Sondagaand 26 November 2023 het ons die jaarlikse Kerssangdiens beleef. Watter wonderlike geestelike ervaring waar ons weer die koms van Jesus Christus in herinnering kon bring.
Die program het begin met die opening deur Ds. Danie Goosen, waarna hy en vier jongmense, Adriaan de Villiers, anneke Erasmus, Ewan de Villiers en Ruben Erasmus met afwisseling en voorlesings die wit Christus kers en die vier groen advent kerse aangesteek het. Die vier groen kerse versinnebeeld Hoop (Volvoering van Christus se koms soos deur Jesaja voorspel), Vreugde (oor die koms van die Verlosser), Vrede (want Christus is die Vredevors) en Liefde (want Christus het vir ons kom wys hoe ons mekaar moet lief hê).
Die Gemeentesang is afgewissel met voorlesings, solo sang en kerkkoor liedere wat die verhaal van die koms van Christus vertel, tot die nag van Sy geboorte. Die voorlesings is gedoen deur Cornie en Corrie Pieters, Ds. Danie Goosen en Nadia Marais, Johan en Philene Smit, Johan Miller en Charlotte Eicker.
Die Solosang en kerkkoor bydraes was heerlik om te beleef en het mens in die gees van die kersgety ingelei. DIe aand is op gepaste wyse afgesluit met Stille Nag in ‘n donker kersverligte kerkgebou en die Gees van die feesgety het mens bygebly. Na die diens kon almal feestelik verkeer om die tafels in die kerksaal, wat keurig deur die Gasvryheidsbediening voorberei is.
Ons wil almal wat bygedra het om van hierdie aand so ‘n groot sukses te maak bedank. Die Erediensbediening en klank (Bles en Mona de Wet), program koordineerder (Marida Bridges), blomranskikking (Una Varster), die kantoor personeel (Carmi Kriel, Alfreda Stander en Linda Grobler) en die Gasvryheidsbediening, wat alles so keurig voorberei het. Dit was ‘n onvergeetlike ervaring. ‘n Kort video is van die musiek bydraes gemaak en is beskikbaar op die webtuiste.
Die NG Kerk Groot-Brakrivier neem afskeid van Ds. Paul en Hettie Roodt op 8 Mei 2022 tydens ‘n finale preek. Ds. Paul Roodt is as proponent in die NG Kerk Groot-Brakrivier gemeente gelegitimeer op 18 Januarie 1985 en het op 31 Mei 2020 die gemeente tydens die tweejaarlange, grendeltyd pandemie verlaat, weens mediese redes, om hulle in Hartenbos te vestig.
Ds. Paul het sy laerskool in Laerskool Brandwag, waar sy vader die skoolhoof was, voltooi. Hiervandaan is hy na Hoërskool Punt in Mosselbaai waar hy gematrikuleer het. Sy BA Admissie en Grieks Honneurs het hy by UPE verwerf en sy finale jare by die Teologiese Kweekskool op Stellenbosch voltooi. Hierna het hy twee jaar diensplig by 8 SA Infanterie Bataljon te Upington gedoen. Hy ontmoet vir Hettie tydens sy studentejare in Stellenbosch. Hulle is later getroud en het twee dogters, Jolette en Estelle.
Diens in die Kerk
Die geleentheid in die kerk was volgepak en kleurryk. Die voorsang met klavier en dwarsfluit begeleiding word deur Isabella Wolmarans gelei en sluit onder andere Ps. 118, Lied 163, Lied 553 en Ps 146 in. Ds. Danie Goosen doen die verwelkoming en inleiding tot Ds. Paul Roodt se finale preek.
Ds. Paul gebruik dieselfde bybeltekste waarmee hy sy intreerede gegee het. In 1 Kor. 2: 1-5 as inleiding wys hy op sy nederigheid en diensbaarheid om Jesus Christus verstaanbaar te verkondig sodat ons geloof nie in wysheid van mense sou bestaan nie, maar in die krag van God.
Met 2 Kor. 12: 7b-10 vergelyk hy sy swakheid en siekte met die van Paulus wat tot God gebid het om die doring in sy vlees van hom weg te neem, maar God antwoord met “my genade is vir jou genoeg, want my krag word in swakheid volbring.” Desember 2014 was vir Ds. Paul ‘n keerpunt toe Parkisons by hom gediagnoseer is. Hy het egter aan hierdie woorde van Paulus vasgehou “As ek swak is, dan is ek sterk.”
Uit Matt. 28:16-20 het Ds. Paul sy roeping ontvang en aangepak. Hy was ‘n dissipel van Christus wat uitgegaan het om dissipels te maak, hulle te doop in die naam van die Drie-enige God en hulle te leer waar hy kon.
Tydens sy 35 jaar in diens van die NG Kerk Groot-Brakrivier gemeente het hy troues (225), doopbedieninge (469) en begrafnisse (616) gelei. Die laaste doop as predikant is ook in hierdie kleurryke geleentheid bedien toe hy vir klein Adelaide Kelly Schlechter doop. Hy het ook tydens menige huisbesoeke, blokbyeenkomste, bybelstudiegroepe, jeugwerk, kategese en skoolgroepe sy belofte aan God gestand gedoen. Hy sê ook dankie vir die jare wat hy in diens kon staan.
Demissie en Groeteboodskappe
Ds. André Kritzinger wat ‘n jarelange kollega in Mosselbaai was van Ds. Paul oorhandig die akte van demissie by emiritaat namens die Ringkommissie en laat ons met die boodskap dat ons vir Ds. Paul moet bid.
Ds. Johan Strauss wat vir 36 jaar in die Groot-brakrivier VGK was, en nou reeds 11 jaar afgetree is, bedank Ds. Paul en Hettie vir hul hulp en bystand in die gemeenskap. Hy noem Ds. Paul ‘n kollega en vriend wat betroubaar, lojaal, wat met toewyding en pligsgetrouheid sy taak volbring het. Hy groet Ds. Paul met Matt 17:8, waar die dissipels net vir Jesus sien; Fil 4:4 waar ons gemaan word om altyd bly te wees soos die voorbeeld wat Ds. Paul gestel het; en Num. 6:24-26 “Die Here sal jou seën en jou behoed; die Here sal sy aangesig oor jou verhef en jou genadig wees; die Here sal sy aangesig oor jou verhef en aan jou vrede gee.” Mag dit so wees elke dag!
Johan Muller, wat Ds. Paul jare lank ken as gemeentelid en familie vriend vertel van die eerste ontmoeting toe die jong Paul Roodt op die vraag wat hy gaan word, eenvoudig geantwoord het: “Ek gaan ‘n dominee word.” Ds. Paul het gereeld aan huis van Tannie Maraaitjie kom tee drink en later self ook sy eie pakkie tee saamgebring het. Hy het Johan se suster Alta begelei en ondersteun tydens haar stryd met kanker en was ‘n steunpilaar vir die hele familie; ook Johan se broer Sarel wat baie ondersteuning nodig gehad het. Die familie is lief vir Ds. Paul en Hettie en bid dat “Sy genade kombers genoeg sal wees vir hom.”
Ds. Smuts van Rensburg wat jarelange kollega in Hartenbos en vriend is noem hoe die NG Kerk Groot-Brakrivier uitgebrei en gegroei het, in getalle en geestelik, van die begin jare nadat Paul gelegitimeer is tot sy uittrede. Hy was ‘n mens wat kon leiding gee, met oorgawe gedien het en met sy hele hart, siel, verstand en krag die Here gedien het. Hy het ‘n wonderlike en vlymskerp humorsin, kon heerlik lag en huil wanneer nodig. Ds. Paul was getrou aan wie hy is – hy het alles gegee. Ds. Paul en Hettie het mekaar ondersteun in sagtheid en nederigheid. Hy laat Ds. Paul ook met Num 6:24-26 en met die boodskap:
Geniet elke dag wat geskenk word en leef voluit!
Ds. Danie Goosen, kollega tydens die laaste klompie jare, noem ook Ds. Paul se toegewydheid en bedank hom vir die samewerking, die saambid en vir die respek vir mekaar; en maan hom om nie te hard op homself te wees nie. Hy kon sag en ferm wees wanneer nodig.
Die geleentheid word afgesluit met ‘tee met koekies’, Ds. Paul se geliefkoosde sê-ding wanneer daar ‘n lekker geselligheid is na ‘n diens.
Ds. Paul het voorwaar die wedloop gehardloop en dit suksesvol volbring. Die NG Kerk Groot-Brakrivier sê dankie vir 35 jaar se 100% diens, maar nie heeltemal vaarwel nie, aangesien Ds. Paul en Hettie nog lidmate in die gemeente is.
NG Kerk Groot-Brakrivier groet met 2 Pet. 5:10-11:
“En mag God van alle genade self, wat ons geroep het tot sy ewige heerlikheid in Christus Jesus, nadat ons ‘n kort tyd gely het, julle volmaak, bevestig, versterk en grondves! Aan Hom die heerlikheid en die krag tot in alle ewigheid!”
Week van gebed: 23 – 25 Januarie 2022 18:00 in kerk Temas:: Om die Woord te bid!… Om stil te word rondom die ‘kuns‘ van die Woord; Om stil te word rondom die ‘musiek‘ van die Woord! Sondag – 23 Januarie 2022: Erediens vind plaas om 10:00 in die kerkgebou en die saal, indien nodig. Prediker: Ds Danie Goosen. Spesiale Offer vir die Jan Kriel-Instituut Getuienisbediening: Ons datums vir Wolwedans vir die eerste kwartaal is: 26 Januarie, 9 en 23 Februarie asook 9 en 23 Maart. Ons nooi almal weereens uit om deel te neem aan die sopprojek en te help om 80 gesinne te kan bedien. Kairos Kursus – Februarie 2022 …
Sondag 12 Desember 2021 skriflesing vanoggend kom uit Filippense 4:4-7
Gebedsgidse vir Desember 2021 en Januarie 2022 is beskikbaar in die voorportaal
Die Kersdagdiens sal ook 25 Desember 2021 om 07:00 op YouTube uitgesaai word.
Sondag – 19 Desember 2021 Prediker: Ds Danie Goosen
Ds Danie is met verlof vanaf 26 Desember 2021 tot 10 Januarie 2022.
Sondag – 26 Desember 2021 Prediker: Ds Rudolph du Plooy
Sondag – 2 Januarie 2022 Prediker: Dr Ronell Bezuidenhout
Sondag – 9 Januarie 2022 Prediker: Dr Frans Hancke
Kersdagdienste – 25 Desember 2021 Die dienstye is 07:00; 08:00; 09:00 en 10:00
Oujaarsdiens – 31 Desember 2021 As gevolg van Covid-19 regulasies sal die oujaarsdiens nie in die kerkgebou aangebied word nie. Die diens sal wel op YouTube om 17:00 op 31 Desember 2021 uitgesaai word
D.D., [Prak. Teol.] D.LITT. et PHIL., D.D., [Kerkgeskiedenis]
Noël-Jean studeer aan die Universiteit van die Oranje Vrystaat in Bloemfontein,
Orrel, Sang, Klavier, Komposisie, Afrikaans, Engels en Latyn, daarvan, vyf as hoofvakke.
Tydens die Somer-en Winter vakansies neem hy meesterklasse by die
beroemde orrelis, Marié-Claire Alain, aan die Sorbonne in Parys, Frankryk.
Sy doktorale studie en navorsing handel oor die Orrelboukunde van die Oostenryker, Arp Schnitger en sy tydgenote Jacob Hagebeer en Andreas de Mare.
Hy word in 2004 georden en dien aanvanklik in die Anglo Katolieke Kerk, totdat hy in 2015 in die Anglikaanse Kerk geïnkardineer is in die Bisdom van George en bedien die gemeente van St. James the Great, Graaff-Reinet.
Gedurende 2018 was hy werksaam in die Bisdom van Grahamstown en is nou weer terug in die Bisdom van George.
As orrelis te Calitzdorp: 2003 – 2013 en Nuwe Kerk, Graaff-Reinet: 2013 – 2018, het hy alom bekendheid verwerf met sy daaglikse orreluitvoerings.
Sy eerste skakeling met Groot Brakrivier gemeente het reeds in September, 2014 begin toe hy genooi is om deel te wees van die Musefees.
Daarna het hy agtereenvolgens die afgelope vyf jaar daar opgetree.
Op 1 Januarie, 2019 het hy as amptelike orrelis van die gemeente diens aanvaar.
