“Beveel die rykes in die huidige wêreld om nie hoogmoedig te wees nie, en nie hulle hoop op die onsekerheid van rykdom te vestig nie, maar op God, wat alle dinge in oorvloed aan ons gee om te geniet.”
Tim 6: 17
Vir elkeen van ons, is die idee van geniet, heel moontlik verskillend. Een mens hou van kuier, lag en gesels, ‘n ander van hardloop en oefen tot die sweet hom of haar aftap, terwyl ‘n ander van stil-in-‘n-hoek sit en lees hou, om maar enkele teenstrydige genietinge te noem. God het ons elkeen op ‘n pad geneem, wat maak dat ons enig is in ons genietinge, ervaringe en waarmee ons ons besig hou. Ons worstel dikwels met die vraag: “Mag ons die lewe geniet?” Die antwoord lê heel moontlik daarin: “Wat ons as genieting beskou?” Is dit tot ondersteuning en uitbou van die Koninkryk? Is dit ten koste van ander, of is dit tot opbou van ander?
Hoe kan ons weet of ons genietinge aanvaarbaar is voor God. Ons kry gedeeltelike antwoorde in Prediker, wat ‘n baie siniese uitkyk op die lewe het. Vir hom het al sy wedervaringe, ervaringe en genietinge geen blywende vreugde gebring nie en het hy dat as sinloos beskryf; tog wys hy daarop dat as dit uit die hand van God gegee word, kan jy dit meet oorgawe doen (“Gaan eet jou brood met vreugde, en drink jou wyn met ‘n vrolike hart, want God het lankal jou dade goedgekeur. Laat jou klere altyd wit wees, laat jou kop nie sonder reukolie wees nie. Geniet die lewe saam met die vrou wat jy liefhet, al jou sinlose dae wat Hy vir jou gegee het onder die son, al jou sinlose dae; want dit is jou beloning in die lewe by jou inspanning waarmee jy jou afsloof onder die son. Alles wat jou hand vind om te doen, doen dit met oorgawe;…” (Pred. 9: 7-10); (“Om te lag, het ek gesê, is onsinnig, en oor plesier, wat lewer dit op?” (Pred. 2: 2); (“’n tyd om te huil en ‘n tyd om te lag; ‘n tyd om te rou en ‘n tyd om te dans;” (Pred.3: 4); (“Daar is niks beter vir die mens as dat hy eet en drink en sy keel laat geniet wat goed is nie. Ook dit het ek ingesien: Dit is uit die hand van God, want: “Wie kan eet en wie kan geniet sonder My.”” (Pred. 2: 24-25)).
Verder uit Prediker blyk dit dat ons eerder moet swaarkry en huil (“Verdriet is beter as lag, want met ‘n droewige gesig gaan dit goed met die hart. ” (Pred. 7: 3); (“Gelukkig is julle wat nou honger ly, want julle sal versadig word. Gelukkig is julle wat nou huil, want julle sal lag.” (Luk. 6: 21); (“Weeklaag en treur en huil! Laat julle lag in droefheid verander, en julle blydskap in somberheid.” (Jak. 4: 9)). Selfs Christus noem dat ons beter af is as ons hartseer is (“Gelukkig is julle wanneer mense julle haat en verstoot en uitskel en julle name deur die modder sleep ter wille van die Seun van die Mens. Wees bly op daardie dag, en spring op van vreugde, want kyk, julle beloning in die hemel is groot. Hulle voorvaders het immers die profete net so behandel.” (Luk. 6: 22-23)).
Daar is tog ‘n wete wat vir ons vreugde kan verskaf en ons in vreugde en met die nodige dankbaarheid kan laat leef en dus ook geniet (“Ook het julle met die gevangenes medelye gehad, en die beslaglegging van julle besittings met vreugde aanvaar, omdat julle weet dat julle ‘n beter en blywende besitting het.” (Heb. 10: 34)). Daar is so dikwels mense, wat vir ons, soms om onverstaanbare redes, ‘n lewensvreugde in hulle dra (“Ons laat julle ook weet, broers, van die genade van God wat aan die gemeentes in Macedonië gegee is: dat hulle, te midde van swaar beproewings as gevolg van verdrukking, hulle oorvloedige vreugde en hulle diep armoede laat oorvloei het in ‘n rykdom van vrygewigheid van hulle kant af.” (2 Kor. 8: 1-2)). Ons moet besef dat die blywende vreugde wat ons in soveel ander mense sien, kom uit die besef dat hulle nietig is in God se oë, want hulle het tot die besef gekom dat die geboorte van Christus werklik ‘n blywende vreugde na hierdie aarde gebring het (“Toe sê die engel vir hulle: “Moenie bang wees nie. Kyk, ek bring vir julle ‘n goeie boodskap wat vir die hele volk ‘n bron van groot vreugde sal wees: Vandag is daar vir julle in die stad van Dawid as Verlosser gebore, Christus die Here.” (Luk. 2: 10-11)). Daarmee saam het ons die Heilige Gees wat ons gedurigdeur bystaan, sodat ons in vertroue die dinge kan geniet wat uit die genade deur God aan ons gegee is (“As julle ter wille van Christus se naam beledig word – gelukkig is julle, omdat die Gees van heerlikheid, dit is die Gees van God, op julle rus.” (1 Pet. 4: 14); (“Al die heidennasies het Hy in vorige geslagte toegelaat om op hulle eie paaie te gaan, maar tog het Hy geen onduidelike getuienis van Homself gegee nie, deur goeie dinge te doen: Hy het uit die hemel aan julle reën en vrugbare seisoene gegee, en julle liggame met kos en julle harte met vreugde gevul.” (Hand. 14: 16-17)).
Dan sal ons ook soos in Jesaja met blydskap en vreugde kan leef, en elke gawe uit God se hand kan geniet (“dié wat deur die Here vrygekoop is, sal terugkeer, hulle sal in Sion aankom met jubelkrete – met ewige vreugde sal hulle gekroon wees. Blydskap en vreugde sal hulle oorweldig, en verdriet en ‘n gesug sal wegvlug.” (Jes. 35: 10); (“Hulle verhinder mense om te trou, en laat hulle sekere kossoorte vermy, terwyl God dit geskep het vir gelowiges, diegene wat die waarheid insien, om dit met dankbaarheid te geniet. Want alles wat God geskep het, is goed, en niks wat met danksegging ontvang word, is verwerplik nie, omdat dit deur die woord van God en gebed geheilig word.” (1 Tim. 4: 3-4)).
Selfs Job en die Psalmdigter het besef waar die vreugde lê (“Ja, dan sal jy jou vreugde vind by die Almagtige, en jou gesig na God ophef.” (Job. 22: 26);(“Gelukkig is die mens wat ontsag het vir die Here, wat groot vreugde vind in sy gebooie. ” (Ps. 112: 1-2)). As ons besig bly, in nederigheid en ootmoed voor God, is daar vreugde en genieting in jou werk en alles wat jy doen (“Ek het gesien dat daar niks beter is nie as dat die mens vreugde vind in sy werk, want dit is sy beloning. Ja, wie kan hom daartoe bring om te sien wat ná hom sal gebeur.” (Pred. 3: 22), en die kos wat jy eet (“Hulle almal sien op na U om vir hulle kos te gee op tyd. Gee U vir hulle, raap hulle dit op; maak U u hand oop, word hulle versadig met wat goed is.” (Ps. 104: 27-28)). Christus belowe ons dat Sy las lig is, as ons na Hom toe keer (“Kom na My toe, almal wat vermoeid en swaar belaas is, en Ek sal julle rus gee. Neem my juk op julle, en leer van My, omdat Ek sagmoedig en nederig van hart is, en julle sal rus vind vir julle gemoed. Want my juk is draaglik en my las is lig.” (Matt. 11: 28- 30)).
Hoe kan ons nie die genadegawes wat ons uit God se hand ontvang, geniet nie? Ons moet dit net in opregtige dankbaarheid ontvang (“Aangesien julle dus Christus Jesus die Here aangeneem het, bly leef in Hom; in Hom is julle gewortel en in Hom word julle opgebou en versterk in die geloof, soos julle geleer is, terwyl julle oorvloedig is in dankbaarheid.” (Kol. 2: 6-7)), en die Heilige Gees sal ons ook hierin lei in die woorde van Christus (“Die Parakleet, die Heilige Gees, wat die Vader in my Naam sal stuur, Hy sal julle in alles onderrig en julle aan alles herinner wat Ek vir julle gesê het.” (Joh. 14: 26)).