Laas Saterdag het ons gemeente die voorreg gehad om Frank Opperman se meesterlike eenmansvertoning, Reunie, in ons kerksaal te beleef. Dit was ’n onvergeetlike aand waar die gehoor meegesleur is deur ’n reeks nostalgiese, humoristiese en diepsinnige oomblikke.
Frank het weer eens bewys hoekom hy as een van Suid-Afrika se mees geliefde toneelspelers beskou word. Met sy uitsonderlike talent het hy die verskillende karakters so lewendig en eg vertolk dat mens skoon vergeet het daar is net één man op die verhoog. Reunie het die perfekte balans tussen die lag en die traan getref — van skouerskuddende humor oor ou skoolherinneringe tot stil, broos oomblikke van oordenking wat elkeen van ons se hartsnare geraak het.
’n Woord van Opregte Dank
’n Suksesvolle vertoning soos hierdie gebeur nie sommer vanself nie, en ons wil graag ons opregte waardeering uitspreek teenoor almal wat agter die skerms gewerk het:
- Frank Opperman & assistent: Baie dankie dat jy jou uitsonderlike talent met ons gemeente kom deel het en vir ons ’n aand van topklas-vermaak besorg het.
- Bles de Wet (Klank en Beligting): Baie dankie vir jou professionele toewyding. ’n Spesiale dankie vir die vinnige optrede om ekstra beligting op te spoor en op te stel, asook die sorg waarmee jy die klank en alle tegniese reëlings vlot laat verloop het.
- Johan Smit: ’n Baie spesiale woord van dank aan Johan wat hierdie wonderlike fondsinsamelingsgeleentheid ge-inisiëer en gereël het. Dankie vir al jou harde werk met die logistiek rondom Frank se besoek en die hantering van die kaartjieverkope.
Dankie ook aan elkeen in die gemeente en gemeenskap wat die geleentheid ondersteun het. Dit was ’n riem onder die hart om almal so saam te sien geniet!
