| Konnichiwa Nuusbrief こんにちは Liewe ondersteuner,Soos ons paasfees gevier het, was ons net weerens herrinner aan die kosbare kruis van Jesus. Die boodskap van die kruis wek ‘n dieper verlange om weer terug te keer na Japan in ons harte op. Na amper drie jaar wat ons in Japan gewoon het, is ons meer as ooit oortuig van ons roeping asook die dringendheid van arbeiders op die sendingveld. Ons is gereeld in kontak met mede-sendelinge wat in Japan woon. Dit maak ons opgewonde om te hoor van al die werk wat die Here besig is om in Japan te doen. Sendelinge het nuwe en kreatiewe bedienings waardeur hulle Japanese mense uitnooi om Jesus te leer ken as hulle Heiland. In die konteks van Japan is dit uiters belangrik om op kreatiewe maniere evangelisasie werk te doen aangesien die meerderheid van Japannese mense selde of selfs nooit die ingang van ‘n kerk betree nie. Ons verlang om terug te keer na Japan maar dit is ook ons gebed dat die Here hierdie tyd in SA sal gebruik om ons selfs meer voortebrei vir die sendingveld. In hierdie nuusbrief deel ons graag WONDERLIKE nuus met jou, vertel jou meer oor al ons bedrywighede en ons vordering met ons studies.  Nadine is swanger!! ナディーンは、妊娠しています。Inderdaad is die weë van die Here volmaak (Psalm 18:30). 31 Desember 2021, die laaste dag van die jaar 2021 vind ons uit dat Nadine swanger is. Ons kon nie die nuwe jaar met beter nuus ingaan nie. Opnuut besef ons die Here se tydsberekening is volmaak. Ons kon nie vir ‘n beter tyd om verwagtend te wees gevra het nie. Terwyl ons in Suid-Afrika is en ons familie naby is kan ons nou vir die koms van hierdie kindjie voorberei. Net die Here en Sy perfekte tydsberekening kon hierdie wonderlike gebeurtenis laat geskiet het. Op die 28ste Maart vind ons uit dis ‘n dogtertjie. Die begeerte van ons hart is vir ons geskenk. Dit gaan goed met Nadine en sy is nou in die 2de trimester. Die baba dogtertjie sal DV vroeg September gebore word. “Elke baba kom met ‘n hemelse beursie” is die woorde van ‘n tannie aan ons. In hierdie afgelope 4 maande het ons alreeds soveel wonderwerke i.v.m. mediesefonds logistiek, bybetalings en benodighede vir ‘n baba gesien. Ons bid elke aand dat hierdie kindjie alreeds sal weet dat sy deur ‘n mamma en pappa maar selfs meer deur die Koning van alle konings geliefd is. Baie oggende in my stilltety bid ek “Here Jesus stel ons net instaat om hierdie kleine dogtertjie heen te wys na die kruis van Golgota”. Bid asseblief saam vir haar ontwikkeling sowel as vir Nadine se gesondheid.  Studies 勉強 1 Februarie 2022 het ons eerste kwartaal vir die jaar afgeskop. Ek en Nadine het 3 vakke elk. Hierdie semester leer ons oor die leer van sonde, die leer van die Heilige Gees, hermeneutiek en eskatologie. Sienende dat SATS ‘n aanlyn teologiese instansie is, moet ons baie navorsing doen en het ons ‘n magdom van leeswerk. Ons het soms aanlyn lesings, maar nie gereeld nie. Dit beteken dat die meeste van ons dae gevul is met die lees van teologiese vakkundige artikels en boeke oor die betrokke onderwerp. Daarna moet ons gereeld opstelle skryf en eksamens voltooi. Ons sien hierdie teologiese studies as nog ‘n manier waarop die Here ons toerus vir die bediening in Japan. Ons moet ons graad voltooi voor ons kan teruggaan Japan toe, siendende dat dit ‘n vereiste is vir ons visums deur OMF. Daarom is ons gemotiveer om te “ganbarimasu” 頑張ります wat beteken om te volhard of jou beste te gee in Japannees. Ons laaste eksamen is die 26ste April en ons nuwe kwartaal begin die 1ste Mei.  Die vrou in die sendingveldGeskryf deur Nadine Ek het die wonderlike voorreg gehad om gedurende ‘n vrouebiddag oor die vrou in die sendingveld te kon getuig. Dit was regtig spesiaal om my ervaring van vrou-wees in die sendingveld te kon deel. Ek het gesels oor al my ervarings vandat ek op 18 die eerste keer die sendingveld betree het asook my ervaring om in Japan as sendeling te woon. Ek kon die seëninge van sendeling wees deel, asook die talle uitdagings waarmee sendelinge gekonfronteer word. Ek is dankbaar dat ek ‘n verteenwoordiger van sendelinge kon wees en ook moontlik ander dames kon herrinner om vir sendelinge te bid.  Betrokkenheid by gemeentes Fotos van onlangse geleenthede  Nadine se magie groei.  Ruhan (Elmar se broer), Danielle (Niggie), Chane (Niggie), Nadine en Elmar Dankbaar:*Nadine se swangerskap. *Die Here se voorsiening vir die baba (babaklere ens). *Ons is dankbaar vir nuwe gemeentes wat oop is om ons te ontvang. Gebedsversoeke Bid asseblief vir die volgende: Bid asseblief vir die baba se groei en Nadine se gesondheid. Ons Teologiese studies. Ons Japannese aanlyn taalstudies. Ons gesondheid. Bid asseblief vir ons finansiële ondersteuning. Bid vir meer oopdeure om gemeentes te besoek. Bid assblief dat die Here in hierdie jaar diep werk in en deur ons lewe sal doen. Die redding van Japannese siele.    Ons wil net opreg baie dankie sê aan elkeen wat finansieël ons ondersteun. Ons skuif van Missie Japan na OMF het baie onsekerheid ingehou, maar ons prys ons getroue Here vir nuwe ondersteuning wat ingekom het. Om ‘n sendeling te wees is nie aldag maklik t.o.v. finansies nie. ‘n Mens is gereeld onseker oor jou eie begroting, maar ons is so dankbaar dat die Here wie ons geroep het getrou is. Hy sorg en Hy voorsien. Ons loof die Here dat Hy mense oproep en instaat stel om finansieël betrokke te wees by SY werk. As u vir ons finansieël bydra onthou asseblief om E&N as verwysing te gebruik.  |
   Share  Forward |
Jesus vir ons, vir almal.
