nie; hy was die hóóftollenaar. Hy was nie net ryk nie, hy was báíe ryk. Saggeus was ook ‘n verstotene onder sy eie mense. (“’n Sondaar” noem Lukas hom in 19:7, m.a.w. iemand wat die Wet van Moses verontagsaam het.) Sulke mense is gewoonlik ook vereensaamdes, juis omdat hulle so “sosiaal onaanvaarbaar” was. (Ons ken almal sulke mense; dit is daardie tipe mense oor wie ons praat; of wie ons liefs in ‘n winkelsentrum maak of ons nie raaksien nie.)

Ek wonder of Saggeus gedink het hy gaan net ‘n toeskouer van Jesus bly? Die blindes en die melaatses het nog die verskoning gehad dat hulle nie hul eie siektetoestande “gekies” het nie; Saggeus – daarenteen – het gekies om ‘n tollenaar te wees. Hy het gekies om geld van sy arm landgenote vir homself toe te eien. Die verwerpinge wat hy moes ervaar was hy sélf voor verantwoordelik.

Mag ek eerlik bely? Ek weet nie of ek myself sommer met Saggeus sou vergelyk nie: ek is immers ‘n dominee (‘n christen); ek kom mense nie (doelbewus) te na nie; ek “probeer” darem goed wees, en ek dink nie ek besteel die armes nie. Maar dan hoor ek weer die woorde van Jesus: “Die Seun van die mens het immers gekom om te soek en te red wat verlore is”. En dan wonder ek, wie is die gelukkigste mens? Saggeus, of ek wat dink dat ek “okay” is?

En jy?

GEBED:

Hemelvader, U ken my deur-en-deur. Wees my genadig, soos U vir Saggeus ook was.

———–

Sinfoglesia: “Gratia” (die Latynse woord vir genade)

Op Dag 18 van ons Lydenstydreeks #VisioDivina luister ons na ‘n Duitse groep, “Sinfoglesia” se nuwe lied, “Gratia” (die Latynse woord vir genade)

As hierdie reeks jou bemoedig (én jy kan dit bekostig), wil jy nie oorweeg om my finansieel te ondersteun nie? 
STANDARD BANK
Takkode:  051001
Rek No:  080042805
RM BEZUIDENHOUT
Kampstraat 13, Eurekapark, 
Groot-Brakrivier, 6525.

VISIO DIVINA #17

Deel 1

Dit was eers in die 1500’s dat kunstenaars aandag aan híérdie bybelverhaal begin gee het. Sommige reken dit is omdat Martin Luther gereeld hierna verwys het as ‘n voorbeeld van vergewende liefde teenoor verguisende veroordeling. Wat hierdie skildery (deur die Vlaamse kunstenaar, Pieter Bruegel, 1565) so besonders maak is die vreemde monokleure (wat die figure bykans soos klipbeelde laat lyk). Waar ander kunstenaars die owerspelige vrou óf neergegooi op die grond, óf as ‘n gevangene voor die skare geskilder het, staan sy hier, kiertsregop, en is dit Jesus wat buig.

Hoe weet jy dit is Jesus? (Daar is geen stralekrans om sy kop nie; en Hy dra nie die tipiese purper-en-blou kleed nie.) Die bukkende man lyk dan net soos al die ander. Maar is dit nie die punt nie! Jesus lyk “soos ons.” ‘n Mens! Maar Hy tree anders as ons op. Jesus buig voor die sondige vrou en voor elke sondige mens wat staar.

Deel 2

TEKSVERS:

“Laat die een van julle wat ‘n skoon gewete het, eerste ‘n klip op haar gooi.” (Joh 8:7).

Dit is ‘n strikvraag waaruit Jesus Homself nie sou kon loswikkel nie. Daar was net een regte antwoord: “stenig haar!” Dit was wat die wet van Moses beveel het. Vir owerspel is daar nie genade nie! Die Fariseërs het dit geweet. Die skare het dit geweet. Die vrou het dit geweet. En toe kom die vraag, “…Maar u, wat sê u?” (v5). Dalk sou Jesus (om tyd te koop) kon sê, “en die man, waar is hy? Bring hom, hy moet ook gestraf word volgens die wet van Moses.” Maar nee, Jesus antwoord nie ‘n woord nie. Hy buk net grond toe.

Dit was ‘n ontstellende ding wat Jesus gedoen het: hy verneder homself om laer as die vrou te buig … nie net ‘n vrou nie; maar ‘n vrou soos sý! En steeds geen woord nie! Hy krap net met sy vinger in die sand.

Natuurlik wou hulle ‘n antwoord van Jesus hê (want dan kon hulle hom aankla). “Toe hulle aanhou om Hom te vra, het Hy regop gekom en vir hulle gesê: “Laat die een van julle wat ‘n skoon gewete het, eerste ‘n klip op haar gooi.” (Het jy opgelet dat Bruegel klippe by haar voet geskilder het?)

Die res van die verhaal ken jy goed. Jy ken die gesprek wat Jesus met die vrou het (Joh 8:8-11). Maar mag ons nooit hierdie verhaal lees sonder om nie te onthou van die geboë Jesus nie En dit voor ‘n sondaar.

GEBED:

Vergewe my, Here, dat ek soveel keer eerder reg wil wees as om te buig.

———–

“Nederland Zingt” “Genade, zo oneindig groot

Op Dag 17 van ons Lydenstydreeks #VisioDivina luister ons na ‘n “Nederland Zingt”-opname in Doesburg waar die gemeente “Genade, zo oneindig groot” sing.

As hierdie reeks jou bemoedig (én jy kan dit bekostig), wil jy nie oorweeg om my finansieel te ondersteun nie? 
STANDARD BANK
Takkode:  051001
Rek No:  080042805
RM BEZUIDENHOUT
Kampstraat 13, Eurekapark, 
Groot-Brakrivier, 6525.